El usada de gadget puede ayuda para hace fuerte o hace malo con el de ustedes matrimonio. Na cosa manera puede este afecta na de ustedes matrimonio?

•  Si cosa tu debe sabe

•  Si cosa tu puede hace

•  Si cosa el man maridable ta habla

•  El cosa ustedes debe discuti

•   El balance usada de gadget puede ayuda na matrimonio. Por ejemplo, el cuanto man maridable ta usa con este para comunica con uno y otro mientras gendeh sila junto.

   “Un grande ayuda maskin el un simple text igual na ‘I love you’ o ‘I miss you,’ para queda cerca el man maridable.”—Jonathan.

•   El gendeh balance usada de gadget puede hace malo con el matrimonio. Por ejemplo, el cuanto pirmi ta usa con el diila gadget poreso gendeh ya sila ta puede dale atencion y tiempo con uno y otro.

   “Asigurao yo tiene maga tiempo que quierre conmigo man cuento el de mio marido pero pirmi yo ta usa con el de mio cellphone.”—Julissa.

•   El cuanto ta habla que puede lang sila man cuento con el diila marido o mujer mientras ta usa gadget. Pero, el sociologist que si Sherry Turkle ya habla que imposible el multitasking. Maskin ta pensa el maga gente que bueno el multitasking, gendeh se deverasan. Ele ya habla: “Mas ta queda gendeh bueno el resulta del diaton trabajo si hace junto con este na un tiempo lang.” a

   “Quierre gayot yo man cuento con el de mio marido si gendeh le ta hace otro cosas. Ta sinti yo que si ta usa le con el de suyu gadget, dol OK lang con ele que nuay yo.”—Sarah.

 Acorda: El manera si paquemodo tu ta usa con el de tuyu gadget puede ayuda hace fuerte o hace malo con el de ustedes matrimonio.

 Hace maga prioridad. El Biblia ta habla: “Asigura el maga cosas que mas importante.” (Filipo 1:10, NWT) Pregunta na de tuyu mismo cuerpo: ‘Talli ba na gadget el diamon tiempo y atencion que debe era para con uno y otro?’

 “Maka-triste mira que el un hombre y un mujer ta usa con el diila maga cellphone mientras ta come na restaurant—dos persona que pirmi ta mira na diila gadget. No quierre kita queda esclavo na gadget y ulvida el de con todo importante—el diaton relacion con uno y otro.”—Matthew.

 Hace maga limitacion. El Biblia ta habla: “Vivi gendeh como maga gente nuay juicio, sino como maga gente con buen juicio quien ta usa el tiempo enbuenamente.” (Efeso 5:15, 16, El Nuevo Testamento na Chavacano) Pregunta na de tuyu mismo cuerpo: ‘Puede ba yo dale especifico tiempo para le y contesta con el maga text o email que gendeh tanto importante, en vez de contesta dayun con este?’

 “Ya puede yo mira que mas bueno si man silent mode con el cellphone y contesta con el maga mensaje na mas conveniente tiempo. Ralo lang man tiene importante quien ta llama, tan text o tan email que necesita contesta dayun.”—Jonathan.

 Si posible, no trabaja si gendeh tiempo de trabajo. El Biblia ta habla: “Tiene justo tiempo para na todo cosas.” (Eclesiastes 3:1) Pregunta na de tuyu mismo cuerpo: ‘Ta saca ba de mio tiempo para na familia cay ta trabaja lang yo siempre usando el cellphone maskin na casa ya yo? Si ansina, cosa el efecto de este na de mio matrimonio? Cosa posible habla el de mio marido o mujer?’

 “Por causa na gadget, puede yo siempre trabaja maskin cosa hora. Pero si junto yo con el de mio mujer, necesita yo hace esfuerzo que gendeh pirmi chequia con el de mio gadget especialmente si acerca na trabajo.”—Matthew.

 Discuti ustedes man maridable el usada de gadget. El Biblia ta habla: “No ustedes busca el de ustedes interes lang, sino el interes del los demas.” (1 Corinto 10:24) Discuti ustedes man maridable si paquemodo usa con el gadget y si cosa maga cambio el debe hace. Puede ustedes usa con el seccion “el cosa ustedes debe discuti” na este articulo.

 “Kame man maridable honesto con uno y otro y ta habla kame con uno y otro si ta puede kame mira que sobra ya kame ta usa con el gadget. Sabe kame que puede este resulta problema, poreso ta considera kame enbuenamente si cosa ta habla el cada uno kanamon.”—Danielle.

 Acorda: Asigura que etu el ta controla con el de tuyu gadget y gendeh el gadget amo el ta controla contigo.