Òtï opoto eiʼpiopïn weíʼpioto, ijo wane tïrïrïnʼwa ijoseʼpa opoto ishano tamuruʼwa oʼtokonïmbo papïʼmaʼpotopa, Jehoba poko Wòrupïatonon ichakaro aembo tïwatonon epatomarï èkïrïʼmaton morokon kanome woʼchotaʼmatonon. Moro paʼme naʼna weijï taʼroro otapokume osekaro naʼna weijï enepoan. (John 13:34, 35; 1 John 3:17, 18) Òtïkon poko nepatomaton naʼna?

Pïrata ïan naʼna. Opoto òmi weíʼpiomboto Judea po, moʼkaron koromonenokonïmbo Jesas wekenanamon Antioch ponokonʼwa pïrata tïmose moʼkaron tïwatononʼwa ma epatomatoʼkonʼme. (Acts 11:27-30) Moro paʼme roropa erome naʼna ma, owero weʼchopo ta òtï eiʼpiopïn kanome tïwatonon woʼchotaʼmarïkon yako tïwoseʼnanoʼtopo enenangon pato naʼna pïrata amu mosan epatomatoʼkonʼme.​—2 Corinthians 8:13-15.

Topatomase yeʼchoʼkonïmbo poko naʼna kïnepatomaton. Moʼkaron onenamon, moro eiʼpiopïn weíʼpioʼwa opïʼmasan, paʼpororo moʼkaron tïwoseʼnanoʼtoʼkon tanokon tïwatonon upiaton juʼpïa yeijïkon enetoʼme. Opatomano ïnangonme niondaʼmasan tonasen ïpoaton, churipyin tonïmïn tuna, woʼmïnanokon, oʼtonanokon, opianokon eropa. Òtïkon èkïrïrï upuʼnamon Wòrupïatonon oseke tïpïratarïkon poko kïnïsaton morokon tïmïngon ekandoʼme tïʼwainie, ijoseʼpa morokon anïʼmaʼmasamba oʼtokon maro Woseʼnanoʼtopo èʼtïkon kuraʼmatoʼme tïʼwainie. Òʼwin otasaka paʼme tïweijï ke naʼna, juʼpïa osekaro tomaminiarï uputïʼmaʼpo ke eropa, koí naʼna kïnosepatomano òtï eiʼpiopïn weíʼpioto. Tïwatonon Jehobaʼwanokon onepatomaʼpa nerokon te naʼna ma, amukon roten epatomano eropa te naʼna oronge rorïpïo amu roten wokunamatopo tanokonme yeijïkon.​—Galatians 6:10.

Opoto Papa Karetarï weinio kinipianaʼtomaton naʼna, juʼpïa kïnapoponoʼpoaton naʼna. Opoto eiʼpiopïn kanome woʼchotaʼmatonon nero choʼpo tïpïanaʼtomarïkon se mandon. Morokon yako Jehoba weinio kïporiʼchomarïkon kïsepoaton, ‹moʼko juʼpïa apoponoʼponen [Yopotorï].› (2 Corinthians 1:3, 4) Choʼpo naʼna apokurume Opoto Papa Karetarïʼwa kurangon topomïngon wopïrïman ekarichïʼpo ekarichïrï ma moʼkaron uwaro tïwoʼpoʼtoʼkon ekanoʼnamonʼwa. Opoto Papaʼwa Yopotomarïʼwa sherïmero ijomboro kariʼnia yeʼtunanoʼponamon, chotaʼmaponamon emimiarïpïa upuʼpoan naʼna iʼyainie.​—Revelation 21:4.

• Òtï Jehoba poko Wòrupïatonon epatomano koí opatomano ïrï poko iʼyainie opoto eiʼpiopïngon weíʼpioto?

• Òtïkon poko moʼkaron tonure òtï eiʼpiopïn patoʼmanangonïmbo panaʼtomano naʼna Opoto Papa Karetarï weinio?