Jesus Kristus tyka man mo’karon typyitorykon waine : « Moro ajaweirykon kari’na wano me oty aweipan. Irombo mero morokon iru’pyngon anikapyrykon amaminano eneta’ton. Mo’ko kapu tano ajumykon ety awongata’ton enapa » (Mateus 5:16). Ero wano me ro, na’na morokon aserynon otykon akujan, moro internet enapa. Na’na site’ry jw.org moro man, mo’karon Jehowah Ekary Aroponamon namyikarykon, emamikon ekaritopo moro man. Oty epojaton ko na’na site’ry tu’po ?

Moro Tamusi karetary wa, pyime kari’na woturupotopo ejutopo. Amykon potonon aturuponon, ejutopo epory taro mandon moro amanon poko. Enetoko tyre, morokon amemy’san kareta Morokon ata’karykano nare amy kurita naiketan ? O’win kurita nare mo’karon iromby’san nemandaton rapa ? epory taro mandon na’na sitery tu’po 800 auranano kopo rapa. Ero site tu’po, mepotaton enapa moro asery Tamusi karetary 160 auranano kopo rapa, amykon omepatopo kareta Oty poko ko moro Tamusi karetary kamepaton ? morokon wenapotanokon kareta Kawo auto ta tuwaro aino, morokon Ajupakatoko ! enapa. Moro site tu’po, pyime roten erokon kareta erupary taro mandon, ipanamary, ipinary pai enapa ero wara : MP3 ta, PDF ta, EPUB ta. Amykon epory taro enapa mandon amy tera auranano tano wa, moro tamusi karetary poko tywomepary’se aitoto wa. Pyime ikapy’san video man mo’karon tainarykon maro orupatono waine. Ajapokupeine nainen morokon tamusi karetary wyino ikapy’san asijambano erupary, amykon asijambano enepo’san, kurangono ware pinary enapa.

Amykon auranano ekarity’san mo’karon Jehowah ekary aroponamon pokoine. Na’na sitery, amykon aserynon oka ekari’san, amykon ikapy’san video yjan wararo na’na emamin poko, amykon otykon wokapy’san mo’karon Jehowah ekary aroponamon pokoine, mo’karon amandono epanopyry poko enapa. Mukutaton oje morokon otykon enenamon wairy, morokon potonon a’tananonon wairy enapa.

Ero wara ro, na’na moro iporono aweiry aweipapojan wara ro tyse nono tu’po. Iwara te, pa’poro nono tu’po nokon amandono, moro Antarctique po ro rypo, na’na sitery etawaton. Na’na Tamusi erupanon mo’jaro « moro Jehowah auran wytotome » wara ro nono tu’po, kawo Tamusi ety waitome (2 Tesalonika 3:1).

• Otypan amaminano ka’san ko moro jw.org moro iporono Tamusi karetary tano uku’tome ?

• Oty enery’se ko awairykon na’na sitery tu’po ?