Apïmie amukonʼwa tïporoʼkaʼmapa chosiʼya tïtopotïrïkonïmbo ma tomamïrïkon ta uputïse pane roten tïweʼchoʼkon oneporïʼpapai kombaijo moropo mandon, ijoseʼpa juʼpïa tapoponoʼporïkon. Oʼtonoʼme katu juʼpïapa owïtorï na Jehoba poko Wòrupïatononʼwa aembo tïwoseʼnanoʼtoʼkon po tïwòmeparïkon ïrïʼmaʼpo eta? Neiara owepatomano moroʼwa owïtorï?

Towaʼpore owotaporï mepoa tapokurume owenenamon raʼna oweijï ke. Jesasï rombïʼpopa paʼpopo, asi paiʼnio yekenanamon aembo tïrïʼmainie mandon yoseʼnanoʼtoʼkonʼme Opoto Papaʼwa yokunamatoʼkonʼme, Charetarï poko yòmepatoʼkonʼme, osekaro yotapokumatoʼkonʼme eropa. (Hebrews 10:24, 25) Otapokume weʼchonon maro tïwoseʼnanopïrïkon ke, taʼronokon panananokon raʼna kïnotapoaton, tasakarïkon Jehobaʼwanokon raʼna. (2 Thessalonians 1:3; 3 John 14) Yeíʼmiasangonïmbo paʼme eropa naʼna erome ma, piaʼmeinie roropa naʼna towaʼporï epoan.

Neiara Opoto Papa Karetarï tanokon wòmepatoʼkon aʼkuru poko owemeparï mepoa. Opoto Papa Karetarï ta ekarichïʼmaʼpombo paʼme roropa erome kariʼniakon, worïiangon, iʼmiakonïmbo eropa osekaro kïnoseʼnanosaton tïwòmepatoʼkonʼme. Juʼpïa Opoto Papa Karetarï aʼkuru uputïʼmanangonïmbo òmepanamon kopatomaton neiara Charetarï tanokon wòmepatoʼkomba aʼkuru uputïrï poko komamïrïkon ta. (Deuteronomy 31:12; Nehemiah 8:8) Paʼpororo morokon toyuʼpomïngon èyukuru ta weiniopa ma, waretanokon ta eropa. Morokon ta kïweijïkon patoro kïsupuʼpoaton mondopa kuwaponokon kïneporïkon weijï Krais wekenanamon me.​—Hebrews 10:23.

Opoto Papa poko owotamïʼcharï poriʼchomarïpïa mepoa. Òʼwin amu yòrupïatoʼme anumïʼpombo Paul tïka òʼwin amu Jesas wekenanamon woseʼnanopïsanʼwa ma: ‹Owenerïkon sanorï pe wa . . . Opoto Papa poko kïwotamïʼcharïkon pato osekaro kïwotapokumatoʼkonʼme, amoiniaron ro, awu eropa.› (Romans 1:11, 12) Ekemaʼpa roten kïwosepopotïrïkon kïwatonon Opoto Papaʼwanokon maro kïwoseʼnanoʼtoʼkon po, Opoto Papa poko kïwotamïʼcharïkon poriʼchomanopa, Jesas weíʼmiaʼpombo paʼme eropa komamïseinie kïpoaton.

Owïtorï seʼpa te ma wòmepa naʼna woseʼnanopïrïʼwa erokon enetoʼme oʼwa osekeroro? Choʼpo naʼna opoko kïneian owïtoʼpoto. Ijomboro moropo wòmepanokon epeʼma ma​—amumbo yakoro osepemapoʼparo naʼna ma.

• Noʼkan weíʼmiasan paʼme roropa naʼna erome na wòmepa tïwoseʼnanopïrï yako?

• Neiara kopatomaton kïwoseʼnanoʼtoʼkonʼwa kïtopotïrïkon?