Morokon koromonokon kresten wota’nanopyrykon, oty wokapy’po ewamatopo kapyn moro tywaije man. Moro jako te, Tamusi’wa tyware ta mandon, Tamusi torupa i’waine man, moro ikaretary torupa enapa i’waine man, irombo morokon Imero’san poko tyworupa mandon (1 Korinte 14:26). Iwara enapa na’na wota’nanopyry kynaijan.

O’win iporono omepanon Tamusi karetary wyino ipinapo. Aremi ta mo’karon Tamusi nananopy’san kynota’nanosaton 30 min iwairy taro amy auranano Tamusi karetary wyino ika’po etatome na’na emamyry poko, eromeno me enapa. Pa’poro enapa na’na typanatoma mandon morokon imero’san erupatome moro Tamusi karetary ta. Moro auranano pa’po me, o’win juru iwairy taro moro « Kawo auto ta tuwaro aino » poko omepano kynysan, morokon ro na’na epanosan one wara tamamyry arotome. Moro ro ra’a mengaton morokon 120 000 ana’nopysan taine, wara ro nono tu’po.

O’win opano yry omepatome. O’win koine aremi ta, na’na konota’nano’san amy oruwa asaka’san auranano katome tatynen Kresten emamyry emamigon maro, moro Kareta moro ananopy’san kresten emamyry emamingon maro wyinombo konosan. Ero tykapymy kynotamojan morokon Karukurikon Tamusi Auran patoine, moro Tamusi karetary erupary’se na’na wairy poko na’na emepanon, moro ro moro ananopy’san waine torupa terapa man. Morombo mero iru’pa Ajemami ikako ta, amykon kynenepojaton one wara tywairykon moro Tamusi karetary poko tasakarykon erupary jako. O’win onumengano ynen kenekari’san na’na wa oty ta na’na wepanatomary noro, iru’pyn me na’na wa kareta erupatome, na’na auranatome enapa (1 Timoteus 4:13). Irombo mero, moro Kresten emamyry kynenepojan one wara morokon tamusi karetary tanokon wykary kapyry kurita wara ro moro amano ta. Ita man o’win auranano, aturupono ejutopo maro iru’pyn me Tamusi karetary ukutome.

Moro na’na napyirykon na’na wota’nanotopo ta tamusi karetary poko omepano potome imero ajenumengapotaton (Jesaja 54:13).

• One wara ko morokon na’na wota’nanopyrykon ny’san ?

• Otypan na’na wota’nanotopo nanen wa ko awopyrykon’se mandon ?