Menean ro ènï karetaʼme ta neiara kurangonme Jehoba poko Wòrupïatonon wòʼchuraʼmasan wòmepa tïtorïkon yako tïwoseʼnanoʼtoʼkonʼwa? Oʼtonoʼme naʼna nòʼchuraʼmano morokonʼwa tïtorï yako?

Nusenome Opoto Papa enerï eneporï moro naʼnaʼwa. Opoto Papa neiara kïʼkuʼpoinie kïwonerïkon oneneʼpane rorïpïo ma. (1 Samuel 16:7) Morote, iʼya wòkunama tïtorï yako te, nusenome enerï enepose naʼna ma juʼpïa tïwòʼchuramarï ke. Moro paʼme eropa naʼna kïnenepoan tïwatonon Jehobaʼwanokon wotaporïkon po tïwoʼpotïrï. Amu weʼchopo yopotorï poʼponaka kïtosando kombaijo ourana iʼya, koʼye neroten juʼpïa kïsewoʼmïndoaton yopotome yeijï ke. Ijo paʼme roropa, juʼpïa kïnewoʼmïndoan naʼna tïwoseʼnanoʼtopoʼwa wòmepa tïtorï yako nusenome ‹moʼko oronoman Yopoto› Jehoba enerï ke, moro iʼya wòkunamatopo èʼtï nuse enerï ke eropa.​—1 Timothy 1:17.

Tïwòmepatoʼkon paʼme tomamïrï enepoan naʼna. Opoto Papa Karetarï Krais wekenanamon apokumano ‹juʼpïa yoiyoʼmïndorïkon poko, tïwònumingakamonme.› (1 Timothy 2:9, 10) Kïwosenepotoʼkonʼme kapïn joke kïsewoʼmïndoaton, ijoseʼpa amukon wowaʼnoʼtoʼme kapïn kïpokoinie. Takararamon pane roten aʼkuru seʼpapai kïtaton, tïkapere pane kïpokoinie weʼchonon, ijoseʼpa eʼtamene pane piïmïrï weʼchonon. ‹Tïwònumingakamonme› eropa juʼpïa wonetonon woʼmïnanokon kïsapoiaton, amumbome roten ewoʼmïndoʼpa joke kïtaton. Ènïpangon Opoto Papa Karetarïʼwa òmepatoʼkon wekenarï yako kïʼwainie amukon meʼme kurangon woʼmïnanokon kïsaʼkuatomba. Òrupïaʼpa kïaʼtainie rorïpïo joke amukonʼwa, kurangonme kïwewoʼmïndorïkon ‹poʼchome moʼko kopatomanamopa Opoto Papaʼwa òmepatokon› enepoan iʼyainie, nusenome yeijï eropa. (Titus 2:10; 1 Peter 2:12) Tïwoseʼnanoʼtoʼkonʼwa wòmepa tïtorï yako naʼna, juʼpïa naʼna wewoʼmïndorï òtï amu nuse tonesan me Jehobaʼwa wòkunamano weijï enepoan amukonʼwa.

Owoʼmï oporoʼkanen wòmepa owïtorï weinio naʼna woseʼnanoʼtopoʼwa. Topenen me tïweijï seʼpa kïwoʼmïkon ma kïtotoʼkonʼme, churiʼpia te tïweíshe ma, tïwonapore eropa.

• Oʼtonoʼme tonesepa kïʼwainie na neiara kïwewoʼmïndorïkon Opoto Papaʼwa wòkunama kïtorïkon yako?

• Neiʼpiangon Opoto Papa Karetarï tanokon wòmepatoʼkomba kòmepaton neiara kïwewoʼmïndoseinie kïweijïkon poko, neiara kïwoʼchuraʼmaseinie kïweijïkon poko eropa?