Llega el tiempo, el de tuyu maga anak hay experiencia maga problema. Paquemodo tu puede ayuda kanila?

•  Si cosa tu debe sabe

•  Si cosa tu puede hace

 Todo kita ta falla tiene vez. El Biblia ta habla que “todo kita tan kamali.” (Santiago 3:2, ftn., NWT) Tan kamali tambien el maga bata. Pero si falla sila, tiene este buen efecto cay ayuda este kanila aprende si paquemodo enfrenta con el maga dificil situacion. Nuay nace el maga bata que tiene este abilidad pero puede se sila aprende. “Iyo y de mio marido ya observa que mas bueno enfrenta el maga bata con el problema en vez pretende que nuay se sucede,” ya habla el un nana que si Laura. “Ta puede sila aprende si paquemodo aguanta si gendeh ta sucede el cosa sila ta expecta.”

 Manada bata el no sabe si paquemodo enfrenta con el problema. El cuanto no sabe si paquemodo enfrenta con el problema cay ta manda sinti el diila mayores que nuay sila cosa ya hace mali. Por ejemplo, si el diila anak ya ricibi bajo grado, el cuanto maga mayores ta disculpa dayun con el maestro. Si yan peleajan el bata pati el de suyu amigo, ta disculpa dayun el maga mayores con el amigo del bata.

 Pero si pirmi ta consinti el maga mayores con el diila maga anak, paquemodo el maga bata queda responsable na maga kamali que ya hace sila?

•   Enseña con el de tuyu maga anak que tiene consequencia el cosa sila ta hace.

   El Biblia ta habla: “Cosa el gente ta siembra, ese tamen ele ay cosecha.”​—Galacia 6:7.

   El todo cosa kita ta hace tiene resulta. Si tiene cosa ya quebra, necesita kita paga para arregla con ese. Si hace kita maga kamali, tiene este mal resulta. El maga bata debe sabe que tiene resulta el diila maga accion y debe sila queda responsable con ese. Entonces, evita disculpa con otro o consinti con el de tuyu maga anak. Sino, permiti kanila que experiencia el mal resulta del diila accion depende na edad del bata. Siempre, debe sila entende que el cosa sila ta experiencia amo el resulta del diila maga kamali.

•   Ayuda con el de tuyu maga anak busca maga solucion.

   Principio na Biblia: “El recto puede tumba siete beses y hay levanta le otravez.”​—Proverbio 24:16.

   Duele si ta falla kita pero gendeh se amo el fin del mundo. Ayuda con el de tuyu maga anak que man focus busca maga solucion en vez de reclama na cosa ya sucede. Por ejemplo, si el de tuyu anak nuay pasa na un test na escuela, ayuda con ele entende si paquemodo le puede cambia con el de suyu situacion por medio que estudia pa y hace enbuenamente na sunod. (Proverbio 20:4) Si el de tuyu anak mujer y el de suyu amiga yan peleajan, ayuda con ele mira si paquemodo le pidi perdon maskin quien pa el tiene culpa.​—Roma 12:18; 2 Timoteo 2:24.

•   Ayuda con el de tuyu maga anak queda modesto.

   Principio na Biblia: “Ta habla yo con todo y cada uno de ustedes: No ustedes man por demas na de ustedes paca-importante.”​—Roma 12:3.

   Si habla tu con el de tuyu anak que mas bueno le que con otro, gendeh se realistico y gendeh se puede ayuda con ele. Gane, maskin el maga bata que bueno na escuela, gendeh pirmi ta tiene perfecto grado y maskin el maga bata que bueno na un sport, gendeh pirmi ta ganá. Si el maga bata tiene modesto mirada na diila mismo cuerpo, mas puede sila enfrenta con el diila maga problema.

   El Biblia ta habla que el dificultad puede kanaton hace fuerte y puede kanaton ayuda aguanta. (Santiago 1:2-4) Maskin maka-luya si falla y tiene problema, puede tu ayuda con el de tuyu maga anak tiene balance mirada na de suyu situacion.

   Ta necesita tiempo y esfuerzo para enseña con el de tuyu maga anak que tiene abilidad. Ansina tambien el necesita para enseña kanila si paquemodo enfrenta con el diila maga problema. Pero gendeh se sayang cay puede se sila usa si queda ya sila adulto. “El maga teenager quien sabe enfrenta con el diila maga problema posible gendeh hace el maga cosas que pone kanila na peligro si tan pressure ya sila,” asegun na libro Letting Go With Love and Confidence. “Grande el posibilidad que mas preparao sila si experiencia sila maga nuevo situacion o cosas que gendeh sila ta expecta.” Si ya puede sila enfrenta con el maga dificil situacion, hay ayuda tambien se kanila si queda ya sila maga adulto.

 Sugestion: Dale mira buen ejemplo. Acorda que si sabe tu si paquemodo enfrenta con el de tuyu maga problema, hay puede tambien tu ayuda con el de tuyu maga anak si paquemodo sila mismo enfrenta con el diila maga problema.