Ya habla ba contigo el de tuyu marido o mujer que tan lingasa le acerca na de tuyu tomada? Si ansina, tiene cuanto cosas que debe tu considera.

Na este articulo

•  Ta afecta na matrimonio el sobra tomada de alcoholico tomada

•  Addict ya ba tu na alcoholico tomada?

•  Evita man razon

•  Si cosa tu puede hace

 El sobra tomada de alcoholico tomada puede resulta na manada problema na salud. Incluido alli el enfermedad na corazon y na higado, y cancer. Pero gendeh lang este ta causa problema na salud. Sino, ta afecta tambien este na matrimonio que puede causa para tene violencia adentro na familia, problema na financial, ta queda gendeh fiel na marido o mujer y divurcio.

 Si sobra el tomada de alcoholico tomada, el Biblia ta habla que “ta morde se como serpiente y ta hace se sale veneno igual como culebra.” (Proverbio 23:32) Paquemodo tu sabe que addict ya tu na alcoholico tomada?

 El siguiente pregunta puede ayuda contigo para sabe con ese:

•   Ta tormenta ba tu controla con el de tuyu tomada?

•   Pirmi ba tu ta pensa si cuando tu oleh puede toma?

•   Ta toma ba tu siempre maskin ta causa este problema na de tuyu vida, incluido el de tuyu matrimonio?

•   Ta queda ba malo el de tuyu resuello si ta pricura tu descanza toma?

•   Tan purpiajan ba ustedes del de tuyu marido o mujer acerca na de tuyu tomada?

•   Mas manada ya ba tu ahora ta puede toma contra de antes?

•   Pa-secreto ba tu ta toma na casa o na trabajo?

 Si oo el de tuyu contestacion na uno de ese maga pregunta o mas pa, posible que addict ya tu na alcoholico tomada.

 Tan lingasa ba el de tuyu marido o mujer acerca na de tuyu tomada? Si ansina, posible habla tu que gendeh gayot se un problema o baka pricura tu dale razon si porque tu ta hace con ese. Baka menta pa gane tu con otro, incluido con el de tuyu marido o mujer y habla:

•   “Si enbuenamente era el de tuyu tratamiento conmigo, gendeh yo toma.”

•   “Tan stress gayot yo na trabajo poreso necesita yo toma.”

•   “Manada yo conoce que mas fuerte pa ta toma contra conmigo.”

 Si ya puede tu habla igual ansina, posible gaha que mas importante pa contigo el de tuyu tomada contra tene alegre matrimonio? Pero cosa debe el mas importante?

 Principio na Biblia: “El hombre casao necesita . . . hace alegre con el disuyo mujer.”—1 Corinto 7:33, El Nuevo Testamento na Chavacano.

•   Oi con el de tuyu marido o mujer. Maskin pa dol sobra el reaccion del de tuyu marido o mujer acerca na de tuyu tomada, gendeh gaha mas bueno si hace tu maga cambio? Si gendeh tu con ese puede hace y ta continua tu siempre toma maskin pa tan lingasa ya le na de tuyu tomada, posible addict ya tu na alcoholico tomada.

   Principio na Biblia: “No ustedes busca el de ustedes interes lang, sino el interes del los demas.”—1 Corinto 10:24.

•   Man research. Para ganá na un guerra, el un soldao necesita sabe si cosa el tactica del de suyu contrario. Ansina tambien si na alcoholico tomada. Necesita tu sabe con el maga informacion acerca na adiccion na alcoholico tomada y el efecto de este na maga gente. Necesita tambien tu sabe maga efectivo manera para gendeh tu queda addict con ese y gendeh otravez toma por demas na futuro.

   Principio na Biblia: “No ustedes sigui na maga mal deseo del cuerpo que firmi ta pelea contra con [ustedes].”—1 Pedro 2:11.

•   Pidi ayuda. Tiene manada maga medical programa que tan focus si paquemodo ayuda con el un persona quien tiene problema na alcoholico tomada, igual na maga recovery program, treatment center y hospital. Puede tambien tu pidi ayuda na un mature amigo quien puede ayuda contigo entende si tiene pa otro maga razon que ta causa contigo para queda addict na alcoholico tomada. Y puede tu pidi ayuda de este persona si ta sinti tu que dol quierre tu bira na de tuyu vicio.

   Principio na Biblia: “El verdadero amigo ta ama na todo tiempo y un hermano quien ya nace para na tiempo de dificultad.”—Proverbio 17:17.

 Un serioso problema el sobra tomada de alcoholico tomada. Gendeh este dayun puede solva si le tu un corto articulo o habla, “Poco lang yo toma.” Acorda que gendeh lang este ta afecta con el de tuyu fisical salud sino ta afecta tambien este con el de tuyu matrimonio.

 Para na mas informacion: Le con el siguiente articulo para sabe si paquemodo el otro ya puede quita con el diila adiccion na alcoholico tomada.

 “Gendeh Mas Yo Violente”

 “I No Longer Feel Ashamed of Myself”

 “El Camino Ya Queda De Mio Casa”

 Y tambien, mira con el video ’Nuay Mas Yo Gana na De Mio Vida’