Opoto Papa Karetarïʼwa tokarishe yeíʼpiombo ma Jesas rombïʼpopa paʼpopo amukonïmbo yekenanangonïmboro iʼchorïpïo roten òmepatononme yeijï mangon, Opoto Papa Karetarï tanokon ipioronokon anïʼmarïpïa iʼyainie. (Acts 20:29, 30) Koí yatï, moro paʼmero tïweiyepa ma. Tïʼkeimiaʼmapa Jesasʼwa òmepatoʼkon iʼyainie ma moʼkaron iʼchorïpïo roten wòkunamatononʼwa òmepatoʼkon maro. Moro paʼmero wokanoʼpotonon roten Krais wekenanamon wotapïimiangaʼpombo ma. (2 Timothy 4:3, 4) Neiara erome kïsupusaton ipioro Opoto Papa Karetarïʼwa òmepano uputïʼpopa eropa kïʼwainie?

Jehobaʼwa moro ipiorono upuʼpotopopa eropa tïwopoye yeíʼpio ma. ‹Moro iʼmiatïrïpïa kuriʼchanorï yako moro ipiorono uputïrï niemban kïneʼchamba,› tïka Opoto Papa weíʼpiombo ma. (Daniel 12:4) Moro siricho 1870 yako, asiʼcho amukon moro ipiorono upiniamonʼwa tupuse yeíʼpio ma chosichonïmboʼwa Opoto Papa Karetarï poko òmepatoʼkon apïmie iʼchorïpïo roten yeijï. Ijokero te, Opoto Papa Karetarïʼwa òmepatoʼkon ne eporïpïa poko tïwotapoiye yeíshangonïmbo ma. Moro poko Jehobaʼwa topatomapa yeíshan ma oʼtone Tïkaretarï wïkarï uputïrï poko.

Taʼro uputïsangon kariʼniakon tuwarome Opoto Papa Karetarï poko tïwòmepaʼmainie mandon. Opoto Papa Karetarï poko Wòmepatonon me moan ro Jehoba poko Wòrupïatonon koʼmatoʼkonïmbo tïweiye ma. Erome neiara moʼkaron wòmepaʼmasan paʼme roropa naʼna Opoto Papa Karetarï poko kïnòmepano. Òʼwin paijo meʼme Opoto Papa Karetarï poko uputïse tïweʼchoʼkonïmbo poko tïwòrupïaʼmainie mandon. Tope pore tïʼwainie uputïrï aʼta, amukon roten verse-kon takure ekariʼniamon iʼyainie tupiʼmia ma. Tïwotupichoʼkonïmbo uputïʼmaʼpo mero tïʼwainie, tïaʼroro Opoto Papa Karetarï tanokon wòmepatoʼkon paʼmero aʼta, tïmeroʼma iʼyainie ma kareta poko. Moro paʼmero joke tuputïʼmapa eropa iʼyainie ma ipioro Opoto Papa ètï poko, iʼya Yopotomarï poko, òtï se eropa yeijï kariʼnia ekataka, nonoʼwa eropa. Ipioro eropa tupusepa iʼyainie ma jombïʼmasan poko, awomïʼmarïkomba poko eropa. Morokon ipioronokon uputïʼmaʼpoʼwa topatomainiepa mandon apïmie iʼchorïpïo roten emepaʼmatoʼkonïmbo weinio, iʼchorïpïo roten weʼchonon omenanokonïmbo weinio eropa.​—John 8:31, 32.

Moro siricho 1879 yako, nono wararo moro ipiorono tupuʼposepa yeijï tupuse moʼkaron Opoto Papa Karetarï poko Wòmepatononʼwa ma. Moro siricho ta joke, tïwotapoiye mandon moro kareta èkïrïrï poko, erome ponaroro naʼna nèkïrïrï, The Watchtower Announcing Jehovahʼs Kingdom (Moro Watchtower Jehobaʼwa Yopotomarï poko Ekariʼnien). Erome naʼna Opoto Papa Karetarï tanokon ipioronokon upuʼpoan amukonʼwa 240 koʼpo weʼchoʼkon ta, 750 koʼpo amukon meʼme ourananokon ta. Ènï uwapo uwaro ènï paʼme niemban pane roten ipioro uputïrï tïweiye ma!

• Jesas rombïʼpopa paʼpopo, oʼto tïweiyepa Opoto Papa Karetarï tanokon ipioronokon weíʼpio na?

• Òtï naʼna epatomai Opoto Papa Euran tanokon ipioronokon uputïrïpïa poko eropa?