Opoto Papa amukon meʼme kariʼniakon tïpïanarïkonme yèísheinie ma yòpekatïrïkon pato tïʼwa. (Psalm 65:2) Morote, ijomboro tïʼwa wòpekaʼnokon onapòíʼpiapai roʼkon te ma. Ijòwane, tïpïtï poko yaame wèʼchoto kariʼnia wòpekatïrï onetaʼpapai ma. (1 Peter 3:7) Moʼkaron Israel asakarïkonïmbo oro ròten yaame yèíʼmiasangonïmboto eropa, Opoto Papa ambòre tïʼwa yòpekatïrïkon onetaʼpapai tïweiye ma. Taʼroro jòke, tïʼwa amumbo ròten wòpekatïrï onapòíʼpiapai Opoto Papa ma. Sheʼmerote, Opoto Papa moʼkaron yaame pane ròten èíʼmiasan wòpekatïrï apoiamba choʼpo yaame tïwèíʼmiasan pïne aʼtainie, ijombo yaame tïweijïkonïmbo nondaʼpotopa iʼyainie.​—Èrupïako Isaiah 1:15; 55:7.

Jehobaʼwa kïwòpekatïrïkon, iʼya kïwòkunamarïkon eʼwaton roropa moro, ijòkero moʼkoʼwa neroʼkon kïwòpekatïseinie kïtaton Kòkïrïnamonïmbome. (Matthew 4:10; 6:9) Kïwotanïʼmasan ke te, Jesas ètï ta kïwòpekatïseinie kïtaton, moʼkoro kombaijo kïwotanïʼmasan epètïme tïwoópo yèíʼpiombo ma. (John 14:6) Kareta poko mieroʼmaʼpo aʼkuru seʼpapai Jehoba kïʼwainie ma tïʼwa kïwòpekaʼtoʼkonʼme, ijòseʼpa tòrupïoʼtoʼpopo kïwònumingarïkon ta kïnapòíshamba. Neiara kïwotapòrïkon paʼmero te kouranaseinie tïʼwa ma.​—Èrupïako Matthew 6:7; Philippians 4:6, 7.

Otaʼpa ròrïpïo iʼya kouranarïkon aʼta Kòkïrïnamonïmbo tïʼwa kouranarïkon etanomba. (1 Samuel 1:12, 13) Uputïʼpamboto ròten kïwòpekatïseinie tïʼwa ma, kònutasan mero kokorone, kïwoʼnïkïrïkon uwapo koko aʼta, kïwòrepanòpïrïkon uwapo, òtïkon kïpïokonokon aʼta eropa ro.​—Èrupïako Psalm 55:22; Matthew 15:36.

Opoto Papa panarïme weinio takure watïpai ma iʼya oʼmatopo paʼme watïpai wèʼchonon raʼna kombaijo komainiaton, iʼya tomambòre ènï nono kuʼpo omanomamba ekarichïʼpombo onamïʼchaʼpa wèʼchonon. (2 Timothy 3:1, 4; 2 Peter 3:3, 13) Ijòkero kïwatonon Jehobaʼwanokon maro kïwòseʼnanoʼpòtïseiniepa kïtaton osekaro kïwotapokumatoʼkonʼme.​—Èrupïako Hebrews 10:24, 25.

Tapokurume Opoto Papa enenamon maro kïwòseʼnanoʼpòtïrïkon yako, kopatomatomba ambòre juʼpïngon noro pianarïkonme kïweijïkomba poko. Jehoba poko Wòrupïatonon wòseʼnanoʼtoʼkonʼwa kïtopòtïrïkon yako neiara tïwòmepatoʼkon paʼme yeijï ambòre kïpïanaʼtomatomba.​—Èrupïako Romans 1:11, 12.

Jehoba panarïme meiapa tuwarome penatome pòre owònumingarï yako Charetarï weinio owòmepaʼmatoʼkonïmbo poko. Ònumingako emaminjon poko, iʼya oʼmanokon, woʼtonomangon ichaʼmatoʼkonïmbo poko eropa. Kïwòpekatïrïkon, tuwarome penatome pòre kïwònumingarïkon eropa kïwòmepaʼmatoʼkonïmbo poko, choʼpo neròten Opoto Papa apokurume kïweijïkon kïsupusatomba, niemban pane ròten yònumingarï weijï eropa.​—Èrupïako Joshua 1:8; Psalm 1:1-3.

Opoto Papa panarïme meiapa taʼro mondopa yeijï amïʼcharï yako oʼwa, tïkaʼmatoʼkonïmbo paʼme wèʼchotome yeijï eropa. Ambòre oʼwa Jehoba amïʼcharï pòriʼchomarï nòʼkïʼmimbo tuwaroʼmarï paʼme ma. Ijòwane moʼko nòʼkïʼmimbo topase na yètuwaroʼmatòʼme, ijopaʼme roropa ororo owòmeparï tïsepa ma amu noro Opoto Papa poko owotamïʼcharï wèʼchoʼmepa. Ekemaʼpa ròten owòmeparï tïsepa ma juʼpïa morokon onamïʼcharïkon poko upuʼtòʼme oʼwa, oʼtonòʼme eropa amïʼcharï oʼwa.​—Èrupïako Matthew 4:4; Hebrews 11:1, 6.

Choʼpo Jehoba apokurume moʼkaron tapokurume tònenamon ma, tuwaro eropa pionainie ma. Kïnepatomatomba òtïro tïʼwa yeijïkon anïʼmanamopa weinio, oronome tomamïrïkon epòrïmamba anïʼmanamopa weinio eropa. (Psalm 91:1, 2, 7-10) Kanïʼkoponamopa òtïkon poko koʼmaton, ewaʼpoʼpa kïponangomba poko eropa. Juʼpïn ne omano poko Jehoba komepaton.​—Èrupïako Psalm 73:27, 28; James 4:4, 8.