Kòkïrïnamonïmbo kïkoʼpoinie pane ròten òtïkon upusan. Amu juʼpïn neròten Yumïnanome tïweijï ke tuwaro kïpïokoinie ma. Tïʼwa kïyopotomarïkon ʼtòrïpïo komandoʼkonʼme kapïn tòkïrï iʼya kïwèíshan ma. (Jeremiah 10:23) Ijowane amu iʼmiembo tïtuwaroʼmanangonʼwa tòmeparï sepa na, ijopaʼme roropa Opoto Papaʼwa kòmeparïkon sepa kïtaton juʼpïa komamïrïkon upuʼtòʼme kïʼwainie. (Isaiah 48:17, 18) Opoto Papa Karetarï tanokon wòmepatoʼkomba kurangon neròten niïrïʼmasan morokon kòmepatoʼkonʼme.​—Èrupïako 2 Timothy 3:16.

Jehobaʼwa oʼmatoʼkon, Charetarï tanokon wòmepatoʼkomba eropa, kòmepatomba juʼpïane komamïrïkon poko eromero, neiara eropa oronoman kurangon òtïkon epòrïpïa kïʼwainie penarone watï. Opoto Papaʼwa kòkïrïʼmasan kero iʼya kòmepatoʼkon amïʼcharï taropa kïtaton.​—Èrupïako Psalm 19:7, 11; Revelation 4:11.

Opoto Papa Karetarï weinio wòmepatoʼkomba ipioronokon morokon, ekemaʼpa ròten wotaʼkutonomba. Òmenano poko iʼya òmepatoʼkon te, amukonïmbo ròten òtïkonʼwa kïnotaʼkuan. (Deuteronomy 22:8) Kïwònumingarïkon taʼkuse kïʼwainie ma neiara Opoto Papa Karetarï weinio wòmepatoʼkomba aʼkuru upuʼtòʼme kïʼwainie òtïmbo ta ro. (Proverbs 2:10-12) Ijoʼmï tïre, Opoto Papa Karetarï omano amu juʼpïn pane ròten Opoto Papa weinionome yeijï ekarishan. Òtï hero amu kïwòmepatoʼkomba Moʼko weinio omano wòpïʼpïo uputïrï ke? Tuwaropa konapoaton oiyèʼtunanoʼpoʼpane kïweijïkon poko, amukon eropa ro oniyèʼtunanoʼpoʼpa kïweijïkon poko owero kïwèíshan po, ambïako komaminiatoʼkon po, kòʼtïkon po, owa kïtorïkon yako eropa.​—Èrupïako Acts 17:28.

Jesas tourana yèíʼpiombo ma oko ijomboro choʼponokon wòmepatoʼkomba  poko. Moro koromoneno kïnupuʼpoan oʼtonòʼme kariʼnia èkïrïʼpombo— Opoto Papa uputòʼme iʼya, tapokurume enetòʼme iʼya, oʼkaʼpame amïʼchatòʼme eropa iʼya. Ènïro koromoneno wòmepatopopa kòmepaton Opoto Papa nasen tonesepa yeijï oʼto kïweijïkon anundopo ta kïʼwainie. (Proverbs 3:6) Ènï wòmepatopopa paʼme wèʼchonon Opoto Papa panarïkonme kïneiaton, taʼro towaʼpòre tïweijïkon epoaton, oronome tomamïrïkon eropa.​—Èrupïako Matthew 22:36-38.

Moro oko yèʼchopo wòmepatopopa tomambòre komanganoʼpoatomba amukon maro. (1 Corinthians 13:4-7) Ènï oko yèʼchopo wòmepatopopa aʼkuru yako kïʼwainie, neiara Opoto Papa amukon poko yeijï paʼmero kïtaton.​—Èrupïako Matthew 7:12; 22:39, 40.

Opoto Papa Karetarï tanokon wòmepatoʼkomba mïinionanokon emepano, piïangon, iʼmiakon eropa otapokume yòsenèrïkon poko. (Colossians 3:12-14) Opoto Papa Karetarï amu eropa emamïrïkon ta juʼpïa epatomanamopa poko kïnemepaton​—maritimie wèíʼpio woiniondatopopa me kapïn yeijï.​—Èrupïako Genesis 2:24.

Opoto Papa Karetarïʼwa òmepatoʼkon aʼkuru otaʼkarïkapoʼpa pòre kïpoaton pïrata poko. Ijoʼmï jòke, omaminianoʼponangon ekemaʼpamboto ròten Opoto Papa Karetarï wïkarï paʼme wèʼchonon sene mandon tïpïòʼchòrïkonme, enapiʼmia wèʼchonon, mionaʼnon, tope omaminiatonon eropa. (Proverbs 10:4, 26; Hebrews 13:18) Tïsangonïmbo poko ròten aembo kïwotapòrïkon poko eropa kòmepaton Opoto Papa Karetarï, ijomboro kïrïanokon koʼpo eropa miaro osepaname kïweijïkon juʼpïa tonase yeijï poko.​—Èrupïako Matthew 6:24, 25, 33; 1 Timothy 6:8-10.

Opoto Papa Karetarï tanokon wòmepatoʼkomba aʼkuru yako kïʼwainie anïkïʼpïa pòre kïweijïkon poko kopatomatomba. (Proverbs 14:30; 22:24, 25) Ijòʼmï, woʼchïmboʼnokon poko Opoto Papaʼwa oʼmaʼpo paʼme kïaʼtainie, yaangon anïkïkonʼwa kapoijïkon kapïn ma woʼchimïʼpïo kanome wèʼchonon, ijòseʼpa eiʼpiopïn taka kïweijïkon kapïn ma. (Proverbs 23:20) Jehoba oʼto watïpai asi ròten yèʼtumban tònïmïn ènïrï enean. (Psalm 104:15; 1 Corinthians 6:10) Opoto Papa weinionokon wòmepatoʼkomba kopatomatomba kòmeparïkon ke tuwaro kïweijïkon poko neiara kïwòsenepòrïkon poko neroʼkon kapïn, morote neiara kïwònumingarïkon poko eropa te. (Psalm 119:97-100) Taʼroro te, oseke tïwòsepatomatoʼkonʼme ròten kapïn taʼronokon Krais wekenanamon Opoto Papa wïkatoʼkon paʼme mandon, morote nuse ïtoʼme te moro paʼme mandon.​—Èrupïako Matthew 5:14-16.