Apïmie U.S.A. pono Bethel eatongon oʼtokon nono wararo ma. Morokon po moʼkaron Bethel asakarïkon amukon meʼme omaminianokon poko mandon. Moro wòrupïano omaminiano wïtorï epatomaton òʼwin, ijoseʼpa apïmie tuʼmendïmenokon weʼchoʼkon ta. Amukonïmbo amukon meʼme ouranano taka karetakon petakamanamome mandon, morokon takararamon karetakon The Watchtower maro Awake! meroaton, tïpïmiangon karetakon meroʼpo apoiʼpioaton osepoko, karetakon yeʼnindoposaton aropotoʼkonʼme weʼchoʼkonʼwa, totamïngon maro piʼchakon èkïrïaton, ijoseʼpa amukon pore òtïkon poko mandon morokon tïnenerïkon weʼchoʼkonʼwanome.

Bethel eatongon oʼtokon enenamon moropo omaminiano eneaton. Bethel eatongon oʼtokon wararo, moʼkaron Nono Wararo Jehoba poko Wòrupïatonon Emamin Enenamonʼwa òruwa ijoseʼpa moro koʼpo pore enenamon tïnondaʼmainie mandon. Juʼpïa moro omaminiano upuʼnamon onenamon kariʼniakon moʼkaron. Moan ro, tïnenerïkon weʼchoʼkon ta neiara pore moro wòrupïano emamin wïtorï upuʼpoaton moʼkaron Nono Wararo Onenamonʼwa, ijoseʼpa òtïro eiʼpiopïn weíʼpioto eropa. Morokon niekarichïrïkon ro tïʼwainie, moʼkaron Nono Wararo Onenamon epatomaton òtïpangon wòmepatoʼkon meroporï uputïrï poko karetakon ta, tokarishangonme eropa asiniokonïmbo maro opotonon woseʼnanoʼnokon po. Moʼkaron Nono Wararo Jehoba poko Wòrupïatonon Emamin Enenamon ekemaʼpamboto pore tokatakainie amu mosaton moʼkaron Bethel eatongon oʼtokon enenamonʼwa neiara pore juʼpïa nekatu tomaminjon arorï poko emepatoʼkonʼme. (Proverbs 11:14) Tïtoʼpotoro eneinie, ouranano amu ïan moro pono Bethel eaton nenerïkon weʼchoʼkon tanokon Jehoba poko Wòrupïatononʼwa apokumatoʼkonʼme.

Tïnenerïkonme ïrïʼmasan Jehoba poko Wòrupïatonon epatomaton. Bethel eatongon enenamon neiako amu eropa woseʼnanoʼtopo tïsepa yeijï upusaton. Neiara juʼpïa nekatu tomaminjon arorï ekarishaton moʼkaron tïnenerïkon weʼchopo tanokon tïaʼroro wòrupïano emaminʼwa òtïrïʼmasambaʼwa, moʼkaron amukon roten weʼchopoʼwa wòrupïa miokïʼmasan maro moʼkaron woseʼnanoʼtoʼkon etawarï aropoʼnangon onenamonʼwa eropa. Opotonon woseʼnanoʼnokon weijï mero eropa, moʼkaron eropa neiara aembo ïrï ekarishaton. Sherïnon woseʼnanoʼtoʼkon èkïrïrï enenamonme eropa mandon, moʼkaron tïnenerïkonme ïrïʼmasan Jehoba poʼchorïkon nishanorïkon karetakon aropoaton eropa iʼyainie. Ijomboro Bethel eatongon oʼtokon po omaminianokon topatoro moro wòrupïano emamin aropoan.​—1 Corinthians 14:33, 40.

• Neiara moʼkaron Bethel eatongon oʼtokon enenamon moʼkaron Nono Wararo Wòrupïano Emamin Enenamon epatomaton?

• Òtïkon Bethel eatongon oʼtokon po omaminiatonon nipiokonomarïkonme na?