Yaame weinio tïwotapoiye nono kuʼpo ma koromone Setan wonapimiaʼpomboto. Setan juʼpïn Opoto Papa nèkïrïpïo piòʼchòrïme rïpïo koromone tïweiye ma, morote ‹ororo moro ipiorono ta èíʼpiapai tïweiye ma.› (John 8:44) Opoto Papaʼwano neroʼkon wòkunamano sepa tïʼwanome tïweiye ma. Moʼko koromonenombo worïi Eveʼwa tïwonapimia Setan ma tamïʼchatoʼmene iʼya, Opoto Papa kapïn. Adam ijombo Eve paʼme roropa tïweiye ma Opoto Papa onamïʼchaʼpa. Moro paʼme Adam wèíʼpiombo kanome ro erome woʼchotaʼmano ma, romoʼno eropa.​—Èrupïako Genesis 3:1-6, 19.

Opoto Papa amïʼchapòrï seʼpapai Eve ïpïoʼpomboto Setanʼwa, kariʼniaʼwa ijomboro tïnèkïrïʼmaʼpo yopotorïme Opoto Papa weijï ènuʼkarï apoiʼpioʼpo moro iʼya, yeinio wengaʼnamanopa. Tïaʼropa pòre neròten kariʼnia Setan wèíʼpio paʼme roropa tïweiye mandon, Opoto Papa seʼpapai tïyopotorïkonme. Ero paʼmero Setan ènï ‹wèʼchopo yopotorï› me tïweiyepa ma.​—Èrupïako John 14:30; 1 John 5:19.

Ijomboro Opoto Papa emaminjon juʼpïa ma. Paʼpororo Opoto Papa nèkïrïʼmasan moʼkaron koromonenokonïmbo kariʼnia maro worïi, moʼkaron ònèpïngon piòʼchòrïkon eropa, amïʼcharï taropa tïweiye mandon tïseinie yeijï paʼmero. (Deuteronomy 32:4, 5) Opoto Papa oseke kïʼwainie kïnanumboan oʼto kïwèísheinie kïweijïkon, juʼpïn poko kïweijïkon, ijòseʼpa yaan poko kïweijïkon. Moro pame iʼya tòkïrï kïwèíshan ma. Moro kero osekero kïsenepoatomba kapokurukonme Opoto Papa weijï.​—Èrupïako James 1:13-15; 1 John 5:3.

Asi ròten Jehoba tïʼwa yopotomarï ènuʼkarï enapoan. Oʼtonòʼme? Enepotòʼme tïʼwa yopotomarï ʼtòrïpïo òsepatomaʼpapai kariʼnia weijï. (Ecclesiastes 7:29; 8:9) Juʼpïa tïwòtupusepa erome yèíʼpio ma 6,000 siricho kariʼnia emamïʼpïo paʼpopo. Nono kuʼponokon yopotonon woónokon ònipioroʼkaʼpapai  mandon, tïʼwa oʼmatoʼkon paʼme kapïn amukon weijïkon, yaame tïwatonon poko amukon weijïkon, anïkïkon eropa.​—Èrupïako Jeremiah 10:23; Romans 9:17.

Amume neròten kariʼniakonïmboʼwa yopotomarï weinio te, Opoto Papa tïʼwa yopotomarï amïʼchanamon epatomanopa. (Isaiah 48:17, 18) Shèrïmero, Jehoba ijomboro kariʼniaʼwa yopotomarïmbo poroʼkanomba. Tïyopotorïkonme Opoto Papa apòíʼmianangonïmbo neroʼkon nono kuʼpo kïnemandaʼton.—Isaiah 11:9.​—Èrupïako Daniel 2:44.

Eneko moro piʼchaʼme Oʼtonoʼme Opoto Papa woʼchotaʼmano enapoan?

‹Amuro Jehobaʼwa yeijï kapïn taʼro tapokurume enèrï ta ma,› tïka Setan ma. Moro yonapimiaʼpo iʼchòrïpïo yeijï upuʼporï seʼparo ma? Mupuʼpoapa! Òsiʼmiaʼmaʼpa Opoto Papa weijï enepotopopa ïan kïʼwainie nòʼkï se kïweijïkon kïyopotorïkonme, Opoto Papa, ijòseʼpa kariʼnia. Neiara komamïrïkon poko kïsenepoaton nòʼkïne anumïʼpïo kïʼwainie kïyopotorïkonme.​—Èrupïako Job 1:8-12; Proverbs 27:11.

Opoto Papa kïsapoiatomba kïyopotorïkonme moro ipioro iʼya wòkunamano epòrï ke kïʼwainie, moro Charetarï ta ekarichïʼmaʼpo paʼme wèʼchoto, ijombo aʼkuru ke kïʼwainie komamïrïkon ta. (John 4:23) Jesas wèíʼpiombo paʼme, Setan seʼpapai kïweijïkon kïsenepoaton kïyopotorïkonme moʼkaron nono kuʼponokon yopotonon onepatomaʼpa kïweijïkon ke yopotome tïweijïkon poko yotapoʼkarïkon ta, ijòseʼpa yoòrïkon ta èíʼpïa kïweijïkon ke eropa.​—Èrupïako John 17:14.

Setan ero wèʼchopo yopotorïme tïweijï ke, yaame pane ròten amukon ïpoan, yoiyèʼtunanoʼtoʼkon poko maroro kïnenapoaton. Moropangon òmenanokon paʼme watïpai ambòre kïwèíshan mero, amukonïmbo kïpïanarïkon, kasakarïkon eropa ambïako kòreʼnosaton, ijò seʼpa kïyenonosaton maroro. (1 Peter 4:3, 4) Ijòkero, oʼto kïwèísheinie kïtaton? Moʼkaron kòreʼnoʼnamon, ijòseʼpa kïyenonoʼnamon kïsapoiaton kïpïanarïkonme, mokaron Opoto Papa tapokurume enenamon ekatu? Tïwònumingake pane ròten Opoto Papa weijï eneponamon iʼya òmepatoʼkon, paʼmero wane kïtaton? Moro paʼme kïaʼtainie, ‹Amuro tuʼkurupïa yako Opoto Papa wïkarï paʼme yeijï kapïn ma,› Setan wïkaʼpombo tonapimie ròten kïsupuʼpoatomba.​—Èrupïako 1 Corinthians 6:9, 10; 15:33.

Choʼpo tapokurume kariʼnia enèrï ke, Opoto Papa yaame weiniokon maro woʼchotaʼmanokon ònipioroʼkaʼpapai ròten yeijï kapïn ma. Ènï amïʼcharï eneponamon oronomero tomambòre kïnemainiatomba nono kuʼpo.​—Èrupïako John 3:16.