Opoto Papaʼwa Abraham payangonïmbo aembo tïye ma tïʼwanokonme, apïimie eropa òmenanokon meroʼmaʼpo tïrïʼma iʼya iʼyainie ma. Moʼkaron tïʼwanokon iʼya tïkoʼma «Israel» me ma, moʼkaron neroʼkon eropa iʼya tïye ma moro ipiorono wòkunamatopo maro Tïkaretarï enanamonme. (Psalm 147:19, 20) Ijomboro jòke, amukon meʼme wèʼchopo tanokon juʼpïa neròten tomamïrïkon epoatomba Israel pato.​—Èrupïako Genesis 22:18.

Tïpïoko wòrupïatononme Opoto Papaʼwa Israel tanuinie ma. Neiara emamïʼmasangonïmbo poko kïnotupusan juʼpïapa amukon emamïrï Opoto Papaʼwa òmepatoʼkon paʼme aʼtainie. (Deuteronomy 4:6) Ijòkero, Israel pato amukon ròten kariʼniakon nòʼkïme Opoto Papa weijï upusatomba.​—Èrupïako Isaiah 43:10, 12.

Aije nasen pòre te, Israel tïwoiyenonoʼpopa Opoto Papaʼwa yèíshan ma, ijòkero Jesas Krais wekenanamon iʼya tïye ma iʼpietakangonme. (Matthew 21:43; 23:37, 38) Erome jòke, Israel ʼpetakangonme taʼronokon Jesas Krais wekenanamon Jehoba poko wòrupïatononme mandon.​—Èrupïako Acts 15:14, 17.

Jesasʼwa aembo tïwekenanamon tïrïʼmainie ma moro juʼpïn ouranano poko yòrupïatoʼkonʼme ijomboro wèʼchopo tanokonʼwa, epatomatoʼkonʼme iʼyainie tïʼwa òmepatoʼkon paʼme yeijïkon poko. (Matthew 10:7, 11; 24:14; 28:19, 20) Ènï omaminiano eromero iʼmiaʼporopa ma, ero yaan neròten wèʼchopo emèrïkonïmbo ʼmatïrïpïa ta. Kariʼnia emamïrï wotapòíʼpioporo, eromene Jehoba apïimie pane ròten amukon meʼme wèʼchopo tanokon eʼnanosan òʼwin otasaka paʼme moro ipiorono wòkunamatopo taka. (Revelation 7:9, 10) Taʼronokon Jesas Krais wekenanamon aembo tïye mandon osekaro yotapokumatoʼkonʼme, yòsepatomatoʼkonʼme eropa. Wèʼchopo wararo osepaʼme Opoto Papa Karetarï poko kïnòmepaton tïwòseʼnanoʼtoʼkon po.​—Èrupïako Hebrews 10:24, 25.

Moro 1870 siricho yakoinie, asiʼcho amukon Opoto Papa Karetarï poko wòmepatonon tïwotapoiye mandon morokon penaro pane ròten utaʼkaʼmasamba Opoto Papa Karetarï tanokon ipioronokon epòrï poko eropa. Kïnupusatomba Jesasʼwa tïwekenanamon aembo ïrïʼmaʼpombo yòrupïatoʼkonʼme, ijòkero nono wararo wòrupïano omaminiano poko eropa tïwotapoiye mandon. Moro siricho 1931 yako, tòtïkon me iʼyainie tanuinie ma Jehoba poko Wòrupïatonon.​—Èrupïako Acts 1:8; 2:1, 4; 5:42.

Jesas rombïʼpopa paʼpopo, nono wararo Jehoba poko wòrupïatonon enenamon mondopa tïweiye mandon. Moan ro te, Jesas ïnamon ro moʼkaron tïyopotorïkonme. (Acts 16:4, 5) Erome penaro yako yèíʼpiombo paʼme roropa ma, nono wararo Jehoba poko wòrupïatonon emamin enenamon mondo eropa mandon. Moan ro enenamon Opoto Papa Karetarï weinio karetakon èkïrïrï èʼtïkon enenamonme mandon.Kinimieroaton, kïnekainiaton eropa 600 koʼpo amukon meʼme ourananokon ta. Ijòkero, ero paʼmero moʼkaron nono wararo Jehoba poko wòrupïatonon emamin enenamon Opoto Papa Karetarï weinio 100,000 koʼpo Jehoba poko Wòrupïatonon wòseʼnanoʼtoʼkon tanokonʼwa apokumarïkon ïaton, oʼto tïwèísheinie yeijïkon ekarishaton eropa iʼyainie. Yòseʼnanoʼtoʼkon wararo juʼpïa Opoto Papa Karetarï poko uputïʼmanangonïmbo kariʼniakon enenamonme mandon. Choʼpo tapokurukonme Opoto Papa kapararïkon enèrïkon ta kïnepatomaton.​—Èrupïako 1 Peter 5:2, 3.

Jehoba poko Wòrupïatonon aembo tïrïʼmainie mandon moro juʼpïn ouranano poko yòrupïatoʼkonʼme, Jesas wekenanamonme yeijïkon poko kariʼniakon emepatoʼkonʼme. Moʼkaron wòrupïa Jesas nimiokïʼmasangonïmbo paʼme, naʼna oʼto wararo eropa kïnòrupïano. (Acts 20:20) Opoto Papa Karetarï tanokon ipiorono taʼro tapokurume enenamon emepaseinie tïweijï ekarishan naʼna iyainie. Jehoba poko Wòrupïatonon me te, wòrupïano emaminʼwa ròten aembo ïrïʼmasan kapïn naʼna. Òʼwin otasaka paʼme naʼna ma, choʼpo tapokurume naʼna enenen naʼna Yumï me ma. Juʼpïa osekaro naʼna kïnosenean otasakame. (2 Thessalonians 1:3) Jehoba pòʼchòrïkon aembo ïrïsan ke Opoto Papa ïpotòʼme, amukon epatomatòʼme eropa, paʼpororo nono kuʼponokon otasakakon koʼpo towaʼporamome mandon.​—Èrupïako Psalm 33:12; Acts 20:35.