Sirikokon poko Jehowah ise tywaije man mo’karon asomokon wairy ase’wara, iru’pyn pawana me iwaitokome tymaro, ase’wa enapa iru’pa iwaitokome (Deuteronomium 6:6, 7). Moro poko ro mo’karon Jehowah Ekary Aroponamon tyjururukon pinaton aremi wara ro tomorykon maro Tamusi ety awongatome : Tawa’pore kynorupaton morokon, a’kanano tanokon aturupono poko tywanoko me, o’to tywairykon ukutome enapa a’kanano ta. Iro rorypo o’wine aja’taine moro ajururu ipinatoko awomepatoko me moro Tamusi Karetary poko anisanorykon me ro.

O’win juru pinary Jehowah ekondaka awotokome. « Tamusi’wa i’tandoko. Irombo o’waine kyny’tan » (Jakobus 4:8). Iru’pyn me Jehowah ukutyry poko kywomeparykon jako, moro ikaretary erupary ta, noky me iwairy, morokon inikapy’san enapa kusukutaton. Sawone roten Tamusi ety awongatopo andymopoto, asewara moro Tamusi Karetary erubary moro man, moro aremi wara ro moro Kresten emamyry emamikon wytory arory wara ikapyry jako. O’win o’win pai mo’karon asomogon amy a’saka’po erupary taro mandon. Irombo me ro, pa’poro moro tywomepa’san poko tyworuparykon taro mandon.

O’win juru asekonda asomokon wairy. Moko yinonano, typyty maro, jumynano sanonano tymakon maroine womeparykon jako Tamusi karetary poko, moro o’win iwairykon pori’tomatan. Ero juru momokyry iwaine man tawa’porykon ta sara’me tywairykon ta enapa. Amykon jumykon, sanokon, auranano pinaton tymakon sirikorykon wara aitonokon, omepatokon po amy yja’wan oty epory’poto iwaine irombo one wara iwairykon man poko. Amykon kareta Kawo auto ta tuwaro aino, Ajupakatokon ! enapa, moro na’na sitery Web, jw.org akujaton. Amy tele ta enepo’po enejaton pai (tv.pr418.com), irombo mero ipoko asewara kynorupaton. Amykon kowu konomepaton morokon ata’nanotopo tanokon ware warekary poko, irombo apokupeine man amy otymbo enyry, enapyry pai, taikepy’san mero moro asomokon womepa’po pa’pome.

Ero iru’pyn jururu arory aremi wara ro Jehowah ety awongatome, tawa’pore asomokon ytan moro Tamusi Karetary poko iwomepatokome. Tamusi irombo awomikarykon kuranondory anamonopy’pa kynaitan (Ware 1:1-3).

• Oty poko ko jururu pinary nan tamusi karetary poko asomokon womepatome ?

• One wara mo’karon jumynano, sanonano sara’me moro juru yry taro nandon mo’karon tomorykon waine ?