O’toro ko Jehowah Ekary Aroponamon mukusaton ? Amykon ajaporitoine amando’do pai, ajemami a’sakarykon pai, aja’sakarykon pai. Amykon pai ajaporito nakaine tywose mandon ajerupatokome, moro Tamusi karetary poko. Nokan neko na’na nan ? Oty poko ko pa’poro amandonon waine na’na tynamyikary ekari’san ?

Pa’poro amykonymbo wara na’na man. Ato’wakon roten opynano wyinono na’na man, ato’wakon amaminano kanamon, amykon wa potono omepanon tapyije man amykonymbo kopo. Uwapo amykon na’na asakarykon amykon tera kereke ta tywaije mandon, amykon ko’wu Tamusi anamyikapa tywaije mandon. Pa’poro te na’na wa tyjururu typina man, iru’pyn me moro tamusi karetary poko tywomepatome (Apojoma’san 17:11). Moro tywomepatopo amyikapo ke, aseke ro Tamusi Jehowah ety awonganen me na’na ne’i.

Moro Tamusi karetary poko omepano pyime otykon yjan na’na wa. Pa’poro amykonymbo wara yja’wangon otykon na’na epojan, rupomangano enapa. Na’na te kuru konomikamanon moro tamusi karetary wykary wara tywaitome, iwara te na’na emamyry iru’pa kyny’san (Ware 128:1, 2). Moro mero te na’na konorupanon morokon kurangono otykon na’na nene’san poko moro Tamusi karetary ta.

Na’na emerykon Tamusi wyinombo kyno’san. Erokon omenano Tamusi karetary tanokon, iru’pa na’na ypojan, kawo tasakarykon ypojan na’na wa, enapi’pa na’na ypojan, tawa’pore enapa. Erokon ro iru’pyn me otykon enepojan na’na wa, asewa iru’pa na’na emando me, moro asomonano panatomano o’win iwaitokome, irombo iru’pa na’na emery waitome. Na’na kynamyikanon enapa « noky me kari’na wairy poko Tamusi o’poty’pa man », iroke te o’win asomokon me na’na man pirynano, asenauna me pa’poro ero nono tu’po. Na’na te pa’poro amykonymbo wara man iro ro rypo typo tera undynano me na’na a’ta (Apojoma’san 4:13 ; 10:34, 35).

• Oty me ko mo’karon oka Aroponamon pa’poro amykonymbo wara nandon ?

• Otypangon omenano poko ko mo’karon oka Aroponamon tywomepa nandon ?