Na United States, del año 1990 hasta 2015, yan doble el numero de aquellos quien tan divurcio na edad de 50 año pa-arriba y yan triple de aquellos mas de 65 año el edad. Cosa el causa del divurcio entre na maga de edad? Cosa ustedes hace para puede evita que sucede este na de ustedes matrimonio?

Na este articulo

•  Cosa el razon si porque tan divurcio el maga de edad?

•  Si cosa tu puede hace

•  El cosa ustedes debe discuti

•    Mas mucho, tan divurcio el maga de edad por causa cay hinay-hinay ya queda frio el diila relacion. Mientras ta pasa el tiempo, el cuanto maga marido y mujer tiene ya diferente maga hilig y dol gendeh mas igual el cosa sila quierre. O cay gendeh ya ta queda junto kanila el diila maga anak, ya realiza sila que tan focus lang sila na diila responsibilidad como mayores y ya ulvida ya sila queda un buen marido y mujer.

•    Na reciente maga decada, aquellos quien ta considera el maga gente como maga experto na matrimonio, ta habla con el man maridable que man focus lang na diila mismo necesidad. Ta conseja sila con el maga marido y mujer que pregunta con el diila mismo cuerpo: ‘Alegre pa ba iyo na de mio matrimonio?’ ‘Ta hace ba se conmigo mas buen persona?’ ‘Ta puede ba dale conmigo el de mio marido o mujer con el de mio emocional necesidad?’ Manada gente ta creé que si “gendeh” el contestacion na uno de este maga pregunta, debe sila hace el de con todo bueno para na diila mismo cuerpo—man divurcio y principia un nuevo vida.

•    Para na maga gente gendeh mas malo el divurcio. El sociologist que si Eric Klinenberg ya habla, “De antes, si el un persona gendeh ya alegre na de suyu matrimonio y si quierre le man divurcio, necesita le dale valido razon. Pero ahora baliscat ya: Si gendeh tu alegre na de tuyu matrimonio, necesita pa tu dale razon si porque tu esta. Por causa se cay manada gente ahora el ta creé que el de con todo importante amo que hace si cosa el bueno para na de tuyu mismo cuerpo.” a

 Posible perde el cuanto problema si man divurcio el man maridable. Pero, ta introduci tambien este maga nuevo problema. Por ejemplo, asegun na un research “mas mucho na maga de edad quien tan divurcio ta experiencia problema na financial, especialmente el maga mujer.”

 Tiene pa tu otro debe considera. “Posible ya cambia el de tuyu vida pero igual siempre el de tuyu personalidad,” ya habla el libro Don’t Divorce. “Si comunicacion el problema entre na de ustedes matrimonio de antes, ya hace ba tu maga cambio si paquemodo tu ta comunica con otro? Cosa maga cambio ya tu ya hace na manera si paquemodo tu ta enfrenta maga conflicto?” b

•   Acepta que tiene gayot maga cambio. Nuay relacion que gendeh ta experiencia maga cambio. Posible ya cambia ya el relacion de ustedes man maridable cay gendeh mas ta queda junto con ustedes na casa el de ustedes maga anak o ya tiene ya ustedes otro maga hilig. En vez de esperanza que bira otravez el de ustedes situacion de antes, pensa si paquemodo queda mas enbuenamente el de ustedes situacion ahora.

   Principio na Biblia: “No habla, ‘Porque mas bueno pa de antes contra ahora?’ cay el gente sabio gendeh pregunta ansina.”—Eclesiastes 7:10.

•   Mentena con el de ustedes buen relacion. Baka puede tu hace si cosa el hilig del de tuyu marido o mujer, o invita con ele que hace con el un cosa que tan enjoy tambien tu. O gaha puede ustedes hace un nuevo actividad que igual ustedes tan enjoy. Dale tiempo que man junto para puede ustedes sinti que man maridable ustedes y gendeh lang maga man uban na casa.

   Principio na Biblia: “No ustedes busca el de ustedes interes lang, sino el interes del los demas.”—1 Corinto 10:24, El Nuevo Testamento na Chavacano.

•   Continua dale mira respeto. No deja que gendeh mas tu dale mira respeto con el de tuyu marido o mujer por causa lang cay dura ya ustedes tan junto. Continua converza con ele con respeto y pricura trata con ele na manera igual cuando man novio y novia pa lang ustedes. No ulvida habla “pabor” y “gracias.” Pirmi dale mira amor y expresa con el de tuyu apresacion na cosas que ta hace le para contigo.

   Principio na Biblia: Trata con uno y otro “con cariño.”—Efeso 4:32.

•   Acorda con el maga tiempo que alegre ustedes. Mira junto con el maga letrato del de ustedes casamiento o del otro maga ocasion que junto ustedes. Puede se ayuda para gendeh perde o bira otravez el de ustedes amor y respeto na de ustedes matrimonio.

   Principio na Biblia: “Cada uno de ustedes necesita ama con el disuyo mujer como ta ama le con el disuyo mismo cuerpo. Y el mujer necesita respeta con el disuyo marido.”—Efeso 5:33.