Meneton tera ero kareta apemy’po ta morokon uku’san ta iru’pyn me mo’karon Jehowah Ekary Aroponamon wewo’myndorykon ata’nano’se tytotoko me ? Otonome ko potome ne nan iru’pyn me na’na wewo’myndory ?

Tamusi nendory ke. Ipororo, Tamusi irombo noky me kari’na wairy anenepa man (1 Samuel 16:7). Ase’wara na’na tywota’nanopyry jako te, na’na inendory enepojan i’wa, mo’karon kymaroine ata’nano’se opy’san waine enapa. Amy a’wembono aurananon ynen po’ponaka na’na wytory jako, kawo iwairy enepotome, na’na tuwaro kynaitan tywewo’myndopo poko. Iwara enapa man, na’na wota’nanopyry jako, mo’ko Tamusi Jehowah « pa’poro nono wa A’wembono auranano ynen » embata, iru’pyn me na’na wewo’myndory kynenepotan na’na wa inendory, moro auto ety awongatopo nendory enapa na’na wa (Genesis 18:25).

Enepotome potome na’na nikapyrykon wairy. Moro Tamusi karetary mo’karon inaron nero kresten panatomano iru’pyn me « tywonumengapore tywairykon ta, ija roten iwewo’myndotokome » (1 Timoteus 2:9, 10). « Ija roten » ewo’myndono, tauropo moro man tapenamon wo’mynano ke ekuramanon kapyn, ijamunano enepory kapyn, onunano tyngatopo kapyn. Moro « tywonumengapore aino » kurangono wo’mynano pinapojan na’na wa, tamero roten ewo’myndono maro kapyn. Erokon omenanon te na’na anakotopa man kurangono me na’na wewo’myndotome. Tyiman ta roten iru’pyn me « mo’ko Kymboganamo nyry omepano yry man » irombo « kurano yry Tamusi’wa » iru’pyn me na’na wewo’myndory maro (Titus 2:10 ; 1 Petrus 2:12). Iwara te iru’pyn me na’na wewo’myndory na’na wota’nanopyry jako, na’na kynenepojan iru’pyn me Jehowah ety awongary.

Morokon awo’mynkon wa te aporokarykon kapyn man awotokome na’na wota’nanotopo taka ! Tapene imero wo’mynanon wairy waty iru’pyn me, tysakore kywomytopotaton.

• Otonome ko na’na wo’my potome ne nan Tamusi ety awongatome ?

• Otypan omenano meropo ko na’na undymanon iru’pyn me na’na wewo’myndotome ?