Nuay menciona na Biblia el fecha si cuando ya nace con Jesus y nuay tambien este habla que debe kita celebra con el de suyu nacimiento. El McClintock and Strong’s Cyclopedia ya habla: “El celebracion del Christmas gendeh mandato del Dios y gendeh tambien se estaba na NT [Nuevo Testamento].”

 El historia ta dale mira que el Christmas tiene coneccion na maga ritual de pagano. El Biblia ta hace claro que gendeh alegre el Dios si adora kita con ele na manera que gendeh aceptable para con ele.​—Exodo 32:5-7.

1.   Celebracion del cumpliaño de Jesus: “El maga Cristiano del primer siglo nuay celebra con el nacimiento [de Jesus] cay ya considera sila con el celebracion de nacimiento del maskin quien como tradicion de pagano.”​—The World Book Encyclopedia.

2.   Deciembre 25: Nuay prueba que ya nace si Jesus na ese fecha. Posible ya iscuji con este fecha el maga lider del Iglesia para tupa na fecha del maga fiesta de pagano que ta hace na tiempo del winter solstice. a

3.   Dalida de regalo, comijan, party: El The Encyclopedia Americana ya habla: “Mas mucho del maga tradicion del Christmas ya saca na celebracion de Saturnalia, un fiesta de Romano que ta celebra na medio del mes de Deciembre. Por ejemplo, na este celebracion estaba el tradicion que prepara manada comida, dale maga regalo y sindi candela.” Asegun na Encyclopædia Britannica, nuay trabajo y negocio durante el celebracion de Saturnalia.

4.   Maga Christmas light: Asegun na The Encyclopedia of Religion, el maga de Europe ta decora con el diila casa usando el “maga luz y diferente clase de evergreen” para celebra con el winter solstice y para arria con el maga mal espiritu.

5.   Mistletoe, holly: Este amo maga siembra que ta usa como decoracion para na Christmas. “El maga Druid ta creé que tiene poder de magica el mistletoe. Ta adora sila con el siembra holly cay ta esperanza sila que por medio con ese hay bira el sol.”​—The Encyclopedia Americana.

6.   Christmas tree: “El adoranza na pono que comon na maga pagano de Europe, ya continua despues sila cambia na Cristianidad.” El uno na maga cosas que ta dale mira que ta continua siempre el adoranza na pono amo el tradicion que “ta pone un Christmas tree na entrada o adentro del casa durante el celebracion na tiempo de winter.”​—Encyclopædia Britannica.