OMEPATOBO 7
Oty ko moro na moro Tamusi Nundymary ?
1. Oty ko moro na moro Tamusi Nundymary ?
Oty ko Jesus yjan o’win iru’pyn Potosu Jopoto me ? (MARKUS 1:40-42).
Moro Tamusi Nundymary amy kawono oty undymatopo moro man. Moro ro pa’poro erokon nono tu’po nokon jopotokon nundymary ypedakamatan iwara te moro Tamusi nisanory kapobotan kapu ta nono tu’po enapa. Ero iru’pyn oka moro man ! Akorepe ne waty noro ero undymatopo ro iru’pyn me imero amandonon undymatan. Pa’poro nono tu’po amandonon ytan o’win iwaitoko me. — Daniel 2:44 ; Mateus 6:9, 10 ; 24:14 erubako.
O’win undymatopo tyjopodoke iwairy man. Jehowah’wa moro Tynundymary jopotory me Tymuru Jesus Kristus tyje man. — Jesus nenepo’po 11:15 erubako.
Eneko moro ikapypo video Oty ko moro nan moro Tamusi Nundymary ?
2. Oty poko Jesus iru’pyn potosu jopoto me tyje na ?
Mo’ko Tamusi Ymuru roten iru’pyn Jopoto me tyje man irupa iwairy ke kurangonon otykon ajomary ke i’wa (Johanes 1:14). Itiakaro panape imero man mo’karon amandonon epanotome, kawo wyino poro ero nono undymatan. Iwara ro romonon wyino tawomypo mero kawonaka tywonu’se man irombo Jehowah apo’tun wyino tywotandymo man jopoto me tyry taro naka (Simosu 10:12, 13). Irombo mero Tamusi’wa tynundymary tyje man ainaka. — Lukas 1:32, 33 erubako.
3. Noky ko Jesus maro nono undymatan ?
Amykon ananopy’san mo’karon ro tajatomandon « typo Tamusi nyry’san » kawo Jesus maro Jopoto me kynaitaton (Daniel 7:18). Mo’karon koromoneno typo yry’san Jesus nemepa’san tamyikaporamon mo’karon tywaije mandon. Irombo Jehowah’wa amykon noro tamyikaporamon wokyryjan, woryijan tyje man iranakaine ero me no waro. Jesus awomypo wara, o’win akanano ja’munano maro tawonje mandon. — Johanes 14:1-3 ; 1 Korinte 15:42-44 erubako.
Oto ro amandonon ko nytaton kawo naka ? « Pyime ne waty » tyka man Jesus (Lukas 12:32). Pa’poro 144 000 kynaitaton moro nono undymatome Jesus maro. — Jesus nenepo’po 14:1 erubako.
4. Oty ko tywokase na Jesus’wa tynundymary amopo mero ?
Moro Tamusi Nundymary ty’wotamo’man 1914 * jako. Koromoneno mo’ko Jopoto Jesus emamyi na’sen tywaije man mo’ko Satan ema’po nono tu’po naka. Potome imero tare’ke tywairy ke Satan’wa pyime imero yja’wangon otykon tanepo man nono tu’po naka (Jesus nenepo’po 12:7-10, 12). Irombo poro katano’wa mo’karon amandonon tunsi’ko imero man. Warinu, kumyno, anyky kynota’kutan, tytyty pa’poro « erokon ro kynenepojan » tyse waty tera moro Undymatopo’ wa tainaka ero nono otyrykon ipinary. — Lukas 21:7, 10, 11, 31 erubako.
5. Oty kasan ko moro Tamusi Nundymary ?
Wara ro oka ekarory ke ero nono tu’po moro Tamusi Nundymary pyimanon atu’kupopyn kari’na apyimy enano’san o’win iwaikome. Pyime imero Jesus pyitoryme kynajaton. Moro Tamusi Nundymary kununedaton ero nono i’matyry’wa ro. Pa’poro moro undymatopo nyry’man apyiry’se ajataine ero mero omepatokon typanare Jesus pyitoryme awairy kon poko. — Jesus nenepo’po 7:9, 14, 16, 17 erubako.
1 000 siriko iwairy taro moro Tamusi Nundymary moro koromoneno Tamusi wonumengatopombo katan mo’karon amandonon wa. Pa’poro ero nono iru’pyn pyroro (paradis) me kynokatan. Morombo mero ko’wu Jesus, tyjumy’wa moro Inundymary ytan rapa (1 Korinte 15:24-26). Amy na o’win anerupary’san moro Tamusi Nundymary poko ? — 2 Petrus 3:13 erubako.
^ § 6 Moro Tamusi Karetary wykadopombo moro 1914 poko mengary jako moro kareta enetokon Qu’enseigne réellement la Bible ?, pages 215-218.
