Moro Tamusi karetary wa takarise tywaije man Jesus romby’po pa’po me, tonapiramon amepanen wepakary man mo’karon koromonenokon kresten ranaine, irombo moro iporono tamusi karetary tano aurananon umary i’waine (Apojoma’san 20:29, 30). Moro ro tywokase tywaije man. Jesus nyry’san omepano tykai’ma tywaije man morokon amandonon namyikarykon maro, iwara te morokon waikamon kereke tywose mandon (2 Timoteus 4:3, 4). Iroke, one wara ko kysamyikataton erome moro kynukutyrykon Tamusi karetary tano wairy ipororo ?

Moro juru ko’wu tytunda man. « Moro iromboro kurita ta », Jehowah tyka tywaije man, « moro iporono ukutyry poto me imero kynaitan » (Daniel 12:4). Moro siriko 1870 ta, amy asi’ko’kono amandonon apyimy waine moro iporono upiry ta, tuku’se man pyime morokon omepano Tamusi karetary tano wara, e’i’pa tywaije man. Iroke te tu’pi i’waine man ukutome oty poko uwapo moro omepano yry’po i’wa. Jehowah’wa tapanose mandon.

Korona moro Tamusi karetary poko omepano. Mo’karon Tamusi karetary poko Omepatonokon waine amy omepano taku man, erome noro moro wara na’na kynaijan : Moro Tamusi karetary tymenga i’waine man o’win o’win pai. Tyjanare moro imeropo a’ta tupi rapa i’waine man amykon tera amoto’san ta. O’win moro auranano we’i’po epory’po mero, tymero ko’wu i’waine man. Aseke ro moro Tamusi karetary wokarityry ke, moro iporono Tamusi ety tuku’se rapa i’waine tywaije man, moro inundymary poko, moro inisanory poko mo’karon amandonon wanome, mo’karon iromby’san poko moro aimomono awono poko enapa. Morokon inepory’san waine tymboka mandon morokon amu’matonon omepano wyinomboine (Johanes 8:31, 32).

Moro siriko 1879 ta, mo’karon Tamusi karetary poko Omepatonokon waine tuku’se man moro jururu tundapo wara ro moro iporono ukupory. Moro kareta Kawo auto ta tuwaro aino moro Tamusi Nundymary ekarory tu’kupo’po i’waine man. Ero kareta ukupo’pojan ro erome noro na’na. Erome na’na ero kareta ekari’san 240 aitopo ta, 900 aurananon ta. Ero wara, moro iporono oka ukutypa nanen tywaijembo me man !

• Kristus romby’po pa’po me, oty ko tywokase nan moro iporono tamusi karetary poko ?

• One wara ko moro iporono kurandonaka tywepaka rapa tywaije nan ?