OMEPATOBO 8
Otonome ko Tamusi moro yja’wan, ata’karykano enapojan ?
1. One wara ko moro yja’wan tywosenepo tywaije na ?
Tamusi’wa mo’karon amandonon wa ero nono tundymapo man asitjo akore’pe, enepotome ywaine morokon yja’wangon kuramary upiry iwaine aseke ro.
Moro yja’wan tywosenepo tywaije man ero nono tu’po, o’win boto Satan enapitjapombo do. Koromone o’win iru’pyn apojonanome tywaije man « moro iporono ta te ainobo pa tywaije man » (Johanes 8:44). Moro kurano Tamusi roten napiry man’se tywaije man tywanome. Tonapyika man mo’ko o’win koromono woryi Eva wa, tywa iwepanamatome Tamusi wa kapyn te. Adam wa Eva tywekena’man : mo’ko enapa tywepajanaka’man Tamusi wa. Moro wara iwe’i’po wa ro ata’karykanon, romonon tanese’man. — Genèse 3:1-6, 19 erubako.
Eva apokumapoke typanajanare iwaitome Tamusi’wa, Satan’wa mo’karon kari’na tapokuma man mo’ko kawono Tamusi Potosu Jopoto po’ponaka kawo iwotapotokome. Pyimanon amandonon te o’win tywaije mandon Tamusi se pa tyjopotory ko me. Moro wara te Satan « nono jopotory me tywaije man ». — Johanes 14:30 ; 1 Johanes 5:19 erubako.
2. Moro Tamusi nikapypo nare yja’wame tywaije bo me na ?
Pa’poro Tamusi nikapy’san iru’pa imero tywaije man. Mo’karon amandonon apojonanon maro iru’pyn imero Tamusi wa tywepanamarykon taro tywaije mandon (Deutéronome 32:4, 5). Tamusi wa kynisanorykon, iru’pyn, yja’wan kapyry maro tyje kytaton. Moro kynisanorykon kapyry’ro Tamusi pynary enepojan kywaine. — Jakobus 1:13-15 ; 1 Johanes 5:3 erubako.
3. Otonome erome no waro Tamusi’wa ata’karykanon tyje na ?
Jehowah’wa mo’karon amandonon tawongapo tywaije man typopo naka, o’win kurita tyje i’wa man atjekatome. Oty boko ? Enepo to me amy pairo amandonon tamamyry arory upi’jan Tamusi waty a’ta tymaro (Ecclésiaste 7:29 ; 8:9). 6 000 siriko ywairy taro nasenepo’i : nono tu’po nokon jopotokon itjundapa tywaije mandon morokon warinu, owonon, emambopa aino, anyky kary poko. — Jérémie 10:23 ; Rome 9:17 erubako.
Pyime amandonon Tamusi’wa tundymarykon apyijaton amy me terapa ywairy ke, mo’karon nono tu’po jopotokon nundymary wara e’i’pa man (Isaïe 48:17, 18). Akore’pe ne waty no ro Jehowah pa’poro nono tu’po nokon nundymary aike’katan. Mo’karon Tamusi’wa tundymarykon’se mandon inaron roten ero nono tu’po kenemandaton (Isaïe 11:9). — Jesus nenepo’po 11:15 erubako.
Eneko moro ikapypo video O’tono’me ko Tamusi morokon ata’karykano enapojan ?
4. Oty kapopojan ko kywaine ensi’ma Tamusi wairy ?
Satan tyka tywaije man amy pairo kari’na Jehowah apojon me e’i’pa kynaitan ipynary ta. Ero onapy enepory’se mandon ? Ikapyry taro mandon ! Ensi’ma Tamusi wairy ke ro kenenepojan moro inundymary’se kywairykon, moko kari’na nundymary’se pai. Moro kamerykon kynenepojan otypan wyino kywairykon. — Job 1:8-12 ; Proverbes 27:11 erubako.
5. One wara ko Tamusi apyiry taro mandon ajopotorykon me ?
Moro o’to kywairykon kenenepojan Tamusi’se kywairykon kyjopotorykon me.
Tamusi kysapyijaton kyjopotory kon me, iro’ne ro Tamusi Karetary tanon kapyry ke (Johanes 4:23). Jesus we’i’po wara, Satan wyino tyse kytaisen moro inundymary wyino, morokon warinu wyino enapa. — Johanes 17:14 erubako.
Typanatory ke Satan morokon yja’wan otykon kapojan kywaine. Anikapypa kataine mo’karon kasakarykon komorykon kakimarykon taro mandon (1 Petrus 4:3, 4). Iroke ro enery kywaine man : Tamusi pynanamon maro o’win kywairykon na ? Morokon kurangon omenanon, aipynanon inyry nare kysapyitaton ? A’a awykary jako, mo’ko Satan wykapo amy pairo kari’na epanamapa kanaitan Tamusi’wa, enabiry kysenepotaton moro ku’kuto’kon epory jako kywaine. — 1 Korinte 6:9, 10 ; 15:33 erubako.
Moro Tamusi pyny mo’karon amandonon poko kenenepojan moro yja’wan ata’karykanon akepyry. Mo’karon amyikary eneponamon moro i’matypyn amanon epotaton ero nono tu’po. — Johanes 3:16 erubako.
