OMEPATOBO 2
Noky neko mo’ko iporono Tamusi me na ?
1. Otonome Tamusi po’ponaka roten kywokunamarykon’na ?
Mo’ko iporono Tamusi, pa’poro otykon kanenymbo mo’ko man. Koromoneno waty man ekosa imatyry waty ro ry boman enapa (1 Timoteus 1:17). Mo’ko ro morokon kurangonon oka epopojan kywaine moro Tamusi Karetary ta (1 Timoteus 1:11). Mo’ko waro amano yrypo’ke kywaine mo’ko roten po’ponaka kywokunamarykon’man. — Jesus nenepo’po 4:11 erubako.
2. One wara neko Tamusi na ?
Amy pairo kari’na Tamusi anenepa nanen’man o’win akapo me iwairy ke, tauropo-moro-man amy pari’pyn amano nono tu’po nokon amandonon kopo (Johanes 1:18 ; 4:24). Se’me te morokon initjapysan maro ukutyry taro kytaton. Eneko tyre pa’poro wonatobo epery, tjupu epyryry tyse imero o’to kyngaton moro aipynanon me iwairy poko, tywonumengabore iwairy enapa. Pa’poro potome ero nono wairy ipanatory enepojan. — Rome 1:20 erubako.
Tamusi ukutyry taro noro mandon moro ikaretary ta. Itaro kenekari’san kywaine oty pynary i’wa, oty anipynapa iwairy enapa, one wara mo’karon amandonon enary i’wa, irombo o’to iwairy pyime otykon wokapyry’jako. — 1 Johanes 4:8 ; Jakobus 4:6 erubako.
3. Tamusi toty ne’na ?
Jesus tyka’man : « Kapukon tano Papa, oro ajety tykuranando nainen » (Mateus 6:9).Tamusi pyime totydo man, o’win roten te ety nero man. Atowa roten aurananon ta tajato man. Paransisi auran ta kenejatojaton « Jehowah ». Amykonymbo kenejatojaton « Yahvé ». — Psaume 83:18 erubako.
Pyime moro Tamusi karetary ta, Tamusi ety typedakama’man, jopoto me i’matypyn me. Aronge koromonene moro Tamusi Karetary ta, Tamusi ety tywaije tera man 7 000 boto. Jesus wa ero atywanon takaro tywaije man mo’karon kari’na erupary jako ty’wa Tamusi poko. — Johanes 17:26 erubako.
Eneko moro ikapypo video Tamusi nare toty ne nan ?
4. Jehowah nare tuwaro’na kypokoine ?
Mo’se typyny jumynanon wara Tamusi oty kasan akorepe iru’pa kywaito’ko’me.
Pyime ata’karykano wairy ke nare Jehowah tuwenge na kypokoine ? Amy konymbo kenekano’san ku’kudokome te ka’karykaporykon i’wa, iporono waty te man. — Jakobus 1:13 erubako.
Tamusi, mo’ko kari’na wa moro inisanory wara iwairy tyje man (anisanory wara oty kapyry). Ajapokupe e’i’pana iwyry kapa Tamusi pitjoryme awairy (Josué 24:15) ? Moky kari’na ta’sakarykon poko ja’wan kasaton, iro ke ro pyime amandonon kyno’takarygaton. Jehowah emambopa aitono kotanory enejan. — Genèse 6:5, 6 erubako.
Jehowah irombo tuwaro man kypokoine. Tawa’pore kamamyrykon’se’man. Akorepe ne waty noro morokon ata’karykano atjeka’tan, mo’karon kakarykabonamon maroine. Tywaimomokyry wara ro morokon otykon wa kopopojaton ko’i roten noro. Moro 8 omepatobo kenenepotan otonome morokon ja’wan kapopory i’wa. — 2 Petrus 2:9 ; 3:7, 13 erubako.
5. One wara ko Tamusi eponaka kywopyrykon’na ?
Tamusi Jehowah kykomaton te’po naka kywotokome, erupary ta. O’win ne ro rybo ajata tuwaro apoko man (1 Johanes 5:14). Kyja’wanykonymbo kary taro enapa man. Kywomykarykon enejan inisanory wara rypo kywaito’ko’me iro ro rybo itjundapa kataine. Tyja’wange kywairy kon se’me, Tamusi maro ipororo iru’pa kywairy kon taro kytaton. — 1 Johanes 1:9 ; Jakobus 4:8 erubako.
Jehowah wa moro amanon irypo ke kywaine, mo’ko roten pynary man kywaine amy tera kari’na pynary kopo (Markus 12:30). Ipynary enepory jako o’waine iru’pyn me imero mukutaton irombo morokon iwoturupodopo mitataton, eponaka enapa motaton. — 1 Timoteus 2:4 ; 1 Johanes 5:3 erubako.
