Manada man maridable el gendeh tanto ta puede man cuento maskin junto sila. Porque?

•  Junto pero separtao—porque?

•  Si cosa tu puede hace

•  Si cosa el man maridable ta habla

•  El cosa ustedes debe discuti

•   Cansancia

   “Tiene vez, tiene kame tiempo para man cuento pero bien cansao el de mio marido o gaha iyo. Si cansao yo, unrato lang yo ta consumi na maga diutay cosas. Mas bueno pa mira ya lang kame TV.”—Anna.

•   Internet

   “Puede acaba el de tuyu tiempo na social media y na maga entretenimiento na Internet. Baka grande tiempo ya tu ta usa con ese y nuay mas tu tiempo para man cuento con el de tuyu partner. Dol gendeh siempre ustedes junto.”—Katherine.

•   Diferente el maga interes

   “Si ta bolbe el de mio marido estaba na trabajo, ta queda le ocupao hace el maga cosas le quierre. Ta hace le grande esfuerzo na trabajo poreso necesita tambien ele tiempo para na de suyu mismo cuerpo. Pero era tiene kame mas manada tiempo para na uno y otro.”—Jane.

•   Trabajo

   “Por causa na tecnologia, ta puede siempre kame trabaja maskin na casa. Manada beses ta usa yo con el de mio tiempo para contesta con el maga e-mail y text acerca na trabajo en vez de man junto con el de mio mujer.”—Mark.

•   Acorda que necesita ustedes dale tiempo para na uno y otro, y gendeh lang si cuando ustedes vacante.

   Principio na Biblia: “Asigura el maga cosas que mas importante.”—Filipo 1:10, NWT.

   Pensa este: El cosa tu ta hace ta dale ba mira que mas importante para contigo el de ustedes matrimonio contra na de tuyu trabajo o otro cosas que quierre tu hace? Sobra ya lang ba del de tuyu tiempo el ta dale tu na de tuyu marido o mujer?

   Sugestion: No lang basta espera que tiene tu tiempo. Man schedule tiempo para man junto con el de tuyu marido o mujer, y asigura que nuay cosa destorba con ustedes.

   “Alegre yo si ta plaña el de mio marido tiempo para kanamon lang dos. Ta sinti yo que especial yo y quierre le man junto conmigo. Por causa con ese, mas ta ama yo con ele.”—Anna.

•   Aprende larga anay con el de tuyu maga gadget.

   Principio na Biblia: “Tiene justo tiempo para na todo cosas.”—Eclesiastes 3:1.

   Pensa este: Si tan cuento con el de tuyu marido o mujer, pirmi ba ta perde el de tuyu atencion con ele por causa na text o notification?

   Sugestion: Pricura come junto maskin una vez na un dia—y deja con el de ustedes maga gadget na cuarto. Si ta come ustedes junto, tiene ustedes tiempo para man cuento acerca na de ustedes dia.

•   Si posible, junto man compra o hace maga trabajo na casa.

   Principio na Biblia: “El dos mas bueno que con el uno cay tiene sila buen premio na diila trabajo.”—Eclesiastes 4:9.

   Pensa este: Pirmi ba ustedes man maridable separtao tan compra o ta hace maga trabajo na casa?

   Sugestion: Man ayudajan ustedes—maskin na maga trabajo que puede lang hace el un persona.

   “El comprada, labada de plato, dublada de maga camisa, limpiada—mira con este maga cosas como oportunidad para man junto y gendeh como maga trabajo lang.”—Nina.

•   Queda razonable.

   Principio na Biblia: “Dale mira el de tuyu pagka-razonable na todo gente.”—Filipo 4:5, NWT.

   Pensa este: Paquemodo tu puede dale mira que razonable tu na cosa tu ta expecta na de tuyu marido o mujer?

   Sugestion: Man cuento para entende si cosa necesita el cada uno de ustedes. Decidi si paquemodo ustedes usa con el de ustedes tiempo na manera que igual ustedes queda alegre.

   “Mafuerza el de mio marido pero iyo gendeh cay tiene yo problema na salud. Ta habla yo con el de mio marido que man enjoy apuera y OK lang que esta yo na casa. Ta descanza lang yo mientras tan exercise le. Igual kame ta puede hace el cosa kame necesita poreso igual kame alegre.”—Daniela.

 Una, el cada uno de ustedes puede considera el siguiente maga pregunta. Despues, junto discuti con el de ustedes maga contestacion.

•   Ta mira tu, bastante ba el tiempo que ta dale ustedes con uno y otro ahora?

•   Cosa comendacion tu puede dale na de tuyu marido o mujer acerca si paquemodo le ta usa con el de suyu tiempo para man junto contigo?

•   Cosa el maga cosas que quierre era tu hace el de tuyu marido o mujer?

•   Pirmi ba ta perde el de tuyu atencion por causa na gadget si tan cuento contigo el de tuyu marido o mujer?

•   Paquemodo ustedes puede queda razonable na cosa ustedes ta expecta con uno y otro?

•   Cosa maga cambio ustedes puede hace na este semana para puede mas dale tiempo con uno y otro que nuay con ustedes ta destorba?