Jesas okopaiʼmieme kuriʼcha tïpïanarï Lazarus rombïʼpopa paʼpopo, tïtunda yèíʼpio Bethanyʼwa ma, Jerusalem ponarono wèʼchopo. Ijombote, enaʼtïkonïmbo Martha maro Mary maro unandopomboʼwa tïto ma. Penarone watï chundaʼmasando apïimie amukon nòseʼnanòpïʼmaton moroʼwa. Ijoʼnare choʼpo neròten Martha maro Mary nèíʼmiaton Lazarus erenakaʼpombotopa eropa Jesasʼwa jombïʼpopa weiniombo!​—Èrupïako John 11:21-24, 38-44.

Moro uwaporo te Martha, mo ʼkaron jombïʼmasan poko moro juʼpïn ouranano upusamba, Jehobaʼwa awongaʼmarïkomba eropa emandoʼkonʼme nono kuʼpo.​—Èrupïako Job 14:14, 15.

Nono weinio kariʼnia tòkïrï yèíʼpiombo ma. (Genesis 2:7; 3:19) Tokatone watïpai kïtaton. Òtïro jòke, tònure wèʼchoto epaʼkaʼpapai kïweinioinie ma kïrombïsandopa. Kïrombïsandopa kusakurukon maroro kinijomosamba, ijòkero ambòre kïwònumingarïkon kapïn ma. Ijòkero Lazarus oʼto kaʼparo tïrombïʼpombopa poko tïweiye ma, jombïʼmasan kombaijo òtïro ònuputïʼpïa mandon.​—Èrupïako Psalm 146:4; Ecclesiastes 9:5, 6, 10.

Opoto Papa waʼto ta kariʼnia onichotaʼmapoʼpapai ma jombïʼpïopa paʼpopo. Ijòkero, moro paʼme tauro pioko wonapimiano ròten moro, iʼchòrïpïo neròten òmepatopo, Charetarï kombaijo tuwaroʼpapai jombïʼmasan ekarishan. Jombïʼmasan koroʼkarï poko Opoto Papa wònumingarï kapïn maroro ma,  ijòkero moro paʼme tauro tïpïoko choʼporo pane ròten kïnereʼkoamba.​—Èrupïako Jeremiah 7:31.

Eneko moro piʼchaʼme Neiara amu tïrombïʼpotopa na?

Jombïʼmasan euranarïkon kapïn ma, ijòseʼpa òtï etarï kapïn iʼyainie ma. (Psalm115:17) Morote, amukonïmbo otanïʼmasamba ònèpïngon Opoto Papa pòʼchòrïkonïmbo, yaame neròten mandon, ambïako kariʼniakonʼwa kïneuranaton jombïʼmasamba ekatongonïmbome tokanoʼtoʼkonʼme. (2 Peter 2:4) Jehoba kïwòturupïorïkon seʼpapai pïaianʼwa ma jombïʼpïo eurananoʼpotòʼme kïmïaroinie iʼyainie.​—Èrupïako Deuteronomy 18:10, 11.

Apïimie koʼpo jombïʼmasan awongaʼmanopa Jehoba emandoʼkonʼme eropa nono kuʼpo. Amukonïmbo Opoto Papa onuputïʼpïa èíʼmiasan maroro kïnawomïʼmatomba, moʼkaron yaame emèrïkon èíʼmiasangonïmbo eropa.​—Èrupïako Luke 23:43; Acts 24:15.

Moʼkaron awongaʼmasamba ijombo ipioro kïnòmepaton Opoto Papa poko, Jesas poko eropa tïwotamïʼcharïkon ïaton euran paʼme tïweijïkon ke. (Revelation 20:11-13) Moʼkaron awongaʼmasamba, juʼpïa wèʼchonon, oronomero tomambòre kïnemainiatomba nono kuʼpo.​—Èrupïako John 5:28, 29.

Opoto Papaʼwa jombïʼmasan nepòrï mondo tïpo yèíʼpio ma Tïmuru eneʼpoʼpombo ke tïʼwa kokatakainie jomoʼtòʼme. Ijòkero, moʼkaron jombïʼmasan awongaʼmarïpïa Jehoba apokurume kïweijïkon upuʼpoan, juʼpïa kïpïokoinie yeiji, epòrï taro kapïn kïweijïkon seʼme. Tomamïrïkonʼwa moʼkaron jombïʼmasan awongaʼmaʼpopa mero eropa emandoʼkonʼme, nòʼkïne enese ma?​—Èrupïako John 3:16; Romans 6:23.