Paʼpororo wòkunamatoʼkon ta mondopa taʼro Opoto Papaʼwa tïwèíshangon mandon. Juʼpïn ouranano me ma Opoto Papaʼwa moʼkaron pangon enèrï, tuwaro eropa piokoinie yeijï. Morote, choʼpo neròten yaame yeijï, amukonïmboʼwa tïwòkunamatoʼkon aʼkuru yaangon pane ròten òtïkon poko tïwèʼchoʼkonʼme. (2 Corinthians 4:3, 4; 11:13-15) Neiara ènï wèʼchopo ta òtïkon weijï ekariʼniangonʼwa tokarishe yèíʼpio ma amukonïmbo wòkunamatopo tanokon maroro opotonon woónokon ta yeijïkon, amukonïmbo tïwatonon kapïn ʼmakaʼmatomba maroro. Amukonïmbo wowaton eropa chïʼkatoʼkonʼme tïʼwainie, iʼmiakonïmbo poko eropa kïnoiniambaton, kinipiokonomaʼmatomba maroro. Ènïkon ro choʼpo neròten moʼkaron taʼro Opoto Papaʼwanokon apoponoʼpoan yaame.​—Èrupïako Matthew 24:3-5, 11, 12.

Moro ipiorono wòkunamano nuse Opoto Papa ïan, moro iʼchòrïpïono wòkunamano te, choʼpo neròten atoʼkepa ma. Opoto Papa Karetarï tanokon òmepatoʼkon poko òmepatoʼpapai mandon, ijoʼmï jòke, iʼchòrïpïo ròten Opoto Papa poko òmepato mandon, jombïʼmasan poko eropa. Jehoba te, ipioro tïpïoko kariʼniakonʼwa tuputïse ma.​—Èrupïako Ezekiel 18:4; 1 Timothy 2:3-5.

Tapokurume Opoto Papa weijï ekariʼniamon wòkunamatonon, morote Setan wèʼchopo ròrïpïo tapokurume enenamonʼwa, èmuʼmarï kapïn Opoto Papa ma. (James 4:4) Paʼpororo iʼchòrïpïono wòkunamatoʼkon koʼmano Opoto Papa Karetarï ‹moʼko Opoto Babylon› me. Penaro yako èíʼpiombo amenari Babylon po iʼchòrïpïono wòkunamano apoiʼpioʼpombo ma, Noah yako èíʼpiombo tuna kunu paʼpo po. Shèrïmero, Opoto Papa kariʼnia èmuʼmanamon wòkunamatoʼkon, kariʼnia poko woiniambatonon, ʼmaʼkanomba mondokon pane ròten.​—Èrupïako Revelation 17:1, 2, 5, 16, 17; 18:8.

 Mondo noro te, kurangon ourananokon ma. Jehoba chuwarongepïʼpapai moʼkaron taʼro tïʼwa tïwèíshangon kariʼniakon pona ma, moʼkaron nono wararo iʼchòrïpïono wòkunamatoʼkon ta noro wèʼchonon. Moro ipiorono ke moʼkaron watonon emepapoan tïʼwa yèʼchoʼkonʼme.​—Èrupïako Micah 4:2, 5.

Jehoba apokurume moʼkaron ipioronokon maro juʼpïngon òtïkon apokurume wèʼchonon ma, tuwaro eropa pionainie ma. Kïnapokumaton yòsiʼmiatoʼkonʼme morokon iʼchòrïpïono wòkunamatoʼkon nòrïpïa poko iʼyainie. Tapokurume Opoto Papa enenamon tïwèísheinie tïweijïkon ta kïneʼpetakamaton atoʼkangon òtïkon weinio ïpotoʼme tïʼwainie.​—Èrupïako Revelation 18:4.

Jesas rombïʼpïopa paʼpo ta, taʼro Opoto Papaʼwa tïwèíshangon kariʼniakon choʼpo tïwèíʼmiainie mandon morokon kurangon ourananokon Opoto Papaʼwa òmepatoʼkon ekarichïrï yako Jesas pòʼchòrïkonïmboʼwa. Amumeʼno omano poko tïwòmepaʼmainie mandon Jehoba weinio, ambòre towaʼpòre tomamïrïkon poko, mondopa kurangon òtïkon tïneporïmangon weijï uputïrï ke. Juʼpïn kïwòmepatoʼkon yeinionie ma koromone Jehoba ïrïʼpïombo ke iʼyainie, morokon kurangon ourananokon amïʼchaʼpomboto iʼyainie.​—Èrupïako 1 Thessalonians 1:8, 9; 2:13.

Jehoba moʼkaron iʼchòrïpïono wòkunamatopo weinio oʼkaʼmasamba poko choʼpo kïneian tïʼwa wòkunamatononme yèíʼmiasamba mero. Jehoba amïʼchaʼpoto oʼwa pianarïme meiya, amukon eropa juʼpïngon neròten Jehobaʼwa wòkunamatonon asakarïkonme meiya, oronome owemamïrï eropa mepoa.​—Èrupïako Mark 10:29, 30; 2 Corinthians 6:17, 18.

Iʼchòrïpïono wòkunamatoʼkon ʼmakarïpïa juʼpïn neròten ouranano moro. Kariʼnia poko woiniambanombo kombaijo kinipiorosamba nono wararo. Ambòre iʼchòrïpïono wòkunamatoʼkonʼwa kariʼnia èmuʼmarï kapïn kïneian, tïpïopai kariʼniakon ïrï kapïn eropa iʼyainie ma. Paʼporo moro yako omandonon òʼwin otasakame kïnòkunamaton moʼko òʼwin ipiorono Opoto Papaʼwa.​—Èrupïako Revelation 18:20, 21; 21:3, 4.