Kariʼniakonʼwa Jehobaʼwa ènï nono tïye yèíʼpio ma. Kïwèʼchoʼkon moro. Ijòkero, moʼkaron koromonenokonïmbo kariʼnia maro worïi, Adam maro Eve, kapu ta yotapïimiangatoʼkonʼme kapïn tòkïrïʼmainie mandon. Opoto Papaʼwa tòkïrïʼmainie ònèpïngon tïpïòʼchòrïkon wèíʼpio ma kapu ta emandoʼkonʼme. (Job 38:4, 7) Opoto Papaʼwa te, moʼko koromoneno kariʼnia tïye ma amu poʼcho neròten mainiaʼme ta, Eden me tòʼtïnen. (Genesis 2:15-17) Tïʼmïakon man maro oronome tomambòre nono kuʼpo emamïrïkon man Jehobaʼwa tïye ma.​—Èrupïako Psalm 37:29; 115:16.

Koromonene, Eden neroʼkon amu poʼcho neròten wèʼchopo me tïweiye ma. Moʼkaron koromonenokonïmbo kariʼnia maro worïiʼya ènï nono aʼnoʼkarï manombo tïweiye ma tïʼmïakon ke. Kòí yatï jòke, tïaʼroro moro nono enenamome kïneiaton, poʼcho wèʼchopo me kïnèkïrïatomba. (Genesis 1:28) Asi moro nono utapïrïpïa kapïn ma. Oronomero kariʼnia wèʼchopo me ma.​—Èrupïako Psalm 104:5.

Adam maro Eve Opoto Papa onamïʼchaʼpapai tïweiye mandon, ijòkero Jehobaʼwa tïpïaʼkanoʼpoʼmapoiniepa mandon moro poʼcho mainiaʼme weinio. Moro poʼcho wèʼchopo tutasepa yèíʼpio ma, amuro kariʼniaʼwa jamarïpïa kapïn eropa tïweiye ma. Opoto Papa Karetarï ïngano: ‹Moro nono tïyepa yèíʼpio ma moʼkaron yaangon einiaka.›—Job 9:24.​—Èrupïako Genesis 3:23, 24.

Koromonene kariʼniaʼwa ishe tïwèʼchopombo onèkïrïʼpïapai jòke Jehoba tïweiye na? Uwane! Paʼporo koʼpono pòripiïn moʼko. Ishe tïwèʼchopo onèkïrïʼpïapai ròten yeijï kapïn ma. (Isaiah 45:18) Ishe tïwèíʼpiombo paʼmero kariʼnia emamïrï ïamba eropa.​—Èrupïako Psalm 37:11, 34.

Jesasʼwa yopotomarï yakoro Opoto Papa nanumïʼpïo yopotome, ènï nono poʼcho wèʼchopo me kïneiamba eropa. Armageddon me tïkoʼmamïn woóno ta, Jesas moʼkaron ònèpïngon Opoto Papa pòʼchòrïkon aroan tïmïaro paʼpororo moʼkaron Opoto Papa yenonoʼnamon woʼmapa. Ijombo te, Jesas Setanïmbo mïʼmïanomba, kïnemanomba moro piuru opopïn taka 1,000 siricho paʼme. Opoto  Papa pòʼchòrïkon te, moro woóno weinio kïnòsepatomatomba moro kombaijo Jesas oʼto tïwèísheinie yeijïkon upuʼpoan iyainie, kiniyariyaʼtoaton eropa. Ijombo te, oronome tomambòre kïnemainiatomba amu shèrï wèʼchopo ta ènï nono kuʼpo.​—Èrupïako Revelation 20:1-3; 21:3, 4.

Neiako Opoto Papa yaame weiniokonïmbo poroʼkanomba? Jesasʼwa sengepa iʼmiatïrï weijï ‹upuʼpotopo› amu tïye ma. Eromero neiara ènï wèʼchopo ta òtïkon weijï kariʼnia ʼmaʼkanomba pioropïʼpïapai aʼta. Ènïkon poko eropa kïsupusaton ‹ènï wèʼchopo emèrïkonïmbo ʼmatïrï› ta pa komamïrïkon.​—Èrupïako Matthew 24:3, 7-14, 21, 22.

Jesas ijomboro woʼchotaʼmanombo poroʼkanomba 1,000 siricho nono yopotomarï yakoro tïʼwa kapu weiniombo. (Isaiah 9:6, 7; 11:9) Yopotome kapïn roʼkon te Jesas ma, amu Priest me eropa ma, kariʼnia ekatakanome Opoto Papa poʼponaka. Moʼko me tïweijï ke, moʼkaron tapokurume Opoto Papa enenamon wotanïʼmasan èmimianomba. Ijòkero Jesas pato tanïʼke weiniombo, tambarame weiniombo, romoʼnombo eropa poroʼkanomba Opoto Papa.​—Èrupïako Isaiah 25:8; 33:24.

Moʼkaron Opoto Papa amïʼchanamon kariʼniakon kïnemainiatomba moro shèrï wèʼchopo ta. (1 John 2:17) Tïwòsemepaporamon kariʼniakon upi Jesasʼwa tïwekenanamon tïmïose ma, emepatoʼkonʼme iʼyainie neiara aʼtainie Opoto Papaʼwa apoijïkomba tïʼwanokonme. Eromero, apïimie pane ròten aembo kariʼniakon ïan Jehoba emandoʼkonʼme moro woʼtotoman poʼcho shèrï wèʼchopo ta. (Zephaniah 2:3) Jehoba poko Wòrupïatonon Wòseʼnanoʼtoʼkon po, amukon kïnòmepaton juʼpïngon nekatu mïinionanokon maro yumïnanokon me tïweijïkon poko, juʼpïngon nekatu pïtïanokon maro mïsanonanokon me tïweijïkon poko eropa. Iʼmiakon tïtuwaroʼmanangon maroro kïnòkunamaton, paʼpororo kïnòmepaton neiara ambòre nekatu juʼpïa tomamïrïkon ïrïʼmarïpïa poko moro juʼpïn ourananoʼwa.​—Èrupïako Micah 4:1-4.