Amy tytyty jako, o’win wytory na’na kynekuramanon katano ta aitonokon Jehowah Ekary Aroponamon epanotome. Erokon o’mikano ipororo na’na waipynary enepotopo moro man (Johanes 13:34, 35 ; 1 Johanes 3:17, 18). One wara ko na’na opano ene’san ?

Na’na pyrata yjan. Koromono siriko ta, mo’karon Antioki ponokon kresten waine pyrata taropo tywaije man Judea ponokon waine, potosu kumyno wa epory’san ke (Apojoma’san 11:27-30). Erome, amypo po na’na kynetanon amykon Oka Aroponamon waine otykon amonopyry. Mo’karon Tamusi na’nanopy’po patoine, amykon otykon aropojan na’na iwaine epanotokome (2 Korinte 8:13-15).

Opanotokon otykon yjan na’na. Moro yja’wan wytotopo po, mo’karon uwapoto’san moropo aitonokon o’win wytory tasakarykon upijan o’to e’i’pa iwe’i’san ukutome. Amykon ananopy’san moro amaminano andymojanton, opano ytome, apiwano poko, tanamy poko, tuna, womynano, auto poko enapa. Pyime Oka Aroponamon aseke typyratarykon maro kynysaton moropangon aitobo wa opano ytome morokon auto, Tamusi ety awongatopo auto wotaboty’san katome rapa. O’win na’na wairy ke, tamepaje enapa ase’wara tamaminary ke, ko’i imero na’na o’win kynaijan opano yje tytotome. « Mo’karon na’na piryjan na’na enaunan na’na asakarykon Tamusi amyikanamon » epano’san na’na, na’na mo’karon amykonymbo kereke tanokon kari’na epano’san enapa (Galatie 6:10).

Na’na moro Tamusi Karetary akujan ituru’san andymotome irombo amy aipynano ene’san na’na iwaine. Mo’karon anarikon otykon eponamon turu’san andymory man. Erokon ta ro, Jehowah wyino moro ipori’tory apyijan na’na, « mo’ko kotano enenen Tamusi » (2 Korinte 1:3, 4). Morokon tamusi karetary tanokon wykatopo poko mo’karon katano ta aitonokon erupary jako, moro Tamusi nundymary wa erokon kotano, ata’karykano, aikekary ekari’san na’na iwaine (Jesus nenepo’po 21:4).

• Otonome ko ko’i imero o’win na’na naijan morokon anarinon otykon wokapypoto ?

• One wara ko mo’karon anarinokon otykon nepory’san turu’san andymojan na’na ?