AYUDA PARA NA FAMILIA | HACE ENGRANDA CON EL MAGA ANAK
Protege con el De Tuyu Anak na Pornografia
“Sabe kame que bien peligroso el pornografia pero nuay kame realiza que bien facil lang gane para na diamon anak mujer que mira con ese.”—Nicole.
Na este articulo
Si cosa tu debe sabe
Posible puede mira pornografia el maga anak maskin bien bata pa sila. El maga experto ya habla que el average edad del maga bata ahora quien primer vez ya puede mira pornografia amo 11.
Puede mira el maga bata pornografia maskin pa gendeh sila intencional busca con ese. Por ejemplo, puede sila mira pornografia mientras ta hace research na Internet o si ta usa social media. Pronto lang sale el maga advertisement de pornografia mientras ta juga sila maga video game online. Otro-otro el forma del pornografia y el de con todo comon amo el maga letrato y maga video. Pero, facil lang tambien incuntra maga istoria de pornografia na Internet que puede le o oi el un persona por medio na audio recording.
Debe tambien acorda el maga mayores que puede ricibi maga mensaje de pornografia el diila maga anak maskin na diila cellphone. Na un survey que ya hace na mas de 900 maga jovenes, cerca 90 por ciento del maga mujer y cerca 50 por ciento del maga hombre el ya habla que pirmi sila ta ricibi maga letrato y video del maga gente sin camisa estaba na diila maga classmate.
Mas mucho del maga de con todo popular y facil incuntra pornografia ta dale mira violencia. Ese clase de pornografia ta contene violencia mas mucho na maga mujer.
Peligroso el pornografia na maga bata. El research ta dale mira que el maga bata quien ta mira pornografia tiene mas grande posibilidad experiencia con este maga cosas:
tene bajo grado na escuela
tene lingasa, depression y bajo mirada na cuerpo
pensa que normal lang que forza con otro que man sex kanila
Acorda: Peligroso gayot el pornografia para na maga bata y el maga mayores amo el quien mas puede protege kanila.
Principio na Biblia: “Este maga palabra que ta manda yo contigo ahora debe esta na de tuyu corazon y debe tu con este enseña na de tuyu maga anak y converza acerca con este si ta sinta tu na de tuyu casa y si ta camina tu na camino y si ta acusta tu y si ta levanta tu.”—Deuteronomio 6:6, 7.
Si paquemodo protege con el de tuyu anak na pornografia
Sabe si cosa tiene na cellphone del de tuyu anak. Considera si cuando y onde el de tuyu anak posible puede mira pornografia. Por ejemplo, ta puede ba le usa con el Internet durante el maga break na escuela?
Puede abuya el pornografia maskin onde
Sabe con el maga safety feature del de suyu cellphone y queda familiar na maga app que ta usa le y el maga juego que ta juga le. Por ejemplo, tiene maga cuanto app que tiene function donde ta perde lang el maga mensaje, letrato o video de pornografia despues del corto tiempo. Y manada ya ahora maga video game online onde el maga player puede mira pornografia y man sex mientras na juego.
“Ta habla yo este base na de mio experiencia: Si el de tuyu anak tiene cellphone, etu como un mayores debe sabe si paquemodo usa con ese, sabe con el maga setting que ta pone limitacion si cosa el de tuyu anak puede mira na de suyu cellphone (parental control) y si paquemodo chequia si cosa ta hace el de tuyu anak na de suyu cellphone.”—David.
Principio na Biblia: “El corazon del un gente que tiene entendimiento ta saca saber.”—Proverbio 18:15.
Hace con el todo que puede tu hace para gendeh puede mira pornografia el de tuyu anak. Hace maga manera para menora con el maga peligro. Por ejemplo: Man adjust con el setting na cellphone del de tuyu anak y el todo maga gadget na de tuyu casa para gendeh abuya maga pornografia. Man activate con el parental control. Y sabe con el todo maga password que ta usa el de tuyu anak.
“Ya puede yo mira que practical si usa con el parental control na diamon maga gadget, pone limitacion con el maga programa que puede mira el de mio anak na diamon smart TV y sabe el PIN del de suyu cellphone.”—Maurizio.
“Gendeh yo ta permiti con el de mio maga anak mira maga video na diila cuarto si cerrao el puerta. Si hora ya para durmi, gendeh yo ta permiti kanila que usa el diila maga gadget na diila cuarto.”—Gianluca.
Principio na Biblia: “El un sabio ta puede mira con el peligro y ta esconde.”—Proverbio 22:3.
Prepara con el de tuyu anak en caso puede le mira pornografia. “El cuanto maga mayores gendeh tan cuento con el diila anak acerca na pornografia cay ta pensa sila que imposible le se puede mira,” ya admiti el un nana que si Flavia. El otro maga mayores puede pensa, ‘Si hay man cuento yo con ese na de mio anak, baka hay busca le con este.’ Gendeh justo este clase de pensamiento. El maga sabio mayores ta enseña con el diila anak acerca con el maga peligro del pornografia antes pa le puede mira con ese. Paquemodo tu se puede hace?
Enseña con el maga bata si cosa sila debe hace si puede sila mira pornografia. Por ejemplo, puede sila cerra con el diila maga ojos o man off con el diila maga gadget. Y anima kanila que habla contigo si cosa sila ya mira o ya oi. a
“Ya principia kame man cuento acerca na maga peligro del pornografia cuando bien joven pa el de mio anak. Cuando maga 11 año le, ya abuya el advertisement del pornografia na juego que yan download le na de suyu gadget. Na maga advertisement, tiene tambien maga invitacion que imbia le con el de suyu maga letrato. Cay ya discuti ya kame si cosa hace, ya anda le conmigo dayun y ya habla conmigo si cosa ya sucede.”—Maurizio.
Principio na Biblia: “Enseña con el bata na justo camino; maskin queda man le viejo gendeh le hay disvia con ese.”—Proverbio 22:6.
Ayuda con el maga jovenes que resisti con el tentacion que mira, oi o le pornografia. Por ejemplo, puede tu ayuda con el de tuyu anak que prepara un contrata donde escribi le si cosa le hace si puede le mira pornografia y si porque le quierre hace con ese. Manda con ele inclui alli na contrata el maga consequencia si intencional le mira pornografia igual como perde el de suyu respeto na cuerpo, perde el confianza del de suyu maga mayores y queda malo el de suyu relacion con Dios. b
“Mientras ta engranda el maga bata, ayuda kanila que resisti el tentacion que mira pornografia. Puede sila hace se si pensa sila el maga consequencia de ese.”—Lauretta.
“Si el diamon maga anak ta entende gendeh lang el maga peligro del pornografia sino si cosa tambien ta sinti si Jehova acerca con ese, hay queda sila mas protegido.”—David.
Principio na Biblia: “El sabeduria amo un proteccion.”—Eclesiastes 7:12.
Pirmi man cuento. El deverasan, quierre el maga bata man cuento na diila maga mayores acerca na maga cosas que tiene que hace na sex, incluido el pornografia. “Ya aprende kame que [el maga bata] quierre pirmi man cuento acerca con ese maskin pa bien joven pa sila,” ya habla si Dame Rachel de Souza, Children’s Commissioner for England. “Quierre el maga bata man cuento acerca con este na manera que propio para na diila edad. Mientras ta engranda sila, necesita sila discuti el otro pa maga aspeto de ese.”
“Cuando ta engranda yo, tiene maga cosas que nuay man cuento conmigo el de mio maga mayores. Era ya queda kame mas comfortable man cuento acerca con este. Ahora cay un nana ya yo, ta hace yo el todo para pirmi man cuento na de mio maga anak acerca na sex na manera que sinti sila comfortable.”—Flavia.
Si el de tuyu anak ya puede mira pornografia
Esta calmao. Si ya discubri tu que el de tuyu anak ya mira, ya oi o ya le pornografia, pricura controla con el de tuyu reaccion. Posible ta sinti ya le triste, espantao o tan conciencia por causa na cosa ya sucede. Si rabia tu, baka queda lang mas umalin el situacion y baka gendeh mas le man cuento contigo acerca con este na futuro.
Principio na Biblia: “El gente tiene saber ta controla con el de suyu maga palabra y el gente tiene entendimiento hay esta calmao.”—Proverbio 17:27.
Sabe si cosa el deverasan. En vez de pensa que sabe ya tu si cosa ya sucede, pregunta para sabe si paquemodo el de tuyu anak ya puede mira pornografia. Por ejemplo, tiene ba quien ya imbia con ele el letrato o ele mismo el ya busca con este? Primer vez ba este ya sucede o ya puede ya le mira pornografia de antes? Tiene ba content filter o parental control na de suyu gadget? Si tiene, ya hace ba le manera para puede siempre mira pornografia? Acorda, el de tuyu goal amo que sabe si cosa ta sinti y ta pensa el de tuyu anak, gendeh para man interrogate con ele.
Principio na Biblia: “El laman del corazon del gente amo igual na hondo agua pero ta puede con ese tabia el gente quien tiene entendimiento.”—Proverbio 20:5.
Actua. Por ejemplo, si gendeh intencional ya puede mira pornografia el de tuyu anak, baka necesita tu man adjust con el parental control y filter na de suyu gadget.
Si ya sabe tu que intencional ele ya busca pornografia, dale amable pero franca disciplina. Para ayuda con el de tuyu anak evita con el pornografia, usa con el maga texto igual con el Job 31:1, Salmo 97:10 y Salmo 101:3. c Manda con ele sabe que hay man cuento ustedes cada semana para sabe el de suyu progreso y mira si tiene pa otro maga cosas que puede tu hace para ayuda.
Principio na Biblia: “No trata con el maga anak con valenterias, para no sila ataranta. En vez de ese, manda canila engranda con disciplina y instruccion que ta sale con el Señor.”—Efeso 6:4, El Nuevo Testamento.
a Para na maga sugestion si paquemodo man cuento con el de tuyu anak acerca na sex que propio na de suyu edad, mira con el articulo “Paquemodo el Maga Mayores Enseña con el Diila Maga Anak Acerca na Sexo?”
b Para na mas manada idea si cosa inclui na contrata, mira con el “How to Reject Pornography.”
c Puede tambien ustedes considera junto con el articulo “Why Reject Pornography?”
Baka Gusta Tambien Tu
CONTESTACION NA MAGA PREGUNTA ACERCA NA BIBLIA
Cosa Ta Habla el Biblia Acerca na Pornografia? Malo Ba el Cybersex?
Comon ya ahora el entretenimiento que tiene que hace na sexo. Quierre decir ba que aceptable ya este?
MAGA IMPORTANTE ENSEÑANZA NA BIBLIA
Un Culpa Ba con Dios el Pornografia?
Puede ba incuntra na Biblia el palabra “pornografia”? Paquemodo kita puede sabe si cosa el Dios ta sinti acerca na pornografia?