Moro aurananon « pionnier » tauropo moro man, mo’ko asery oma etapurumakanen amy tera wa arotome. Jesus amy me ro tywaije man, nono tu’ponaka tomose tywaije man o’win oka ekarory amotome amano poko, irombo mo’karon amandono waine ymbokanon apyitome (Mateus 20:28). Erome ipyitorykon iwe’i’po wara ro kanaijaton, tyjururukon yjaton amykon noro Tamusi pyitorykon waitome (Mateus 28:19, 20). Amykon wa moro pionnier amaminano typina man.

O’win pionnier poto me imero moro oka ekarityry apyijan. Pa’poro mo’karon Jehowah Ekary Aroponamon oka ekarojaton moro iru’pyn oka poko. Amykon kynekararimaton pionniers permanents me tywaitokome, nuno wara ro 70 juru ka’saton oka ekarory poko.Ero katome kurando asiko ko roten kenemaminaton aremi ta. Amykon emosaton enapa pionniers spéciaux me, amykon aitopo taka pyime oka ekaronamon waty man iro wa, mo’karon ro 130 juru ka’saton nuno wara ro oka ekarory poko. Mo’karon pionniers tawa’pore mandon ija roten tamamyrykon arory’ke, Jehowah tu’ponaka roten kynoposaton moro tynamonopyrykon apyitome (Mateus 6:31-33 ; 1 Timoteus 6:6-8). Mo’karon poto me oka ekarory upinamon te, pionniers auxiliaires me tywairykon taro mandon i’se ta’taine, 30, 50 juru ka’saton pai o’win nuno ta.

O’win pionnier Tamusi pynanen, ta’sakarykon pynanen enapa mo’ko man. Jesus wara, na’na kynenejan pyime kari’na wa ipororo imero Tamusi ukutyry manombo rypo tywaije man (Markus 6:34). Moro na’na nukutyry te erome ro epanopyrykon taro man, moro aireno poko iwaimomotokome. O’win pionnier wa ta’sakary pynary’ke, poto me moro tyjururu yjan, moro typanatory enapa moro iru’pyn oka ukupotome (Mateus 22:39 ; 1 Tesalonika 2:8). Moro wara iwairy moro inamyikary pori’tomanon, Tamusi ekondaka kynaijan irombo poto me imero tawa’pore man (Apojoma’san 20:35).

• Noky ko mo’ko nan o’win pionnier ?

• Oty ko o’win pionnier asinano’san ?