•   Quierre tu maga biglaan caminada pero quierre le que plañao todo.

•   Silencio tu clase de persona pero ele macuento.

 Tiene ba custumbre el de tuyu marido o mujer que ta consumi tu? Si man focus tu con ese, peligroso se para na de ustedes matrimonio. Gane, el Biblia ta habla que “el quien ta discuti con ese pirmi ta hace separta con el maga cerca man amigo.”—Proverbio 17:9.

 En vez de deja que tene ustedes problema por causa na un custumbre que ta consumi tu, baka puede tu mira con ese custumbre na positivo manera.

Na este articulo

•  Positivo mirada na maga custumbre que ta consumi tu

•  Si cosa el man maridable ta habla

•  El cosa ustedes debe discuti

 El custumbre del de tuyu marido o mujer que ta consumi tu posible tiene coneccion na un custumbre que ta gusta tu. Considera con el tres ejemplo:

 “Pirmi tarda ta move el de mio marido y tarda le ta acaba si ta prepara kame para na diamon caminada. Pero por causa con ese custumbre, paciencioso le—maskin conmigo. Tiene vez ta consumi yo cay tarda ga’t le pero parte se del calidad que quierre yo acerca con ele.”—Chelsea.

 “El de mio mujer meticulosa si tan plano; quierre le que controlao le con el todo poreso tiene vez ta consumi yo. Pero cay ta pone le atencion con el todo detalle, asigurao yo que ya prepara le el todo.”—Christopher.

 “Tiene vez, ta consumi yo cay dol nuay queber el de mio marido acerca na maga cosas. Pero, relax le clase de persona y uno se del cosa yo ya gusta con ele. Bilib yo cay ta puede le esta calmao maskin na maga situacion que maka-stress.”—Danielle.

 Como cosa ya aprende si Chelsea, Christopher y Danielle, el negativo custumbre del un persona posible un aspeto lang del un buen calidad que tiene le. Poreso, gendeh tu puede quita con el de suyu negativo custumbre si gendeh incluido el de suyu buen custumbre. Igual se si paquemodo gendeh tu puede quita con el un side lang del un sencillo.

 Siempre, tiene cuanto maga custumbre que nuay positivo aspeto. Por ejemplo, el Biblia ta habla que el cuanto maga gente “pronto rabia.” (Proverbio 29:22) Si ansina el un persona, debe le hace el todo para gendeh “tene agravio con uno y otro, ni perde el paciencia, ni alza el voz, ni insulta de palabra.” a—Efeso 4:31, El Nuevo Testamento na Chavacano.

 Pero si maka-consumi lang el un custumbre, sigui con el consejo del Biblia: “Aguanta . . . con uno y otro si uno tiene reclamo con otro.”—Colosa 3:13.

 Mas pa, pricura mira si cosa el positivo aspeto del de suyu custumbre. Gane, posible que amo se el cosa tu ya gusta con ele de antes. El un marido que si Joseph ya habla, “Si tan focus tu na un custumbre que maka-consumi, dol ta nota lang tu con el agudo parte del un diamante pero gendeh ta aprecia con el pagka-bonito de este.”

 Una, el cada uno de ustedes puede considera el siguiente maga pregunta. Despues, junto discuti con el de ustedes maga contestacion.

•   Tiene ba custumbre el de tuyu marido o mujer que dol ta causa problema na de ustedes matrimonio? Si tiene, cosa se?

•   Malo ba gayot ese custumbre o maka-consumi lang?

•   Tiene ba positivo aspeto ese custumbre? Si tiene, cosa se y porque tu ta aprecia con ese aspeto del personalidad del de tuyu marido o mujer?