Si! El Biblia estaba con el “Dios, quien ta dale consuelo con el maga desganao.” (2 Corinto 7:6, El Nuevo Testamento na Chavacano) Maskin el Biblia gendeh un libro acerca na mental health, ya puede este ayuda con el manada quien ta pensa man suicide. El practical consejo de este puede tambien ayuda contigo.

•  Cosa practical consejo ta dale el Biblia?

•  Tiene ba ya menciona el Biblia acerca na maga gente quien quierre muri?

•  Cosa maga texto na Biblia el puede ayuda contigo para resisti con el idea que man suicide?

•  Paquemodo si ya habla el de tuyu amigo que quierre le man suicide?

•  Paquemodo si ya atribi yo man suicide de antes?

• ● Habla con otro si cosa tu ta sinti.

   Si cosa el Biblia ta habla: “El verdadero amigo ta ama na todo tiempo, y un hermano quien ya nace para na tiempo de dificultad.”​—Proverbio 17:17.

   Si cosa quierre decir: Necesita kita el ayuda del otro si tiene kita maga problema.

   Si esconde lang tu el cosa tu ta sinti, man dificil tu enfrenta con ese. Pero si man share tu se, hay queda liviano el de tuyu sentido y hay tiene tu positivo mirada na de tuyu situacion.

   Pruba hace este: Este dia, man cuento tu con el un miembro del de tuyu familia o un amigo con quien tu puede confia. a Puede tambien tu escribi con el cosa tu ta sinti.

• ● Pidi medical ayuda.

   Si cosa el Biblia ta habla: “El gente bueno el cuerpo gendeh necesita con el doctor, sino el gente emfermo.”​—Mateo 9:12.

   Si cosa quierre decir: Debe kita pidi medical ayuda si enfermo kita.

   Si ta pensa kita man suicide, posible señal ese que tiene kita enfermedad na pensamiento o emocion. Igual na un fisical enfermedad, nuay razon para tiene kita huya. Tiene cura el maga enfermedad na pensamiento y emocion.

   Pruba hace este: Consulta dayun na un cualificao doctor.

• ● Acorda que ta ama contigo el Dios.

   Si cosa el Biblia ta habla: “Gendeh ba ta vende cinco bilog maya por dos cen? Pero ni uno de esos noay olvida el Dios. . . . No ustedes tene miedo, cay mas vale [“mas valuable,” NWT] pa ustedes contra un montonada de maya.”​—Lucas 12:6, 7.

   Si cosa quierre decir: Precioso tu para con Dios.

   Posible, ta sinti tu que solo lang tu pero el Dios ta mira con el de tuyu sufrimiento. Ta ama le contigo​—maskin pa no quierre mas tu vivi. “Gendeh tu hace desaire, O Dios, con el corazon que destrozao y machacao,” ya habla el Salmo 51:17. Quierre el Dios que vivi tu cay ta ama le contigo.

   Pruba hace este: Examina el evidencia na Biblia que ta ama contigo el Dios. Por ejemplo, mira con el capitulo 24 del libro Draw Close to Jehovah.

• ● Reza con Dios.

   Si cosa el Biblia ta habla: “Deja todo el de ustedes maga lingasa con [Dios], cay Ele ta cuida con ustedes.”​—1 Pedro 5:7.

   Si cosa quierre decir: Quierre el Dios que habla tu con ele si cosa gayot tu ta sinti y si cosa tu tan lingasa.

   El Dios puede dale contigo paz na pensamiento y fuerza para aguanta con el de tuyu situacion. (Filipo 4:6, 7, 13) Ta suporta le con aquellos quien ta pidi ayuda con ele na rezo.​—Salmo 55:22.

   Pruba hace este: Reza con Dios este dia. Usa con el de suyu nombre, Jehova y habla con ele si cosa tu ta sinti. (Salmo 83:18) Pidi con ele que ayuda contigo aguanta.

• ● Medita con el esperanza na Biblia para na futuro.

   Si cosa el Biblia ta habla: “Este esperanza igual como un ancla asegurao para del diaton alma.”​—Maga Hebreo 6:19.

   Si cosa quierre decir: Posible, cambia-cambia el de tuyu emocion pero el esperanza na Biblia puede ayuda contigo para queda mas balance.

   Gendeh imposible este esperanza cay base este na promesa del Dios que quita le con el diaton maga sufrimiento.​—Revelacion 21:4.

   Pruba hace este: Aprende mas acerca na promesa na Biblia por medio que le con el leccion 5 del brosyur Buen Noticia Estaba con Dios!

• ● Hace maga cosas que ta man enjoy tu.

   Si cosa el Biblia ta habla: “El alegre corazon amo un buen medicina.”​—Proverbio 17:22.

   Si cosa quierre decir: Si hace kita con el maga cosas que ta hace kanaton alegre, hay queda mas bueno el diaton mental o emocional salud.

   Pruba hace este: Hace maga cosas que ta puede hace contigo alegre. Por ejemplo, oi bonito cancion, le cosa que puede contigo anima o dale tiempo na cuanto actividad que tan enjoy tu. Hay queda tambien tu mas alegre si ayuda tu con otro maskin na diutay maga manera.​—Maga Actividad 20:35.

• ● Cuida con el de tuyu fisical salud.

   Si cosa el Biblia ta habla: “El maga actividad del cuerpo bueno.”​—1 Timoteo 4:8.

   Si cosa quierre decir: Ta beneficia kita si tan exercise kita, tiene bastante durmida y ta come sustancioso comida.

   Pruba hace este: Camina-camina maskin por 15 minuto lang.

• ● Acorda que ta cambia el diaton maga sentido y situacion na vida.

   Si cosa el Biblia ta habla: “No sabe ganeh ustedes si cosa ay pasa mañana.”​—Santiago 4:14.

   Si cosa quierre decir: Posible temporario lang el maga problema​—maskin aquel ta pensa tu que nuay solucion.

   Maskin paquemodo man de malisud el de tuyu situacion ahora, puede se cambia mañana. Poreso, busca maga manera para puede enfrenta con ese. (2 Corinto 4:8) Posible cambia el de tuyu dificil situacion pero si man suicide tu, gendeh ya tu puede hace bira el de tuyu vida.

   Pruba hace este: Le maga istoria na Biblia acerca na maga gente quien ya sinti bien triste que quierre ya sila muri. Y mira si paquemodo ya queda bueno el diila situacion​—posible na manera que gendeh sila ta expecta. Considera kita cuanto maga ejemplo.

 Si. El Biblia ta menciona acerca na cuanto maga gente que dol ya habla, “Quierre ya yo muri.” Nuay regaña kanila el Dios sino ya ayuda le kanila. Puede tambien le se hace contigo.

Elias

•  ● Quien le? Si Elias amo un animoso profeta. Pero tiene vez ta sinti tambien le luya. Asegun na Santiago 5:17, “Si Elias ganeh un gente igual lang canaton.”

•  ● Porque le quierre muri? Na un punto del de suyu vida, ya sinti le que solo lang le, nuay valor y ya tiene le miedo. Poreso ya pidi le: “Jehova, saca ya uste de mio vida.”​—1 Rey 19:4.

•  ● Cosa el ya ayuda con ele? Ya habla si Elias con Dios el cosa le ta sinti. Paquemodo el Dios ya anima con ele? Ya dale mira el Dios con Elias el De Suyu amor y poder. Ya asigura el Dios con ele que valuable siempre le y ya dale con ele un amable y cualificao ayudante.

•  ▸ Le acerca con Elias: 1 Rey 19:2-18.

Job

•  ● Quien le? Si Job amo un rico hombre quien tiene grande familia y fiel ta adora con el verdadero Dios.

•  ● Porque le quierre muri? Derepente lang, manada maga mal cosas el ya sucede na vida de Job. Ya perde el todo cosa le tiene. Todo de suyu maga anak ya muri na un calamidad. Ya tiene le un grabe enfermedad. Y na uliji, ya acusa con ele que culpa de suyu si porque le ya tiene maga problema. Si Job ya habla: “No quierre yo de mio vida; no quierre ya yo vivi.”​—Job 7:16.

•  ● Cosa el ya ayuda con ele? Ya reza si Job con Dios y yan cuento con otro. (Job 10:1-3) Ya anima con ele el de suyu buen amigo, si Elihu, quien ya corecta con ele na de suyu mirada na de suyu situacion. Y mas pa na todo, si Job ya acepta con el consejo y ayuda del Dios.

•  ▸ Le acerca con Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

•  ● Quien le? Si Moises amo un lider del Israel de antes y un fiel profeta.

•  ● Porque le quierre muri? Bien pesao el responsibilidad de Moises, pirmi con ele ta juzga y ya sinti le bien cansao. Poreso, ya pidi le con Dios: “Pabor mata ya conmigo ahora.”​—Numero 11:11, 15.

•  ● Cosa el ya ayuda con ele? Si Moises ya habla con Dios si cosa le ta sinti. Ya hace liviano el Dios con el responsibilidad de Moises para menora el de suyu stress.

•  ▸ Le acerca con Moises: Numero 11:4-6, 10-17.