Jesasʼwa tïwekenanamon tòmepaʼma yèíʼpiombo ma òʼwin ròten wòkunamatopo poko, moro ipiorono wòkunamatopo. Oronome omanoʼwa arone oma paʼme tokarishe iʼya ma. ‹Asi ròten amukon moro oma epoaton,› tïka Jesas ma. (Matthew 7:14) Ipiorono wòkunamano neroʼkon, Touran paʼme wèʼchoto, apoian Opoto Papa. Paʼpororo ipioro wòkunamatonon òʼwin otasaka paʼme mandon, òʼwin tïwòmepatoʼkon ta.​—Èrupïako John 4:23, 24; 14:6; Ephesians 4:4, 5.

Iʼchòrïpïo ròten Opoto Papa poko òmepanamonʼwa tïwekenanenme weinio anïʼmarïmamba tokarishe Jesasʼwa yèíʼpiombo ma. Ipioro wòkunamatonon paʼme ròrïpïo kïnoneaton. Krais wekenanamonme kïnòsekarishaton. Morote, moʼkaron watonon mupusapa iʼchòrïpïo ròten wèʼchononme. Neiara? Moro ipiorono wòkunamatopo tanokon neroʼkon kombaijo kurangon emèrïkonme ma, taʼronokon Krais wekenanamonme yeijïkon upuʼponamopa.​—Èrupïako Matthew 7:13-23.

Eneko ènïkon otoneinia upuʼtoʼkomba:

• Moro ipiorono wòkunamatopo tanokon Opoto Papa euran me ro Charetarï ïaton. Iʼya òmepatoʼkon paʼmero tomamïrïkon uʼkuaton. Ijòkero, moro ipiorono wòkunamatopo amumepa ma kariʼnia wònumingarïme weʼchonon wòkunamatoʼkon weinio. (Matthew 15:7- 9) Ipioro wòkunamatonon amume emamïʼpapai mandon tïwòrupïatoʼkon weinio.​—Èrupïako John 17:17; 2 Timothy 3:16, 17.

• Moro ipiorono wòkunamatopo tanokon nusenome pane ròten  Opoto Papa ètï Jehoba ïaton. Jesasʼwa nusenome pane ròten Opoto Papa ètï tïrïʼma ma ekaʼroʼmaʼpo ke tïʼwa. Opoto Papa uputïrï poko kariʼniakon topatomaʼma iʼya ma, tòmepaʼmainie eropa iʼya ma yòpekaʼtoʼkonʼme Opoto Papa ètï churiʼpia ïpòrïpïa poko. (Matthew 6:9) Moro owèʼchopo po katu, neiara ètï wèʼchonon wòkunamatopo tanokon Opoto Papa ètï ekaʼroaton amukonʼwa?​—Èrupïako John 17:26; Romans 10:13, 14.

• Moro ipiorono wòkunamatopo tanokon Opoto Papaʼwa yopotomarï poko kïnòrupïaton. Opoto Papaʼwa Jesas tïmïose yèíʼpiombo ma moro juʼpïn ouranano tïʼwa yopotomarï poko yòrupïatòʼme. Opoto Papaʼwa yopotomarï neroʼkon kariʼnia emamïrï kuraʼmanemepa ma. Tïrombïrïpïaʼwaro Jesas moro poko touranaʼma yèíʼpio ma. (Luke 4:43; 8:1; 23:42, 43) Moro poko eropa tïwekenanamon wòrupïarï iʼya tokarishe ma. Amu wòpïʼpïoto oʼwa owèrupïa Opoto Papaʼwa yopotomarï poko, neiara ètï wèʼchonon wòkunamatopo tano aʼta mekanosan?​—Èrupïako Matthew 24:14.

• Moro ipiorono wòkunamatopo tanokon ènï yaan pane ròten wèʼchopo weinio kapïn mandon. Yopotome tïweijïkon poko yopotonon wotapoʼkarïkon ta kapïn yeijïkon poko mupusapatomba, ijòseʼpa yoiyenònòpïrïkon oneʼwatomaʼpapai yeijïkon poko. (John 17:16; 18:36) Yoiyèʼtunanoʼpotoʼkon òtïkon onaʼkuʼpapai mandon, ijòseʼpa yaangon emèrïkon.​—Èrupïako James 4:4.

• Moro ipiorono wòkunamatopo tanokon taʼro otapokume osekaro yeijïkon juʼpïmboro kïnoneamba. Opoto Papa Karetarï weinio ro kïnòmepaton ijomboro amukon meʼme kariʼniakon juʼpïa enèrï poko tïʼwainie. Oronge ròrïpïo moʼkaron iʼchòrïpïo wòkunamatononʼwa choʼpo wèʼchopo tanokon woórïkon epatomarï, moʼkaron taʼronokon asi moro paʼme watïro mandon. (Micah 4:1-3) Taʼronokon Krais wekenanamon te, tomaminie mandon amukon epatomarï poko, amoʼmame eropa tïmïaronokonïmbo aʼkuaton amukon epatomatòʼme, apokumatoʼkonʼme eropa.​—Èrupïako John 13:34, 35; 1 John 4:20.

Neiara ètï wèʼchonon wòkunamatopo tanokon Opoto Papa Euran weinio neroʼkon òmepato nandon, nusenome pane ròten ètï ïaton, Opoto Papaʼwa yopotomarïʼwa neroʼkon eropa kariʼnia emamïrï kuraʼmarïpïa ekarishaton? Neiara ètï wèʼchonon wòkunamatopo tanokon tapokurukonme amukon weijï enepoaton, woónokon ta watïpai eropa nandon? Oʼto mïkano?​—Èrupïako 1 John 3:10-12.