El maga adulto anak tiene el importante responsibilidad que cuida con el diila maga mayores que edad ya. El Biblia ta habla que el maga adulto anak “necesita aprende sila una hace el diila obligacion con el diila mismo familia, y paga el diila maga debe con el diila mayores, cay ese amo el ta gusta el Dios.” (1 Timoteo 5:4, El Nuevo Testamento na Chavacano) Si el maga adulto anak ta asigura que ta cuida sila con el diila de edad mayores, ta obedece tambien sila con el mandamiento del Biblia que honra con el diila mayores.—Efeso 6:2, 3.

 El Biblia gendeh ta contene especifico instruccion si paquemodo cuida con el de edad mayores. Pero, ta dale este maga ejemplo del fiel maga hombre y mujer quien ya hace con ese. Ta dale tambien este practical ayuda para con aquellos quien ta cuida con el diila de edad mayores.

•  Paquemodo el cuanto miembro na familia ya cuida con el diila de edad mayores na tiempo del Biblia?

•  Cosa practical consejo estaba na Biblia el puede ayuda con aquellos quien ta cuida con el diila de edad mayores?

•  Ta habla ba el Biblia que debe cuida con el de edad mayores na casa?

 Ya hace sila con ese na diferente manera depende na circumstancia.

•   Si Jose ya queda lejos na de suyu de edad tata, si Jacob. Cuando si Jose ya tiene el oportunidad, ya manda le cambia con Jacob y queda cerca con ele. Si Jose ya dale con ele casa, comida y ya protege con el de suyu tata.—Genesis 45:9-11; 47:11, 12.

•   Si Rut ya cambia na lugar del de suyu suegra y ya trabaja enbuenamente para cuida con ele.—Rut 1:16; 2:2, 17, 18, 23.

•   Si Jesus, antes muri, ya iscuji le si quien cuida con el de suyu nana, si Maria, quien ya queda viuda.—Juan 19:26, 27. a

 Gendeh facil cuida con el maga de edad mayores. Pero, el Biblia puede ayuda kanaton para enfrenta con ese situacion.

•   Honra con el de tuyu mayores.

   Si cosa el Biblia ta habla: “Honra con el de tuyu tata y nana.”—Exodo 20:12.

   Paquemodo puede aplica con este principio? Dale mira honor con el de tuyu mayores por medio que permiti kanila que hace con el diila mismo decision na vida si posible. Si ta permiti el diila circumstancia, deja kanila que hace con el diila mismo decision acerca si paquemodo cuida kanila. Mas pa, puede tambien kita dale mira honor por medio que asisti kanila depende na de tuyu circumstancia.

•   Entende y perdona kanila.

   Si cosa el Biblia ta habla: “El hondo entendimiento del un gente puede gayot menora con el de suyu rabia, y hay alaba con ele si ignora le con el kamali.”—Proverbio 19:11.

   Paquemodo puede aplica con este principio? Si el un de edad mayores ya habla un cosa gendeh bueno o dol gendeh ta aprecia con el de tuyu cuidada, pregunta con el de tuyu mismo cuerpo, ‘Cosa yo hay sinti si talli yo na semejante situacion?’ Si ta pricura tu entende y perdona kanila, hay puede tu evita queda mas grabe el situacion.

•   Consulta con otro.

   Si cosa el Biblia ta habla: “Ta falla el maga plano si gendeh ta consulta, pero tiene buen exito si manada el quien ta dale consejo.”—Proverbio 15:22.

   Paquemodo puede aplica con este principio? Man research si cosa puede ayuda na problema na salud que posible tiene el de tuyu mayores. Sabe si cosa puede ayuda el gobierno para cuida con el de tuyu mayores. Man cuento con otro quien ta cuida tambien con el diila de edad mayores. Si tiene tu maga hermano o hermana, puede ustedes man miting para discuti si cosa necesita el de ustedes mayores, si paquemodo cuida kanila y si paquemodo dividi con el responsibilidad.

•   Queda modesto.

   Si cosa el Biblia ta habla: “El sabeduria talli con el maga modesto.”—Proverbio 11:2.

   Paquemodo puede aplica con este principio? Sabe con el de tuyu limitacion. Por ejemplo, tiene limitao tiempo y fuerza el todo. Poreso, posible gendeh tu puede hace el todo para con el de tuyu mayores. Si tan dificil ya tu cuida con el de tuyu de edad mayores, puede tu pidi ayuda con el otro miembro del familia o na maga profesional.

•   Cuida con el de tuyu mismo cuerpo.

   Si cosa el Biblia ta habla: “Noay quien ta desprecia con su mismo cuerpo, sino ta dale come y ta cuida embuenamente con ese.”—Efeso 5:29.

   Paquemodo puede aplica con este principio? Maskin tiene tu responsibilidad cuida con el de tuyu mayores, necesita tambien tu cuida con el de tuyu mismo cuerpo y con el de tuyu mismo familia si casao tu. Necesita tu come enbuenamente. Debe tiene tu bastante descanzo y durmida. (Eclesiastes 4:6) Y necesita tu descanza si posible. Si hace tu este maga cosas, mas puede tu cuida con el de tuyu mayores.

 El Biblia gendeh ta contene especifico direccion si debe ba el maga adulto anak cuida con el diila mayores na casa. El cuanto maga familia ya iscuji que el diila de edad mayores esta na casa si posible. Pero, el cuanto posible ta sinti que mas bueno cuida con el diila de edad mayores na nursing home. El familia posible man junto-junto para decidi si cosa el mas bueno para con todo.—Galacia 6:4, 5.