Moʼkaron koromonenokonïmbo Krais wekenanamon tïwòmepatoʼkonʼme tïwoseʼnanoʼpotïrïkon yako yaretatoʼkonïmbone ma, kïnopekasaton eropa, Opoto Papa Karetarï èrupïaton, pioko eropa kïnòrupïaton. (1 Corinthians 14:26) Morokon paʼme roropa erokonme wòmepa naʼna woseʼnanoʼpotïrï po ma.

Morokon wòmepatoʼkon Opoto Papa Karetarï tanokon morokon, juʼpïa eropa omano ta opatomatopa ma. Ekemaʼpa sundaka Jehoba poʼchorïkon kïnoseʼnanoʼposaton oseʼra hour paʼme Opoto Papa Karetarï weiniono ouranano etatoʼme, opatomato pane roten weʼchonon omano ta erokon kuriʼchakon yako. Opoto Papa Karetarï ta moʼko ouranano ekariʼnienʼwa èrupïarï yako naʼna kiniyekenano eropa tïkaretarï ta. Ijombote moro paʼpopo òʼwin hour paʼme «Watchtower» poko wòmepano kïnïsan, moro ta toyuʼpomïngon èyusaton èyukusangonïmboro. Ènïkon Watchtower tanokon poko naʼna wòmeparï naʼna epatomano neiara Opoto Papa Karetarï tanokon aʼkuru poko naʼna emamïrï ta. Ijo meʼme poko ijako meʼme naʼna kïnòmepano 110,000 koʼpo tïmonge tïwoseʼnanoʼtoʼkon weíʼpio wararo.

Topatomarï epoan naʼna juʼpïa nekatu òmepanamonme tïweijï poko. Sundaka uwapo eropa naʼna kïnosepoan òruwa icha weʼchoto wòmepatoʼkon eta, ètïme weʼchoto Krais Wekenanamonme Komamïrïkon maro Kïwòrupïarïkon. Moro ekemaʼpa nuno kïneporïkon Kïwoseʼnanoʼtoʼkon po Kïwòmepatoʼkon Karetarï tanokon tokarishangon me ma. Topenamon Òtïkon Opoto Papa Karetarï weinionokon ètïme weʼchoto ta, moro sundaka ta Opoto Papa Karetarï ta uwapo tòrupïamïnme niondaʼpo mondo ma. Èrupïaʼmaʼpo oʼto ichaʼpome yeijï ekarichïrï joke ekariʼniamonʼwa ambore kïnupuʼpoan naʼnaʼwa. Tope Owemaminiako moro Wòrupïano Emamin ta ètïme weʼchotoʼno ijombo kïnïsan, neiara moro wòrupïano emamin ta amukonʼwa Opoto Papa Karetarï ekarichïrï enepoan. Morokon wòmepano enenenme niondaʼpo naʼna epatomano neiara juʼpïa nekatu tïwosèrupïarï maro tïnekarichïrï uputïrï poko naʼnaʼwa. (1 Timothy 4:13) Ijomboromenekon yeʼchopo, Krais Wekenanamonme Komamirïkon ètïme weʼchoto te, kòmepaton neiara komamïrïkon ta Opoto Papa Karetarï tanokon aʼkuru poko. Ènï ta ro eropa toyusamon mondo ma, ambore nekatu Opoto Papa Karetarï tanokon upuʼpotoʼkon kïʼwainie.

Wòmepa naʼna woseporïʼwa owïtoʼpoto choʼpo oyapoamba juʼpïa pane roten Opoto Papa Karetarï poko owemeparï eporï oʼwa.​—Isaiah 54:13.

• Òtïkon poko mòmepanopa wòmepa Jehoba poko Wòrupïatonon woseʼnanoʼtoʼkonʼwa oyïtoʼpoto?

• Nei naʼna woseporïʼwa owïtose erombo weinio ma?