Moro Tamusi Karetary oko kresten apyimy poko kynorupanon mo’karon ro tu’tanonen mandon Tamusi na’nanopy’san enery poko : « mo’karon enenamon », « mo’karon enenamon epatongon » (Filipi 1:1). Okapyn amykon uwapoto’san tapatongon maro moro ata’nanotopo ta mandon. O’to ko mo’karon epatongon naijaton ky’waine ?

Mo’karon uwapoto’san epanosan. Pyitonokon, uwapotombo me aitonokon tyse waty mandon Jehowah maro, tamyikapore mandon, iru’pyn me tamamikon kasaton. Potonon amaminanon kasaton Tamusi na’nanopy’po wanome, moro Tamusi ety awongatopo auto wa enapa. Moro ro mo’karon uwapoto’san waine juru ypojan omepano ytome, typiryjan, tanauna pori’tomatome enapa.

Moro amaminano inikapyrykon. Amykon uwapoto’san epatongon mo’karon ata’nanose otonokon ewamanamon me mandon. Amykon moro sina wosijambary enenamon me mandon, pyrata enenamon me, morokon kareta morokon aitopo enenamon me, moro Tamusi ety awongatopo auto kuramaton enapa. Amykon uwapoto’san konoturupojaton i’waine mo’karon uwapotombo me aitonokon kresten enetome i’waine. Iro ro rypo pa’poro roten amaminano kapyry jako ty’waine, mo’karon uwapoto’san epatongon iru’pyn me moro tamamigon kasaton, moro ro kawo etykon yjan (1 Timoteus 3:13).

Iru’pyn enepotopo me mandon. Mo’karon uwapoto’san epatongon typina mandon moro kresten me emerykon wairy poko. Morokon ata’nanotopo ta, morokon o’to itarykon moro na’na namyikary pori’tomanon. Asin pe iwairykon moro oka ekapory ta, asin pe enapa na’na yjan. Iru’pyn me emaminarykon ke mo’karon uwapoto’san maroine, awa’ponano enesan, o’win enapa na’na ypojan (Efese 4:16). Morombo pa’pome, uwapoto me rory’po tywairykon taro mandon.

• Otypangon omenano wairy ko nan mo’karon uwapoto’san epatongon ekosaine ?

• O’to ko naijaton iru’pyn me moro Tamusi na’nanopy’po wytotome ?