Penaro tera mo’karon Jehowah Ekary Aroponamon omepano apyijaton Tamusi wyinombo. Mo’karon pa’poro tyjururukon akunamon moro iru’pyn oka ekarotome amy potosu omepano apyijaton, ‘tywaikero moro tamamikon kapy’matome’ (2 Timoteus 4:5).

Omepano pionniers wanome. O’win pirynano kanauna we’i’poto o’win siriko tera pionnier me tytory taro kynaitan, o’win-toima kurita iwairy taro omepa, amy Ata’nanotopo taka tyse waty tywyinombo. Ero omepano, mo’ko pionnier epanotan. Jehowah ekondaka ne’katu ra’a iwaitome, iru’pyn me oka ekarotome, irombo moja’ro tamyikapore iwaitome moro oka ekarory ta.

Omepano mo’karon Tamusi nundymary ekaronamon waine. Ero omepano oko nuno kynaijan, mo’karon tupu’ponamon pionniers wanome, mo’karon ro mondo tera mandon tyse tywaitokon wyino tytotokome amy tera aitopo ponokon epanotome. Ero wara ikarykon enapa moro man. « Ero po kore wa ! Karopo ko », mo’ko inoromboro nono tu’po poto’su oka ekaronen Jesus Kristus we’i’po wara (Jesaja 6:8 ; Johanes 7:29). Tyse o’win pionnier wytory jako moro tytotopo aitopo wa moro pono omenano poko iwomepangary man; moro emerykon poko, one wara moro aitopo wairy poko, moro tanamy poko, amy tera me tywairy taro man, amy tera aurananon poko pai iwomeparykon kynaitan. Ero omepano mo’karon ipipyn pirynano, inomy kanauna, aimy’san pai 23, 65 sirikon aitonokon epanosan a’kanano tano omenano apyitome, morokon emerykon a’kutan ro Jehowah moro ina’nanopy’po maro, tyse aroporykon man jako.

Moro Galaad pono tamusi karetary poko omepano. Simosu auran ta « Galaad » tauropo moro man « oka ekaronen unsiko po ». Moro siriko 1943 ta tywotapurumakapo mero, ero omepano wa 8 000 tyse itotonokon taropo man moro oka ekarotome « wararo nono y’matypo wa ro » (Apojoma’san 13:47). Mo’karon Galaad ponokon tunda’san mero Peru’wa, amy pairo tamusi na’nanopy’po waty pairo tywaije man. Erome ko’wu 1 000 kopo tywaije man. Moro Japan po ainapatoro roten Oka Aroponamon tywaije mandon mo’karon aropo’san tunda’san to. Erome 200 000 ko’po mandon. Moro 5 nuno omepatopo kyny’san korona moro Tamusi Auran ukutome. Ero omepano amykon pionniers spéciaux, tyse taropomykon, amykon Bethel tanokon, mo’karon Tamusi na’nano’py’san enenamon ipyjakon maroine komanon amy omepano katome rapa moro tamamikon ta paripe iwaitokome.

• Oty wanome ko moro omepano tyje nan mo’karon pionniers wanome ?

• Noky ko ero omepano, moro Tamusi nundymary ekapory ekarory apyiry taro nan ?