Manada man novio y novia el tan live in anay antes sila decidi casa. El cuanto ta hace con ese cay quierre sila mira si man tupajan ba sila y para queda sila mas alegre si casa ya sila. Un buen decision ba que man live in anay antes casa?

Na este articulo

•  Cosa el Biblia ta habla?

•  Hay queda ba tu mas preparao para na matrimonio si man live in anay ustedes?

•  Ta beneficia ba na financial si tan live in?

•  Si tan live in, puede ba se ayuda para evita casa na gendeh justo persona?

•  Tiene ba mas buen manera?

•   Gendeh aceptable con Dios que man sex el dos persona que gendeh pa casao. Por ejemplo, el Biblia ya habla: “Queda . . . lejos na maga immoralidad.” (1 Tesalonica 4:3, El Nuevo Testamento na Chavacano; 1 Corinto 6:18) Incluido aqui el sexual relacion del dos persona quien tan live in, maskin pa tiene sila plano casa. a El maga principio na Biblia puede ayuda con el man novio y novia que evita tene anak antes casa y con el otro maga negativo consequencia si tan live in.

•   El matrimonio amo un arreglamiento estaba con Dios. Cuando ya dale le casa con el primer man maridable, ele ya habla: “El hombre hay deja con el de suyu tata y nana y esta junto con el de suyu mujer y sila hay queda un laman.” (Genesis 2:24) Si casao el dos persona, mas puede sila sinti el amor y alegria na diila familia.

 Ese el cosa ta habla el cuanto. Ta sinti sila que bonito que experiencia anay sila hace trabajo junto na casa y conoce con uno y otro. Pero para tene alegre matrimonio, importante que tiene sila promesa con uno y otro.

 Cosa puede ayuda con el man novio y novia para queda determinao que esta junto, enbuenamente man el situacion o gendeh? Si man live in sila, dol ta mira sila con el diila relacion como un cosa que puede sila termina maskin cuando sila quierre y gendeh se buen manera para tene alegre matrimonio. Sino, hay queda fuerte el diila relacion si leal sila con uno y otro y si man ayudajan sila solva con el diila problema.

 Acorda: El man novio y novia quien tan live in gendeh ta prepara para na matrimonio sino ta prepara para man separtajan.

 Principio na Biblia: “Cosa el gente ta siembra, ese tamen ele ay cosecha.”—Galacia 6:7.

 Ese el cuanto ta habla. El un survey que ya hace el Pew Research Center na United States ya habla que maga cuatro na diez adulto el tan live in para puede man save sen. Pero despues man live in por cuanto tiempo, manada kanila el ya habla que gendeh pa sila preparao para casa por causa na problema na financial.

 Tiene pa otro problema si tan live in, especialmente para na maga mujer. Por ejemplo, si man separtajan, mas mucho el mujer el ta hace engranda con el diila anak.

 Acorda: Mas manada el mal resulta si tan live in el man novio y novia contra na maga beneficio que ta pensa sila.

 Principio na Biblia: “Yo, si Jehova, el de tuyu Dios, el quien ta enseña contigo para na de tuyu mismo beneficio.”—Isaias 48:17.

 Ese el cuanto ta habla. Pero, “aquellos quien tan live in mas mucho nuay puede realiza que mas tormento ya para kanila que man separtajan,” ya habla el libro Fighting for Your Marriage. Porque? El cuanto kanila posible discubri que gendeh sila tan tupajan con uno y otro. Pero por causa cay tiene ya sila maga obligacion, igual como tiene sila maga animal ta cuida, casa que tan renta o hay tene ya sila anak, el maga researcher ta habla que ta esta ya lang sila junto cay anad ya sila con ese y gendeh mas sila puede cambia con el diila situacion. b Este pa el cosa ya habla el libro Fighting for Your Marriage, “el cuanto quien quierre era man separtajan ya casa ya lang na uliji por causa cay mas facil ya kanila que esta junto.”

 Acorda: Si tan live in, en vez de puede hace un buen decision, mas tormento ya para contigo que sale na un gendeh buen relacion.

 Principio na Biblia: “El un sabio ta puede mira con el peligro y ta esconde. Pero el nuay experiencia ta continua y hay sufri na mal resulta.”—Proverbio 22:3.

 Puede tu evita con el maga problema que ta experiencia aquellos tan live in y tene un alegre matrimonio. Paquemodo? Si sigui tu con el maga principio na Biblia acerca na matrimonio. Dale bastante tiempo para conoce con el persona con quien tu quierre casa antes ustedes man junto como maridable. Si ta busca con quien casa, mas importante que igual el de ustedes principio y creencia contra na de ustedes sexual deseo.

 El Biblia ta contene maga consejo que puede ayuda contigo para tene fuerte y alegre matrimonio. c Por ejemplo, el Biblia ta contene maga principio que puede ayuda contigo para . . .

•   evita queda gendeh fiel

•   queda un buen marido o mujer

•   mira si gendeh justo para contigo el de tuyu novio o novia

 Para sabe pa mas acerca na este maga topico, mira con el seccion “Matrimonio y Familia” na jw.org.

 Principio na Biblia: “Todo el maga Escritura inspirao de Dios y puede gayot usa con provecho para insiña.”—2 Timoteo 3:16.