Moro Griek auran, Tamusi karetary meropo ta, okapyn Barnabas, mo’ko apojomapo Paulus ekari’san, Tamusi na’nanopy’san enenamon me, moro koromoneno siriko ta, mo’karon kresten tatawa i’waine tywaije man. Oty poko ko moro wara tywaije nandon ? Potome imero ipokoine tywesyka tywaije mandon. Paulus tyka tywaije man : « Kyteraman rapa, one wara mo’karon Kristus wyinonokon wairy ene » (Apojoma’san 15:36). Tyse tytory taro tywaije man ipori’tomaine. Mo’karon eromenokon Tamusi na’nanopy’san enenamon iwaraine enapa kynaijaton.

Na’na pori’tomaine konosaton. Mo’karon Tamusi na’nanopy’san enenamon o’win-kari’na iwairy taro Tamusi na’nanopy’san enejaton ; okomboto o’win siriko ta, o’win aremi iwairy taro na’na maro mandon. Morokon tywomepa’san maro, mo’karon ipyijakon womepa’san maro enapa (typy ke ataine irombo) potome imero na’na emeparykon taro mandon. Mo’karon pyitono, amyjano, siky’ino ukutyry pynadon imero, na’na maro oka ekaro kynysaton, Tamusi karetary poko omepano yje enapa.Opano yje konosaton o’win, o’win pai na’na wa, na’na etawaine enapa konosaton amykon uwapoto’san maroine. Morokon potono ata’nanono aitokon wanome man irokon jako, asakapo aitokon wanome man irokon jako, morokon siky’ino ata’nanono jako enapa, pori’tonano ytopo aurananon ekari’saton na’na wa (Apojoma’san 15:35).

Pa’poro na’na pokoine tuwaro mandon. Mo’karon Tamusi na’nanopy’san enenamon, mo’karon a’nanopy’san epanosaton iru’pa Jehowah maro iwaitokome. Mo’karon uwapoto’san, mo’karon epatongon maroine konopojaton morokon uwaponaka otykon inaro’san mengatome, onumengano ytome i’waine moro emamigon kapyry poko. Mo’karon pionniers me aitonokon epanosaton iru’pyn me moro oka ekarory ta itundatokome. Mo’karon asery me otonokon ukutyry apokupeine man irombo uwaponaka itorykon ukutyry’se mandon. Aseke tywotyje mandon, ‘ky’wanokome kamaminarykon a’sakarykon me mandon’ (2 Korinte 8:23). Moro inamyikarykon, Tamusi maro iwairykon, amykon iru’pyngon enepotopo me mandon na’na wa (Simosu 13:7).

• Otonome ko mo’karon Tamusi na’nanopy’san enenamon morokon a’nanopy’san taka nysadon ?

• One wara ko ajeneine iwopy’san poko mo’my’kataton ?