AYUDA PARA NA FAMILIA | HACE ENGRANDA CON EL MAGA ANAK
Si Cosa Debe Sabe el Maga Mayores Acerca na Day Care
El cuanto maga mayores quien ta trabaja ta decidi que imbia con el diila maga anak na un day-care center—un facilidad que ta semeja na un classroom. Bueno ba se para na de tuyu anak?
Maga pregunta que debe tu considera
Si pone tu con el de tuyu anak na day care, hay tene ba este mal efecto na de ustedes relacion? Posible. Na primer maga año del un bata, paspas tan develop el de suyu utuk y ta afecta se con el de suyu relacion con otro. Na ese tiempo, pricura pirmi man junto con el de tuyu anak.—Deuteronomio 6:6, 7.
El maga mayores quien ta considera que pone con el diila anak na day care debe pensa si paquemodo sila puede continua tene cerca relacion na diila anak.
Hay menora ba el de tuyu influencia na de tuyu anak? Posible. “Si pirmi tan junto el maga bata, mas grande el influencia diila na uno y otro,” ya habla el libro Hold On to Your Kids.
El maga mayores quien ta considera que pone con el diila anak na day care debe pensa si cosa sila hace para sila siempre el tiene de con todo grande influencia na diila anak.
Puede ba ese ayuda para mas facil ya para na de tuyu anak si principia le entra escuela? Amo se ta creé el cuanto. Mientras el otro ta habla que diutay lang el efecto del day care na abilidad del bata para aprende o nuay pa gane. Maskin cosa man el justo, el un child psychologist que si Penelope Leach ya escribi: “No pensa que el ‘educacion’ el de con todo puede ayuda con el maga bata na diila vida y no tambien pensa que mas bueno si mas temprano sila entra escuela. Cay si ta pensa tu se, dol ta hace tu de menos con el maga cosas que ya enseña tu con el de tuyu anak desde ya nace le.”
El maga mayores quien ta considera que pone con el diila anak na day care debe pensa si tiene ba gayot este beneficio o si necesita ba con este.
Posible ba que uno con ustedes man maridable esta lang na casa para cuida con el de ustedes anak? Tiene maga man maridable que dos sila el ta trabaja para tene mas manada sen o material cosas. Mas bueno ba si ansina?
El maga mayores quien ta considera que pone con el diila anak na day care debe pensa si puede ba sila menora con el diila gasto para el uno kanila puede esta na casa.
Antes tu decidi que pone con el de tuyu anak na day-care center, debe tu considera enbuenamente el maga positivo y negativo efecto de este. Paquemodo si despues tu se considera, ya puede tu mira que mas bueno el day care para na de tuyu anak?
Si cosa tu puede hace
El Biblia ta habla que “el sabio ta pensa antes hace paso.” (Proverbio 14:15) Base na ese principio, pensa enbuenamente si cosa clase de day care tu iscuji.
Sabe si cosa el de tuyu maga opcion
El cuanto mayores ta iscuji que pone con el diila anak na child-care home—un casa donde tiene uno o cuanto maga caregiver y diutay grupo de maga bata.
El otro ta iscuji que manda vicia con el diila anak na un pariente, na un caregiver quien ta queda junto kanila o un ayudante.
Todo opcion tiene maga positivo y negativo efecto. Puede tu man cuento na otro maga mayores quien tiene experiencia acerca na day care. El Biblia ta habla: “Sabio aquellos quien ta pidi consejo.”—Proverbio 13:10.
Paquemodo si ya decidi tu que pone con el de tuyu anak na day-care center? Na ansina situacion, . . .
Sabe acerca el facilidad
Tiene ba este licencia, ta sigui ba este na maga ley del gobierno? Cosa el reputacion de este?
Limpio ba y safe el facilidad?
Cosa el diila maga actividad para na maga bata? a
Sabe acerca na maga caregiver
Cosa training sila ya puede ricibi? Incluido aqui el early childhood education, first aid y CPR.
Puede ba tu chequia si tiene maga criminal record aquellos quien cuida con el de tuyu anak?
Pirmi ba ta cambia con el maga caregiver? Si ansina, pirmi necesita man adjust el de tuyu anak.
Paquemodo de manada bata ta mira el cada un caregiver? Si manada bata ta vicia el cada caregiver, posible que gendeh tanto puede dale atencion con el de tuyu anak. Siempre, el atencion que necesita el de tuyu anak ta depende na de suyu edad y na cosa le ta puede ya hace.
Conforme ba el maga caregiver que man cuento contigo si tiene tu o sila maga lingasa?
a Por ejemplo, ta manda lang ba sila mira TV con el maga bata o tiene sila maga actividad donde ta puede man ejercicio el maga bata y tiene cosa ta aprende?