Si. Ta ayuda el Dios con aquellos quien sincero ta pidi cosas que uyun na de suyu voluntad. Maskin nuay pa tu reza desde antes, puede anima contigo el ejemplo na Biblia de aquellos quien ya reza para pidi ayuda con Dios. Por ejemplo:

•   “O Jehova de mio Dios, ayuda conmigo; salva conmigo por medio na De Tuyu lastima.”—Salmo 109:26, A Literal Translation of the Bible.

•   “Pobre yo y manada necesidad: O Dios, ayuda conmigo.”—Salmo 69:6, Douay Version.

 Siempre, el quien ya escribi con este maga palabra tiene fuerte fe con Dios. Pero el Dios ta oi con todo quien sincero ta atraca con ele, igual con aquellos “dolorido el corazon” o “aquellos bien triste.”—Salmo 34:18.

 Gendeh tu debe pensa que nuay queber el Dios na de tuyu maga problema. El Biblia ta habla: “Maskin alto si Jehova, ta pone le atencion con el humilde; pero lejos le con el orgulloso.” (Salmo 138:6) Gane, ya habla si Jesus con el de suyu maga dicipulo: “Maskin el maga pelo na de ustedes maga cabeza contao ya todo.” (Mateo 10:30) Ta pone atencion el Dios con el maga detalle acerca contigo, maskin el maga cosas que etu mismo gendeh ta puede nota. Poreso, asigurao que oi gayot le contigo si pidi tu con ele ayuda na rezo.—1 Pedro 5:7.