El cuanto maga jovenes gendeh ta sigui na hora que ta manda kanila bolbe. El otro ta man imbusterias con el diila maga mayores o ta escapa na casa para man junto con el diila maga amigo. Cosa tu puede hace si el de tuyu joven anak ya hace perde el de tuyu confianza?

•  Rebelloso ba de mio anak?

•  Paquemodo si ta man imbusterias conmigo de mio anak?

•  Con quien debe disculpa?

•  Cosa yo puede hace para ayuda con el de mio anak que hace bira de mio confianza con ele?

•  Si cosa el maga mayores ta habla

 Posible gendeh. El Biblia ta habla: “El tonterias talli amarrao na corazon del joven” y mas mucho na maga jovenes ta dale mira que deverasan se. (Proverbio 22:15, footnote) “El maga jovenes gendeh ta pensa enbuenamente si ta hace cuanto maga decision,” ya escribi si Dr. Laurence Steinberg. “Expecta que man kamali sila tiene vez.” a

 No dayun pensa que el de tuyu joven anak quierre desobedece contigo. El research ta dale mira que importante para na maga jovenes si cosa el mirada del diila mayores kanila maskin pa dol nuay sila queber. Posible gendeh lang ta dale mira el de tuyu anak pero tan triste le na cosa le ya hace o ta arripinti cay ya culpa le contigo.

•    Con el de suyu ba maga uban o alrededor? El Biblia ta habla: “El maga barcada malo ta hace cambia el custumbre bueno de un gente.” (1 Corinto 15:33, El Nuevo Testamento na Chavacano) Deverasan, grande el influencia del maga amigo na maga jovenes. Ta influencia tambien kanila el social media y maga advertisement. Omento pa, el maga jovenes falta experiencia na vida poreso puede tu entende si porque el maga jovenes ta hace maga gendeh justo decision. Siempre, debe sila aprende acepta el resulta del diila maga decision para queda sila maga responsable adulto.

•    Iyo ba el tiene culpa? Baka ta pensa tu que bien istricto gayot tu poreso el de tuyu anak ya hace gendeh cosas bueno. O gaha tiene vez ta pensa tambien tu que bien sobra gayot tu ta dale libertad con el de tuyu anak. En vez de man focus na cosa tu ya hace kamali, man focus si paquemodo tu ayuda solva con el problema.

•   Controla con el de tuyu reaccion. Posible el de tuyu joven anak ta expecta que rabia tu. Cosa gaha si este tu hace? Na calmao manera, man cuento con el de tuyu anak y sabe si porque le ya hace el cosa le ya hace. Curioso ba le? Bored? Triste? Bien quierre tiene maga amigo? Maskin cosa pa el razon, mali siempre el cosa le ya hace. Pero puede se ayuda contigo y con el de tuyu joven anak para entende si porque quel ele ya hace.

   Principio na Biblia: “Man alisto ustedes para oi, pero no conversa dayun, no rabia dayun.”​—Santiago 1:19.

•   Ayuda con el de tuyu anak para entende si cosa ya sucede. Pregunta con ele, Cosa tu ya puede aprende na cosa ya sucede? Cosa tu hace si enfrenta tu otravez ansina clase situacion? Este maga pregunta puede ayuda con el de tuyu anak para pensa y hace maga buen decision.

   Principio na Biblia: “Corecta tu, dale aviso y dale consejo con paciencia y con buen manera de enseñada.”​—2 Timoteo 4:2, NWT.

•   Ayuda con el de tuyu anak que entende que tiene consequencia el de suyu maga accion. Puede tu se hace si dale tu con ele restriccion que conectao na cosa le ya hace mali. Por ejemplo, si el de tuyu anak ya hace perde el de tuyu confianza cay ya usa le de tuyu coche sin permiso, puede tu dale con ele restriccion si paquemodo de tarda o si cuando le puede usa con el coche.

   Principio na Biblia: “Cosa el gente ta siembra, ese tamen ele ay cosecha.”​—Galacia 6:7.

•   Man focus si paquemodo hace bira con el confianza. Deverasan, ta necesita se tiempo. Pero debe sabe el de tuyu anak que puede bira otravez el de tuyu confianza. Asigura que gendeh le perde esperanza. Cay si ta sinti el de tuyu anak que gendeh ya gayot le puede hace bira el de tuyu confianza con ele, baka gendeh ya le pricura hace esfuerzo.

   Principio na Biblia: “No hace rabia con el de ustedes maga anak, basih ay queda sila desganao.”​—Colosa 3:21.