Pyime amandonon kereke taka noro itopa mandon, moro a’kanano oma anepory’pa tywairykon ke, moro tyturu’san andymonen anepory’pa mandon. Oty poko ko iroke mo’karon Jehowah Ekary Aroponamon wota’nanopyrykon waine wytan ? Oty ko iroke sepotan ?

Tawa’pore maitake moropo aipynanon eneponamon maroine aja’ta. Koromonenokon kresten o’win ana’nopy’san me tywaije mandon. Tamusi ety awongatome tywota’nanose mandon, moro Tamusi karetary poko tywomepatokome, tywepori’tomatokome enapa (Simosu 10:24, 25). Mosaron kresten asewa imero tywaipyna mandon, asewa typokoine tuwaro tywaije mandon, inaron nero pawana, kresten pirynano, tanautykon maroine (2 Tesalonika 1:3 ; 3 Johanes 14). Iwaraine enapa na’na kynaijan, iwara te na’na tawa’pore man i’we’i’san waraine.

O’win omepano morokon Tamusi karetary wykary katome. Morokon Tamusi karetarykon jako iwe’i’po wara wokyryjan, woryijan, pitanikon asewara konotana’nosaton. Amykon omepano yry ukunamon, na’na epanosaton o’to moro Tamusi karetary wykary ukutome moro na’na emamyry ta (Deuteronomium 31:12 ; Nehemia 8:8). Moro ata’nanotopo ta, na’na aurananon ejukuru taro man moro na’na namyikary poko, na’na kiniwaretanon enapa (Simosu 10:23).

Kurano me man paripe na’na namyikary a’ta. Mo’ko apojomapo Paulus tyka man amykon Tamusi nana’nopysan waine : « Ajenerykon’se irombo imero wa [...] asewa kywepori’tomarykon man. Moro o’waine Tamusi amyikary’wa enapa ypori’tomary man » (Rome 1:11, 12). Okapyn na’na wota’nanopyry mo’karon amykonymbo Jehowah Ekary Aroponamon maroine, na’na namyikary pori’tomanon iporopy’pa enapa kresten me na’na emandome.

Awopyry’se nare awairykon na’na wota’nanotopo wa, pa’poro erokon otykon enetokome o’waine ? Na’na tawa’pore imero kynaitan awopysando ! Na’na wota’nanotopo epe’ma pa man ; na’na pyrata a’namoity’pa man.

• Otypan enepotopo arojan ko na’na morokon na’na wota’nanotokon poko ?

• Otykon enesan ko morokon na’na wota’nanotokon ?