Por causa na tecnologia, posible expecta el de tuyu amo, maga uban na trabajo o maga cliente que pirmi tu available maskin cosa hora o dia. Como resulta man dificil tu man balance o hace separta con el de tuyu trabajo na otro aspeto del de tuyu vida, incluido el de tuyu matrimonio.

•  Si cosa tu debe sabe

•  Maga sugestion para queda balance na trabajo y matrimonio

•  Si cosa el man maridable ta habla

•  El cosa ustedes debe discuti

•   Por causa na tecnologia, posible man dificil tu hace separta el de tuyu trabajo na de tuyu matrimonio. Poreso el cada llamada, e-mail o text que ricibi tu maskin gendeh tiempo de trabajo posible queda igual na un emergency que debe tu contesta dayun.

   “Ahora, dol dificil ya dale tiempo para man junto con el de tuyu familia si llega tu na casa despues del trabajo cay ta ricibi tu siempre e-mail y llamada acerca na trabajo. Poreso, ta ulvida tu dale tiempo con el de tuyu marido o mujer.”—Jeanette.

•   Para queda balance na de tuyu trabajo y de tuyu matrimonio, tiene tu cosa debe hace. Si gendeh tu plaña, el de tuyu trabajo posible hay saca con el tiempo que para era na de tuyu marido o mujer.

   “Mas mucho, el de tuyu tiempo para na de tuyu marido o mujer el una tu ta sacrificia cay ta pensa tu, ‘Ay, entende lang se ele y perdona conmigo. Luego ya lang yo con ele dale tiempo.’”—Holly.

•   Hace prioridad con el de tuyu matrimonio. El Biblia ta habla: “El cosa ya uni el Dios no puede el gente separta.” (Mateo 19:6, El Nuevo Testamento na Chavacano) Si gendeh tu permiti que el gente “separta” contigo na de tuyu marido o mujer, porque man tu permiti que hace se el de tuyu trabajo?

   “El cuanto maga cliente ta pensa que ciendo ta paga sila contigo, debe available tu si necesita sila contigo. Cay ya hace yo prioridad con el de mio matrimonio, ta habla yo kanila que gendeh yo available si gendeh dia de trabajo pero hay llama lang yo kanila.”—Mark.

   Pregunta na de tuyu mismo cuerpo, ‘Puede ba mira na de mio maga accion que mas importante conmigo el de mio matrimonio contra na de mio trabajo?’

•   Si posible, no acepta omento trabajo. El Biblia ta habla: “El sabeduria talli con el maga modesto.” (Proverbio 11:2) Si modesto tu o sabe el de tuyu limitacion, hay puede tu realiza que mas bueno si gendeh ya lang tu acepta con el cuanto trabajo o dale se con otro.

   “Tubero yo, poreso si tiene necesita dayun con el de mio servicio, natural lang que man stress le si gendeh yo se puede hace. Si gendeh yo se puede hace na hora que necesita le, ta recomenda ya lang yo otro tubero.”—Christopher.

   Pregunta na de tuyu mismo cuerpo: ‘Preparao ba yo gendeh acepta omento trabajo si causa se que sinti el de mio marido o mujer que nuay yo tiempo para con ele? Man uyun ba el de mio marido o mujer na de mio contestacion?’

•   Man schedule tiempo para man junto. El Biblia ta habla: “Tiene justo tiempo para na todo cosas.” (Eclesiastes 3:1) Si bien manada el de tuyu trabajo, amo se el tiempo que necesita tu plaña y dale tiempo con el de tuyu marido o mujer.

   “Si bien ocupao kame dos, tan sabut kame tiempo para man junto aquel nuay quien destorba kanamon—maskin para come o camina na aplaya.”—Deborah.

   Pregunta na de tuyu mismo cuerpo: ‘Tan schedule ba yo tiempo para man junto na de mio marido o mujer aquel nuay quien destorba kanamon? Man uyun ba el de mio marido o mujer na de mio contestacion?’

•   Man off con el gadget. El Biblia ta habla: “Asigura el maga cosas que mas importante.” (Filipo 1:10, NWT) Puede ba tu man off tiene vez con el de tuyu gadget para gendeh contigo puede destorba el maga text o llamada acerca na de tuyu trabajo?

   “Ta hace gayot yo grande esfuerzo para descanza trabaja na especifico hora. Despues, tan off yo con el maga notification na de mio cell phone.”—Jeremy.

   Pregunta na de tuyu mismo cuerpo: ‘Ta sinti ba yo que debe pirmi conmigo puede man contact el de mio amo o cliente si necesita sila conmigo? Man uyun ba el de mio marido o mujer na de mio contestacion?’

•   Queda razonable. El Biblia ta habla: “Dale mira el de tuyu pagka-razonable.” (Filipo 4:5, NWT) El deverasan, posible necesita trabaja el de tuyu marido o mujer na tiempo que puede era ustedes man junto. Por ejemplo, na trabajo del de tuyu marido o mujer, baka necesita que puede con ele man contact maskin despues del hora de trabajo. No pidi con ele mas pa na cosa el razonable.

   “Tiene diutay negocio el de mio marido y manada beses le necesita trabaja maskin despues del hora de trabajo. Tiene vez ta consumi yo pero ciendo grande siempre el tiempo que tan junto kame, OK lang.”—Beverly.

   Pregunta na de tuyu mismo cuerpo: ‘Tiene ba yo consideracion na trabajo del mio marido o mujer y gendeh ta pidi mas pa na cosa le ta puede dale? Man uyun ba el de mio marido o mujer na de mio contestacion?’

 Una, el cada uno de ustedes puede considera el siguiente maga pregunta. Despues, junto discuti con el de ustedes maga contestacion.

•   Ya habla ya ba contigo el de tuyu marido o mujer que ta trabaja siempre tu na casa? Si oo, uyun ba tu con ese?

•   Ta mira tu, na cosa maga aspeto tu necesita hace cambio para queda tu mas balance?

•   Ya puede ba tu pensa que el de tuyu marido o mujer dol gendeh ta puede deja con el de suyu trabajo “na trabajo”? Si oo, ta puede ba tu acorda si na cosa maga ocasion quel?

•   Cosa maga cambio, si tiene, el quierre tu mira que hace el de tuyu marido o mujer para queda le mas balance?