Kariʼnia paʼme kapïn, sipiyume tïwomarï uwapo nono kuʼpo Jesas kapu ta tomamïʼma ma amu ònèpïnme. (John 8:23) Koromonene Opoto Papa nèkïrïʼpombo moʼko. Moʼkoʼwaro ijomboro amukon ròten òtïkon èkïrïrï poko Opoto Papa topatomaʼma ma. Moʼko neroʼkon osekero Jehoba nèkïrïʼpombo, ijòkero juʼpïapa choʼmarï ma ‹moʼko owiʼniombo-oseke nièkïrïʼpombo Imiuru› me. (John 1:14) Opoto Papa ekataka ouranatotome Jesas tïweiye ma, ijòkero ‹Euran› me tïkoʼma ma.​—Èrupïako Proverbs 8:22, 23, 30; Colossians 1:15, 16.

Opoto Papaʼwa nono kuʼpo naka Tïmuru toneʼpo yèíʼpiombo ma. Kapu ta emamïrïmbo tïyepa iʼya ma amu kariʼnia marono kapïn Jew worïijï ʼmeyèʼnï taka, Mary me tòtïnen. Kariʼnia kapïn jòke, Jesas yumïme tïweiye ma. (Luke 1:30-35) Nono kuʼpo naka Jesas tïwose ma (1) ipioro òmepatòʼme Opoto Papa poko, (2) kïwòmepatoʼkonʼme tïpïoko neiara Opoto Papa ishe yèʼchoʼkon poko kïweijïkon upuʼtòʼme kïʼwainie oronge tope òtïkon aʼta kïpïokoinie, (3) otanïʼmapïn tomamïrïmbo ïtòʼmepa tïʼwa ‹amu opètïnano› me.​—Èrupïako Matthew 20:28.

Amukonïmbo yako amu tïwomïn manombo kariʼnia nondarïpïa epètï topemase ma epemapòrï paʼmero. (Exodus 21:29, 30) Romoʼno maro tambarame weinio Opoto Papa ishe yèʼchopombo kapïn moro kariʼniaʼwanome. Neiara moro kïsupusaton? Opoto Papaʼwa tokarishe moʼko koromonenombo kariʼnia Adamʼwa yèíʼpiombo ma, moro Tïkaretarï nichoʼmarï «wotanïʼmaʼpo» taka yèíʼpioto, jombïrïpïa. Otanïʼmaʼpa Adam wèíʼpiomboto rïpïo jòke, asi jombïrï manombo kapïn rïpïo neijï. (Genesis 2:16, 17; 5:5) Opoto Papa Karetarïʼwa ekarichïrï paʼme, romoʼno ‹tïwepatopa› kariʼniakonʼwa ma Adam pato. Ijòkero, Adamʼwa ijomboro tïʼmïakonʼwa  wotanïʼmaʼpo tïpïatopa ma, moro wotanïʼmaʼpo epètï eropa, romoʼno. Kopemanamopa amu sepa jòke kïtaton kïnondatoʼkonʼmepa romoʼnoʼwa, Adam weinio kïnepòrïsan.​—Èrupïako Romans 5:12; 6:23.

Nòʼkï katu kopematomba kïrombïrïkon weinio kïmbokatoʼkonʼmepa? Kïrombïsando oseke kïwotanïʼmapòtïrikon epematopo moro. Amuro otanïʼmaʼpopa kariʼniaʼwa amukon ròten wotanïʼmasan epemarï kapïn ma.​—Èrupïako Psalm 49:7-9.

Kïpïaʼmeinie kapïn te, Jesas otanïʼmaʼpo kapïn moʼko. Ijòkero, yaame tïwèíʼmiaʼpo epètïme kapïn tïromose ma, yaan poko èíʼpiaro kombaijo tïweiye ma. Amukon yaame yèíʼmiasan poko te, Jesas tïromose ma. Opoto Papaʼwa choʼpo neròten tapokurume kariʼnia weijï tonepo ma tïmuru eneʼpoʼpombo ke tïʼwa kokatakainie jomoʼtòʼmepa. Jesasʼwa roropa tapokurume kïweijïkon tonepo ma Tïyumï amïʼchaʼpombo ke tïʼwa tomamïrïmbo ïtòʼmepa kïwotanïʼmaʼmasan poko.​—Èrupïako John 3:16; Romans 5:18, 19.

Eneko moro piʼchaʼme Oʼtonòʼme Jesas tïromose yèíʼpio na?

Nono kuʼpo tïwèíʼpiomboto Jesasʼwa tanïʼkamon tïkuraʼmaʼma ma, jombïʼmasan iʼya tawongaʼma ma, eiʼpioʼpa emamïrïkon ïponamon weinio eropa iʼya kariʼniakon topatomaʼma ma. Morokon pato ro iʼya tonepo ma oʼto tïweijï man ijomboro tamïʼchanamon kariʼniakon ekaʼtaka. (Matthew 15:30, 31; John 5:28) Jesus rombïʼpopa weiniombo te, Opoto Papaʼwa tawongapa yèíʼpio ma amu ònèpïnme. (1 Peter 3:18) Jesas ijombo tïwoimiomose Opoto Papa yaʼpòrï weinio ma, tïpïorï ponaroro iʼya tïaʼroro nono yopotòrïme. (Hebrews 10:12, 13) Eromero Jesas kapu ta kiniyopotomano, ènï ro juʼpïn ouranano ekarishaton ro te yekenanamon nono wararo.​—Èrupïako Daniel 7:13, 14; Matthew 24:14.

Shèrïmero Jesas, Yopotome, ijomboro woʼchotaʼmanokonïmbo èmimianopa, moʼkaron ïponangonïmbo eropa. Paʼpororo Jesas ta wotamïʼchatonon, euran paʼme tïweijïkon ke, tomambòre kïnemainiatomba amu poʼcho pane ròten shèrï wèʼchopo ta.​—Èrupïako Psalm 37:9-11.