El nombre Miguel que ta refiri el cuanto religion como “San Miguel,” amo el nombre que ya dale con Jesus antes y despues del de suyu vida aqui na tierra. a Ya purpia si Miguel con Satanas despues del muerte de Moises y ya ayuda con el un angel que lleva el mensaje del Dios con profeta Daniel. (Daniel 10:13, 21; San Judas 9) Ya actua si Miguel harmonia na cosa quierre decir del de suyu nombre—“Quien el Igual con Dios?”—cuando ya defende le con el rulanza del Dios y yan contra con el maga enemigo del Dios.—Daniel 12:1; Revelacion 12:7.

 Considera si porque razonable para habla que si Jesus amo el arcangel que si Miguel.

•   Si Miguel amo “el Arcangel.” (San Judas 9, El Nuevo Testamento na Chavacano) El titulo “arcangel,” quierre decir “jefe del maga angel,” ya aparece dos beses lang na Biblia. Na este dos texto, puede mira que un angel lang el ta lleva con ese titulo. El uno de ese maga versiculo ta habla que “cuando el voz del arcangel y el trompeta del Dios ay dale el anuncio, el Señor mismo ay abaja del cielo,” que ta refiri con Señor Jesus quien ya resucita. (1 Tesalonica 4:16) Tiene si Jesus el “voz del arcangel” cay ele el arcangel que si Miguel.

•   Si Miguel el comandante del maga angel soldao. “Si Miguel y el disuyo maga angel ya imbisti con el Dragon,” si Satanas. (Revelacion 12:7) Tiene grande autoridad si Miguel na cielo cay ya llama con ele “uno na maga de con todo alto principe” y “el principe.” (Daniel 10:13, 21; 12:1) Este maga titulo ta dale mira que si Miguel amo “el comandante del maga soldao angel,” como cosa ya habla el scholar na Nuevo Testamento que si David E. Aune.

   Puera con Miguel, un nombre lang el ya menciona el Biblia quien tiene autoridad na maga soldao angel. Ya menciona este que “el Señor Jesus ay aparece na cielo junto con el disuyo maga angel poderoso. Ay vene Le na un fuego que ta arde para dale castigo.” (2 Tesalonica 1:7, 8; Mateo 16:27) Si Jesus “ya subi na cielo y talla ahora na mano derecha del Dios. Con Ele ta somete todo el maga Angel, maga Fuerza y maga Poder.” (1 Pedro 3:21, 22) Gendeh justo para pensa que ya designa el Dios con Jesus y con Miguel para queda igual comandante del maga sagrao angel. Sino, mas razonable para pensa que el nombre Jesus y Miguel ta refiri na igual persona.

•   Si Miguel “hay para” durante el “tiempo de dificultad” que nuay pa gayot sucede de antes. (Daniel 12:1) Na libro de Daniel, manada beses ya usa con el expresion “hay para” para refiri con el un rey quien preparao hace un especial accion. (Daniel 11:2-4, 21) Si Jesucristo que ya llama como “El Palabra de Dios,” hay hace un especial accion como el “Rey de todo el maga rey” para destroza con el todo maga enemigo del Dios y protege con el maga siervo del Dios. (Revelacion 19:11-16) Hay hace se ele durante el tiempo de “grande calamidad como noay pa tene desde el principio del mundo hasta ahora.”—Mateo 24:21, 42.