El grande animal colorao brillante que ya menciona na Revelacion capitulo 17 amo el simbolo de un organizacion que el proposito amo para hace unido y para representa con el maga nacion del mundo. Ya principia este existi como el League of Nations y ahora, este amo el United Nations.

Si paquemodo puede identifica con el grande animal colorao brillante

1.   Un organizacion de politica. El grande animal colorao brillante tiene “siete cabeza” que ta representa con el “siete monte” y “siete rey” o aquellos quien ta rula. (Revelacion 17:9, 10, El Nuevo Testamento na Chavacano) Ya usa con el maga monte y grande animal na Biblia como simbolo de maga gobierno.​—Jeremias 51:24, 25; Daniel 2:44, 45; 7:17, 23.

2.   Simbolo del sistema de politica na entero mundo. El grande animal colorao brillante ta semeja con el peligroso grande animal que tiene siete cabeza na Revelacion capitulo 13 que ta representa con el sistema de politica na entero mundo. El cada grande animal tiene siete cabeza, diez cuerno y maga palabra de insulto escribido kanila. (Revelacion 13:1; 17:3) Bien semejante gayot este, poreso imposible para habla que nuay coneccion este dos. El grande animal colorao brillante amo un imagen o simbolo del sistema de politica na entero mundo.​—Revelacion 13:15.

3.   Poder estaba na otro quien ta rula. El grande animal colorao brillante “ya sale na” o ta existi por causa na otro quien ta rula.​—Revelacion 17:11, 17, El Nuevo Testamento.

4.   Tiene coneccion na religion. El Grande Babilonia, el todo falso religion na mundo, ta sinta na grande animal colorao brillante. Este ta dale mira que el maga religion ta influencia con el grande animal.​—Revelacion 17:3-5.

5.   Gendeh ta respeta con Dios. El grande animal tiene “maga palabra de insulto contra con el Dios escribido na entero cuerpo disuyo.”​—Revelacion 17:3.

6.   Temporario queda gendeh activo. El grande animal colorao brillante hay esta na “hondura” a o queda gendeh activo por cuanto tiempo, pero hay existi otravez.​—Revelacion 17:8, NWT.

Cumplimiento del profecia na Biblia

 Considera si paquemodo el United Nations y el quien yan una con este, el League of Nations, ya cumpli con el profecia na Biblia acerca na grande animal colorao brillante.

1.   Un organizacion de politica. El United Nations ta suporta con el sistema del politica​—“ta pricura este hace igual-igual con el poder del cada Miembro de este.” b

2.   Simbolo del sistema de politica na entero mundo. Del 2011, el United Nations ya omenta con el ika-193 miembro de este. Poreso, ta clama este que ta representa este con el mayoria del maga nacion y maga gente na mundo.

3.   Poder estaba na otro quien ta rula. El United Nations ya existi por causa na maga nacion que miembro de este y el de suyu poder y autoridad ta defende lang na cosa este hay dale con ele.

4.   Tiene coneccion na religion. El League of Nations y United Nations pirmi ta ricibi el suporta del maga religion del mundo. c

5.   Gendeh ta respeta con Dios. Ya establicia con el United Nations “para mentena con el paz y seguridad na entero mundo.” d Dol bonito el goal de este, pero el deverasan, nuay respeta el UN con el Dios cay este ya clama que puede este hace con el cosa ya habla el Dios que el de suyu Reino lang el puede cumpli.​—Salmo 46:9; Daniel 2:44.

6.   Temporario queda gendeh activo. El League of Nations que ya forma despues del Guerra Mundial I para mentena con el paz, nuay puede sangga con el guerra del maga nacion. Nuay mas este existi cuando ya principia el Guerra Mundial II del 1939. Del 1945, despues del Guerra Mundial II, ya forma con el United Nations. El maga proposito, manera y si paquemodo con este ya forma ta semeja gayot na League of Nations.