Moro « iru’pyn oka » ekaropory’se tywairy’ke « pa’poro emerykon, epykon, aurangon, undykon wa », na’na 900 auranano kopo rapa kareta merojan (Jesus nenepo’po 14:6). One wara ko na’na ero tyjanare amaminano ka’san ? Amykon aitopo ponokon Jehowah Ekary Aroponamon me aitonokon patoine, kareta kanamon, u’manamon pato enapa.

Pa’poro imero’san angeresi auran ta nanen tymero man. Moro a’nanopy’po Apyimy undy, moro kareta meropo undymanon. Ero amaminatopo kenekari’san otypan auranano merory mo’karon wokyryjan apyimy waine, amykon aitopo tanokon amaminatonon waine enapa. Pyime roten auranano ta emaminarykon’ke, morokon tynimerorykon merojaton pyime auranano ta, moro ponokon amandono tu’rupo ytukatome.

Moro imeropo aropojaton u’manamon waine. Taike’py’san mero imerory poko, kanaropojaton internet pato mo’karon u’manamon waine enetome, imengatome enapa, iru’pa moro tynimero’san we’i’po, anamonopy’pa tywe’i’san pai. Kono’mikaton « morokon iporonokon auranano » merotome, moro angeresi auran ta imeropo waitome moro auranano tynimero’san ta (Ekaronen 12:10).

Morokon ordinateur ko’i moro amaminano kapojan. O’win ordinateur, kareta kanen, kareta u’manen ypetakamary upijan. Morokon auranano ukupotopo kareta te, amykon noro kareta upitopo, ko’i moro amaminano kapojan. I’taka ro, mo’karon Jehowah Ekary Aroponamon waine, amy ordinateur tano amaminatopo tandymo man pyime auranano ta (moro MEPS), moro ro morokon imero’san kapojan pyime imero auranano ta, morokon ukusan maro kynepopojaton, irombo mero kinikasaton.

Otonome ko erokon omikano ka’san na’na erokon kareta u’matome, amy auranano taka pyime ne waty kari’na aurana’pa ita a’ta? Jehowah te i’se man « pa’poro roten kari’na wokary’se man moro u’tano wyino, irombo moro iporono oka apyiry’se man i’waine » (1 Timoteus 2:3, 4).

• One wara ko na’na karetarykon tykase nan ?

• Otonome ko pyime roten auranano ta na’na kareta u’manon ?