Mo’karon uwapoto’san, o’win wokyryjan apyimy kapyn mo’karon mandon. Pyrata anapo’ipa mandon moro tynikapyrykon poko moro Tamusi na’nanopy’san ra’naine. Koromonenokon siriko tanokon wara, Jehowah ekonda aitonokon wokyryjan me mandon, kapara enenamon me Tamusi na’nanopy’san wanome (Apojoma’san 20:28). Tywaije kresten me mandon moro Tamusi na’nanopy’po enenamon me ; « tywyry’ka me kapyn ; pyiwano me pyrata ka’namon me kapyn, tawa’poramon amaminatonon me te » (1 Petrus 5:1-3). O’to ko naijaton ky’waine ?

Na’na enejaton, na’na aijomaton enapa. Mo’karon uwapoto’san Tamusi na’nanopy’po undymaton, kynenejaton, kynaijomaton enapa irombo na’na epanosaton Jehowah ekonda na’na wainomboto me. Tamusi’wa ero poto’su amaminano yry’po ukutyry ke, na’na anijopotomapaine mandon ; iru’pa te na’na enejaton, na’na ewa’porojaton enapa (2 Korinte 1:24). O’win kapara enenen wa tokykon ukutyry wara, iwara enapa kyno’mikaton pa’poro Tamusi na’nanopy’san ukutome (Tauroto’kon 27:23).

Tamusi nisanory kapyry poko na’na emepaton. Aremi wararo, mo’karon uwapoto’san morokon Tamusi na’nanopy’san wota’nanopyry undymaton moro na’na namyikarykon pori’tomatome (Apojoma’san 15:32). Mosaron wokyryjan asin pe imero moro oka ekaronamon me mandon, na’na maro kyny’saton, na’na emepaton enapa pa’poro roten oka ekaropory ta.

Na’na pori’tomaton. Iru’pa Jehowah maro na’na waitome, mo’karon uwapoto’san na’na erupaton moro Tamusi ety awongatopo auto ta na’na a’ta, kynosaton pai na’na etawa. Na’na epanosaton, na’na turu’san andymotome moro Tamusi karetary maro (Jakobus 5:14, 15).

Moro Tamusi na’nanopy’po enery ta ro, kurando enapa emamikon man, tomone mandon, morokon ro tu’tanone kynyjaton ijururukon pinanon enapa. Kawo mosaron pirynano, « na’na poko o’mikatonon » apyijan na’na (1 Tesalonika 5:12, 13).

• Otypan amaminano kasaton ko mo’karon uwapoto’san ?

• Otypan opano enesanton ko o’win o’win pai na’na wa ?