Jehoba poʼchorïkon enenamon epemaʼpapai mandon onenamonme yeijïkon poko. Koromone Krais wekenanamon tïmongeme yoseʼnanopïsan wotapoíʼpiombo paʼme roropa, tïweijï taronokon kariʼniakon anuniaton erome ‹Opoto Papa kapararïkon enenamonme.› (Acts 20:28) Moan ro onenamon, poriʼpie Jehoba maro osepaname weʼchonon, chapararïkon aronamonme ïrïʼmasan moʼkaron, ‹enerïkon seʼpa tïweijïkon ta kapïn kïneneaton, tïweísheinie tïweijïkon ta te; topemarïkonʼwa oʼpotïʼpïa, towaʼpore tïweijïkon ta te.› (1 Peter 5:1-3) Òtïpangon omaminianokon poko kokatakainie nandon?

Tuwaro kïpokoinie mandon, koiyomaton eropa. Moʼkaron onenamon Jehoba poʼchorïkon eiyomaton iʼya yeijïkon ta anïʼmasangomba weinio, juʼpïa eropa kïnaroaton. Tïʼwainie Opoto Papaʼwa ènï einiamïn omaminiano ïrïʼpo uputïrï ke, moʼkaron onenamon pioʼchorïkon koʼpo òtïrïʼparo mandon. Juʼpïa kïweijïkon poko te kopatomaton, towaʼpore kïweʼchoʼkonʼme. (2 Corinthians 1:24) Ijowane amu kapara èmï yararoinie tïkapararïkon poko tuwaro na, moro paʼme roropa moʼkaron onenamon juʼpïa Opoto Papa poʼchorïkon uputïʼmarïkon uʼkuaton yararoinie neiara epatomarïkon upuʼtoʼme tïʼwainie.​—Proverbs 27:23.

Neiara Opoto Papa ishe yeʼchopo poko kïweijïkon poko kòmepaton. Ekemaʼpa sundaka moʼkaron onenamon kïwoseʼnanoʼtoʼkon po kòmepaton Opoto Papa ta kïwotamïʼcharïkon poriʼchomatoʼme. (Acts 15:32) Moan ro tomaminjon ta einiamïngon kariʼniakon, moro wòrupïano emamin aroaton eropa, kïmïaroiniero kïnemaminiaton kòmepatoʼkonʼme amukon me meʼme moro wòrupïano emamin arorï upuʼtoʼme kïʼwainie.

Kïwararoinie kapokumarïkon ïaton. Opoto Papaʼwa kïweijïkon ta kïpïanaʼtomatoʼkonʼme moʼkaron kïwoseʼnanoʼtoʼkon ponokon konenamon ambïako koʼtïkon po kotawaton ijoseʼpa kïwoseʼnanoʼtoʼkon po kopatomatoʼkonʼme Opoto Papa Karetarï weinio, juʼpïa kapoponoʼpotoʼkonʼme eropa.​—James 5:14, 15.

Tïmongeme kïwoseʼnanopïsan neroʼkon kapïn nienerïkon me ma, morote tïaʼropa pore neroten onenamon tïpo eropa kïnemaminiaton tïwosemangatoʼkonʼme tasakarïkon maro. Niemban joke nienerïkomba ma, ijokero moan tope omaminiatonon onenanon nuse kïʼwainie tonerïkon taroro mandon.​—1 Thessalonians 5:12, 13.

• Òtïkon kïwoseʼnanoʼtoʼkon ponokon onenamon emaminjon me na?

• Neiarainie moʼkaron konenamon tuwaro kïpokoinie tïweijïkon enepoaton?